Txiaj Ntsim Zoo Tag Nrho
Muaj ib xyoos, ob peb hnub ua ntej Christmas, kuv tus txiv, Rob, pom nws ob tug muam hlob nyob hauv chav pw tab tom qhib nkawd ob pob khoom rau Christmas. Ces, tom qab nkawd qhib saib hauv, nws ob tug muam mam li rov qab muab qhwv zoo zoo. Rob ob tug muam hais tias, “Yog koj tsis qhia rau Niam paub, wb mam li qhia koj seb yuav ua li cas thiaj qhib tau koj cov thiab.”
Nyob nyob ces nkawd ntxias tau nws, vim hais tias muaj ib pob khoom loj txaus ntim ib lub pob basketball sab hauv tsob ntoo Christmas rau nws.
Tiam sis, zoo nkaus li pob khoom ntawd sib sib thaum nws nqa mus saum nws chav pw. Nws ua tib zoo qhib ces tsis muaj dab tsi nyob hauv, tsuas yog ib daim ntawv me me. Daim ntawv sau hais tias, “Kuv paub tias koj tab tom ua dab tsi. Tsis txhob thab plaub thaum Christmas. Sau npe, Niam.” Nws kawm tau ib zaj lus qhia tseem ceeb, thiab nws txawm tsis sim uas tus tub xauj pob khoom thaum Christmas ntxiv.
Cia li xav txog tej yam uas nej nco, tej yam zoo nkauj, tej suab zoo, thiab tej yam tsw qab uas nej xav txog thaum nej xav txog Christmas. Zoo tshaj qhov ntawd yog tej yam uas peb xav txog thaum peb nco qab Christmas yog ib lub caij dawb huv—vim yog peb nco txog tus Cawm Seej kev yug los. Tej kev xav ntawd yuav tsis ploj ntawm peb mus.
Peb nco txog tej no thaum peb xav txog lub zos Npelehees lub dab zaub hmo uas tej uas cov yaj saub tau qhia txog txawm muaj lawm tiag—thaum uas peb tus Cawm Seej thiab tus Txhiv Dim yug los rau hauv peb lub ntiaj teb los uas tus Vaj Ntxwv rau cov Vaj Ntxwv thiab tus Tswv rau cov Tswv.
Feem ntau peb hnov tias Christmas yog ib lub caij rau me nyuam yaus xwb, tiam sis hauv peb lub siab mas peb sawv daws yog me nyuam xwb puas yog? Muaj ib hnub ib leej niam thiab nws tus ntxhais uas muaj cuaj xyoo mus yos kiab khw lawm. Thaum nkawd mus dhau plaws qhov chaw muag nyiaj thiab kub, tus ntxhais pom ib daim paib. Muaj cov tsiaj ntawv liab loj loj uas sau tias, “Pob Khoom uas Pub Khoom Tas Mus Li.”
Tus ntxhais nyeem daim paib, xav twj ywm me ntsis, ces tau luag nyav. Tus ntxhais khav khav rau nws niam hais tias, “Niam, kuv paub tias pob khoom twg thiaj yog pob khoom uas pub khoom tas mus li.”
“Yog dab tsi mas?” thaum nkawd taug kev nws niam nug li ntawd.
Tus ntxhias hais tias, “Yog Yexus!”
Nws niam teb yuam kev hais tias, “Me ntxhais es, tsis yog li ko. Twb yog cov pob zeb diamond.”
Yaxayas qhia peb tias, “Thiab ib tug me nyuam yaus yuav coj lawv kev”1
Kuv txawm siv kev tshawb nrhiav hauv internet, kuv thiaj pom ntau txhiab yam khoom uas lawv qhauj tawm hais tias yog “Pob khoom uas pub khoom tas mus li.” Txawm peb sim ntau npaum li cas los, tsis muaj ib yam khoom plig uas peb muab uas yuav kav mus ib txhis.
Qhov fab ntxeev, cia kuv qhia nej ib zaj dab neeg txog Christmas uas kuv nco txog ob tug neeg uas kuv ntseeg, hais tias lawv pub khoom tas mus li. Nkawd yog kuv niam thiab txiv, Aldo thiab Eleanor Harmon.
Yog ib lub caij no uas los daus ntau heev hauv peb lub zos, tiam sis txiv tseem coj peb mus nrhiav tsob ntoo Christmas zoo tshaj plaws li. Peb tau nqa tsob ntoo mus tsev es muab teeb cia, dai cov teeb, cov mlom tim tswv, cov khoom kom zoo nkauj. Peb lub tsev me me thiaj tau npaj siab rau lub caij Christmas.
Peb tau txais tej phau ntawv qhauj tawm txog khoom ua si, kuv thiab kuv cov nus thiab viv ncaus tau nthuav cov ntawv saib peb xav yuav khoom dab tsi rau Christmas. Hnov tsw qab thaum ua mov noj, thiab lub Kaum Ob Hlis Ntuj maj mam dhau los mus thaum khij tseg hauv daim ntawv suav hnub. Peb tseg tej pob khoom rau peb cov neeg zej zog cov qhov rooj thiab tau pab tej yim neeg thaum lub caij Christmas kom lawv yuav zoo siab.
Txhua hmo, tom qab kuv mus pw, kuv niam yuav siv sij hawm ntau heev hauv nws chav pw. Kuv tsuas hnov nws lub tshuab xaws khaub ncaws. Nws xaws peb tej ris tsho ces kuv tsis xav li cas txog tej uas nws ua ntawd.
Tiam sis thaum yuav txog hnub Christmas, kuv niam sab kawg nkaus. Nws pw hauv txaj hnub ua ntej Christmas rau qhov nws mob heev. Thaum tus kws kho mob qhia txiv hais tias niam yuav tau pw hauv txaj rau ib lim piam, kuv txhawj heev—thiab poob siab kawg. Yuav ua li cas thiaj muaj Christmas yog tias tsis muaj peb Niam? Yuav ua li cas thiaj zoo li hnub Christmas? Tsis tas li ntawd xwb, leej twg yuav ua plua hmo rau Christmas?
Thaum kuv txiv ua tib zoo tu kuv niam, nws txawm nco qab hais tias nws yuav tsum ua plua mov rau Christmas thiab. Kuv los pib txhawj dua! Txawm hais tias nws txawj ntse thiab ua zoo zoo, los kev ua mov noj tsis yog ib yam uas nws txawj ua.
Hmo ua ntej Christmas kuv txhos caug thov Vajtswv pab kom niam yuav cia li zoo mob thiab tias hnub Christmas yuav zoo li txhua xyoo—peb tsev neeg yuav sib sau ua ke ntawm tsob ntoo Christmas. Peb poob siab hnub Christmas yav sawv ntxov thaum peb nrhiav pom peb niam tseem pw hauv txaj mob heev. Thaum peb qhib peb tej pob khoom, kuv xav tsis thoob thaum pom hais tias kuv pob khoom yog ib cov me nyuam ris tsho rau kuv cov me nyuam roj hmab uas kuv niam tau xaws rau kuv txhua txhua hmo hauv lub Kaum Ob Hlis Ntuj ntawd. Kuv tos tsis tau khiav mus rau kuv niam thiab khawm nws caj qab. Nws twb tau ua ntau yam kom pab kuv.
Txiv twb sim ua kom Hnub Christmas yuav zoo li txhua txhua xyoo, kom yuav zoo li yav thaum ub txawm tsis muaj peb Niam. Nws twb ua zoo kawg nkaus. Tom qab noj hmo, kuv txiv txawm tsaug zog hauv ib lub rooj zaum ntawm lub qhov cub thaum kuv nrog kuv cov niam hluas ua si nrog kuv tus me nyuam roj hmab thiab nws tej ris tsho tshiab. Kuv leej niam zoo mob tom qab nws so ntau ntau, es txhua yam yeej zoo li qub. Tiam sis hauv kuv lub neej mas, kuv niam txiv thiaj yog qhov khoom plig uas pub khoom tas mus li.
Cia peb xav txog kab lus ntawd. Ib qho khoom plig uas pub khoom tas mus li puas yog qhov khoom plig zoo tshaj plaws? Qhov thib ib, ib qho khoom plig zoo tag nrho yeej qhia me ntsis txog tus neeg uas pub yam khoom plig ntawd. Qhov thib ob, nws qhia me ntsis txog tus neeg uas tab tom txais yam khoom plig ntawd. Thiab qhov kawg, yam khoom plig, yog tias yog qhov khoom plig zoo tag nrho, yuav tsis muaj nuj nqi tas sim ntawd xwb tiam sis,tiam sis yuav kav tas mus ib txhis.
Peb tus Cawm Seej, tus Cawm Seej rau tag nrho lub ntiaj teb, puas yog zoo li no? Qhov khoom plig los ntawm Yexus Khetos txoj kev yug los, kev qhuab qhia, thiab kev theej txhoj puas qhia peb me ntsis txog tus neeg uas pub yam khoom plig no? Qhia mas. “Rau qhov Vajtswv hlub neeg ntiaj teb kawg li, nws thiaj li txib nws tib leeg Tub los rau hauv ntiaj teb.”2 Peb Leej Txiv Saum Ntuj Ceeb Tsheej txi Nws Tib Leeg Tub rau qhov Nws hlub peb heev, vim peb yog Nws cov me nyuam.
Qhov khoom plig uas yog Yexus Khetos puas qhia tseeb hais tias peb Leej Txiv Saum Ntuj Ceeb Tsheej paub hais tias peb xav tau yam dab tsi? Hais ib zaug ntxiv, yeej yog li ntawd! Peb twb poob ua txhaum, thiab peb yeej xav xav tau ib tug Cawm Seej thiab ib tug Neeg Txhiv Dim. Ib yam li Nifais qhia, Yexus Khetos “yeej tsis ua ib yam xwm txheej dab tsi tsuas yog yuav ua tej uas zoo rau lub ntiaj teb thiab txhua yam uas nyob hauv xwb; vim nws yeej hlub lub ntiaj teb.”3
Thiab qhov kawg uas ib qho khoom plig zoo tshaj plaws yuav tsum muaj nev? Puas yuav muaj nuj nqi tas mus ib txhis. Phau Ntawv Maumoos qhia peb tseeb hais tias Yexus Khetos txoj Kev Theej Txhoj tsis paub kawg thiab yuav kav mus ib txhis.4
Nej puas nco qab lub kiab khw muag nyiaj muag kub? Tus ntxhais hluas yeej paub hais tias qhov khoom plig zoo tshaj plaws yog yam dab tsi. Hauv lub neej tsaus ntuj nti no, peb ntsia mus dhau plaws tej nyiaj tej kub kom thiaj coj tau Qhov Kaj uas Ci rau lub Ntiaj Teb. Tus Cawm Seej kiag qhia hais tias:
“Yog li ntawd, tsa nej lub teeb kom nws yuav ci rau lub ntiaj teb. Saib seb kuv yog lub teeb uas nej yuav tsum tsa.”5
“Kuv yog qhov kaj uas ci nyob hauv qhov tsaus.”6
Kuv hais lus tim khawv tias Yexus Khetos yog qhov khoom plig zoo tag nrho—qhov khoom plig uas pub khoom plig tas mus li. Thov kom peb yuav khaws qhov tseeb ntawd twj yam hauv peb lub siab thaum lub caij Christmas no thiab tas mus ib txhis. Nws muaj txoj sia nyob. Los ntawm Yexus Khetos lub npe dawb ceev, amees.