Ib Pab Tim Tswv hauv lub Caij Nyoog No

Nyob zoo, kuv cov kwv tij thiab cov muam. Kuv muaj hmoov vim kuv muaj cib fim los hais lus rau nej hmo no thaum peb nco txog qhov ceeb tseem tshaj plaws hauv tib neeg ntiaj teb zaj liv xwm—uas yog Vajtswv Tib Leeg Tub txoj kev los nyob hauv ntiaj teb no. Khetos txoj kev yug los, lub neej, thiab Kev Theej Txhoj yog lub txiaj ntsim uas peb Leej Txiv Saum Ntuj Ceeb Tsheej muab rau peb sawv daws.

Thaum peb nco txog tus Cawm Seej txoj kev yug los lub caij ntug muaj kev zoo siab no, Vajtswv tseem nchuav Nws txoj kev hlub los rau peb ntxiv, uas pab peb tig peb lub siab lub ntsws rau peb tsev neeg, cov phooj ywg, thiab kwv tij zej zog, thiab pab peb haj yam nco qab xav txog cov neeg uas tej zaum kho siab, nyob lawv ib leeg, los sis cov uas xav tau kev thaj yeeb thiab kev nplij siab.

Kuv ib txwm xav tsis thoob thaum qhia zaj dab neeg txog Yexus txoj kev yug los, Phau Lukas qhia txog ob peb qhov piv txwv txog kev nplij siab thiab kev thaj yeeb uas tib neeg tau txais thaum lawv raug tej xwm no. Peb pom tej qhov piv txwv no thaum peb Leej Txiv Saum Ntuj Ceeb Tsheej xa Nws cov tim tswv mus xyuas cov neeg yug yaj uas nyob tom teb nruab hmo ntuj es qhia hais tias Nws tus Tub tau yug los, thiab thaum uas cov neeg yug yaj thiaj li los xyuas Maivliag thiab Yauxej, uas tab tom tu nkawd tus mos liab hauv ib qho chaw deb deb ntawm nkawd lub tsev hauv Kalilais teb.

Yauxej thiab Maivliag tau taug kev deb ntawm lub zos Naxales mus rau Npelehees yuav ua ntaub ntawv them nqi se, qhov ntawd tsis yog ib qho uas lam tau lam muaj xwb vim tau ntau pua xyoo, cov yaj saub twb qhia hais tias tus Cawm Seej rau lub ntiaj teb yuav yug los hauv lub nroog Npelehees, uas yog Daviv lub Nroog.¹ Peb pom hais tias peb Leej Txiv Saum Ntuj Ceeb Tsheej yeej paub txog thiab tau npaj txhua yam tsav rau Nws Tib Leeg Tub txoj kev yug los. “Thaum nkawd tseem nyob hauv lub nroog Npelehees, twb txog caij uas Maivliag yug me nyuam lawm.”²

Thaum uas kuv xav txog cov neeg yug yaj thiab khub niam txiv hluas, Maivliag thiab Yauxej, kuv xav paub seb qhov uas ib pab tim tswv tshwm los rau cov neeg yug yaj pom thiab qhov uas cov neeg yug yaj tuaj xyuas Maiv Liag thiab Yauxej tau coj kev thaj yeeb, kev nplij siab thiab kev zoo siab li cas rau lawv.

Rau cov neeg yug yaj, cov tim tswv tau coj kev nplij siab los vim lawv to taub tias Vajtswv paub txog lawv thiab saib lawv rau nqi vim lawv yog thawj cov neeg uas yuav pom Vajtswv tus Me Nyuam Yaj. Rau Maivliag thiab Yauxej, cov neeg yug yaj nplij nkawd lub siab vim nkawd paub tias lwm cov neeg paub txog tej qhov txuj ci uas los saum ntuj uas lawv tab tom raug.³

Tiag tiag mas, muaj cov neeg yug yaj uas nyob ntawm peb ib ncig—cov txiv neej thiab poj niam uas ua hauj lwm ib tag hmo thiab yav sawv ntxov khwv noj khwv haus. Ib txhia neeg yug yaj hauv peb lub caij nyoog no muaj cov tub ceev xwm, cov neeg kho mob hauv cov tsev kho mob, cov neeg ua hauj lwm hauv cov pas roj thiab chaw muag khoom, thiab tib neeg qhauj xov xwm tawm. Tej thaum cov neeg uas ua hauj lwm hmo ntuj xav tias lawv tsis nrog luag tej sib raug zoo vim luag ua hauj lwm nruab hnub. Tsis tas li ntawd xwb, yeej muaj cov Yauxej thiab Maivliag hauv peb lub caij nyoog no uas tau khiav deb deb ntawm lawv lub qub teb chaws ces lawv tab tom pib ib lub neej tshiab es tseem ua koob tsheej nco txog tej hnub tseem ceeb zoo li Christmas, lawv hnub yug, hnub sib yuav, thiab kev tuag.

Thaum peb yuav txog Christmas, kuv xav paub seb peb ua puas tau zoo li cov tim tswv uas tshaj xov mus tau cov neeg yug yaj es peb thiaj yog cov neeg uas tshaj tawm Yexus txoj moo zoo, kev thaj yeeb thiab kev nplij siab. Thiab kuv xav paub seb peb ua puas tau zoo li cov neeg yug yaj thaum raug hu mus ntsib thiab tu xyuas cov Yauxej thiab Maivliag hauv peb koog zej zog thiab cov nroog es qhia rau lawv tias Vajtswv hlub lawv thiab saib xyuas thiab tab tom tu lawv thiab.

Kuv tsev neeg tau kev nplij siab thiab kev thaj yeeb uas los vim muaj cov tim tswv hauv peb lub caij nyoog. Hmo no kuv xav hais txog ib lub sij hawm uas tau muaj li no. Xyoo 2003, peb khiav ntawm peb lub qub teb chaws los nyob hauv Utah. Lub caij ntug no ntawd, txawm los daus hlob heev hauv Utah lawv hais tias tsis tau los hlob npaum li ntawd tau ntau ntau xyoo. Peb tsis tau pom li ntawd ib zaug hauv peb lub neej, peb loj hlob hauv ib qho chaw uas tsuas muaj cov ntoo kuj yem thiab tej xuab zeb tom hiav txwv. Peb lub tsev nyob tom ib txoj kev sib tshuam hauv Bountiful uas muaj ib txoj kev ntev heev rau tib neeg taug kev. Thaum pib los daus, kuv tus poj niam ua siab loj mus tshuab cov daus ntawm peb chaw nres tsheb thiab tej kev vim kuv twb ntog vim txoj kev nplua heev es dam kuv sab pob tes lawm hnub i thaum kuv taug kev mus xyuas peb ib tug phooj ywg. Vim raug mob li ntawd kuv tau mus phais pob tes thiab lawv tau cam kuv txhais caj npab rau ob peb lub hlis. Thaum nws tab tom mus tshuab cov daus mus, es yog thawj zaug nws tau ua li ntawd hauv nws lub neej, kuv tus me poj niam tsis to taub hais tias nws tau pauv seb yuav tshuab mus rau lwm sab tom qab nws ua ib sab tas. Ces, thaum nws txav mus rau sab tov, nws tab tom tshuab cov daus rov los rau sab uas nws nyuam qhuav tu. Nws ua mus los, tiam sis kov tsis yeej li as. Ua sw tas li! Vim nws mus tiv no ntev heev, nws raug kab mob hauv ob sab pob ntseg thiab tsis hnov lus rau yuav luag ob lub hlis. Tib lub sij hawm ntawd kuv tus tub uas muaj kaum rau xyoo ua rau nws nrob qaum sav thaum nws mus ua si thiab tau pw hauv txaj kom nws lub nrob qaum zoo mob. Peb raug xwm txheej li ntawd, ib tug pw hauv txaj, ib tug lag ntseg, ib tug cam nws txhais caj npab, thiab sawv daws no heev. Kuv xav hais tias peb cov neeg zej zog luag peb xwb. Ces muaj ib tag kis thaum ntxov heev, nyuam qhuav 5 teev kaj ntug tseem no heev, kuv tsim los hnov leej twg tab tom tshuab daus sab nraum peb lub tsev. Kuv ntsia ntawm qhov rais pom kuv tus neeg zej zog Tij Laug Blaine Williams. Txawm tias nws muaj xya caum xyoo los, nws tawm ntawm nws lub tsev sov sov, es maj mam los tshuab cov daus ntawm peb qhov chaw nres tsheb thiab peb tej kev, vim nws paub hais tias peb ua tsis tau peb tus kheej. Ces ib yam li nws tuaj pab ntsiag tos li no, lwm tus phooj ywg, Tij Laug Daniel Almeida, tuaj tom peb tsev yuav thauj kuv mus nram Salt Lake mus ua hauj lwm, vim kuv tsav tsheb tsis taus vim lawv cam kuv txhais caj npab. Nkawd nyob ntawd pab kuv txhua tag kis sawv ntxov mus txog rau thaum kuv tsev neeg zoo mob thiab peb muaj cuab kav tu peb tus kheej lawm. Lub caij Christmas no no thaum xyoo 2003, ob tug tij laug no ua cov tim tswv rau peb, ib yam li cov tim tswv uas raug xa mus ntsib cov neeg yug yaj puag thaum ub. Ob tug tij laug no tau ua raws li tus Cawm Seej tus yam ntxwv thiab tau xav txog peb tej kev xav tau ua ntej lawv tus kheej.

Cov kwv tij thiab cov muam, tus Cawm Seej tau ua neej kom ua yam ntxwv zoo tag nrho txog kev hlub thiab kev siab zoo rau tib neeg. Nws yeej tsis xav txog Nws tus kheej thiab tau mus pab lwm tus. Tej yam Nws tau ua kom pab lwm tus los Nws ua txhua hnub thiab tsis tau ua rau ib lub caij los sis ib hnub phav xwb. Thaum uas peb tig peb siab peb ntsws rau lwm tus neeg zoo li tus Cawm Seej ua, kuv cog lus tias peb yuav paub lub ntsiab ntawm Christmas. Thaum peb ua li no kuv cog lus rau nej hais tias peb yuav nrhiav ntau yam hauj lwm peb ua tau ntsiag tos kom ua siab zoo pab lwm leej lwm tus uas xav tau kev pab. Qhov no yuav pab peb paub tus Cawm Seej zoo dua thiab nrhiav kev thaj yeeb hauv ntiaj teb no thiab ua siab zoo rau tib neeg, uas yuav pab peb hnov tau kev hlub, kev thaj yeeb, thiab kom peb txais dag zog es peb thiaj faib tau rau lwm tus neeg. Thaum peb coj raws li tus Cawm Seej, thov kom peb yuav hnov Nws taug kev tuaj pab peb thiab yuav hnov Nws ncav tes los pab peb. Yog peb nrhiav tus Cawm Seej thaum peb ua txhua yam, Christmas thiaj tsis yog ib hnub los sis ib lub caij xwb tiam sis ib yam uas nyob nruab plawv peb siab peb ntsws, thiab txoj kev zoo siab thiab kev hlub uas peb hnov thaum lub caij Christmas yuav nyob ze peb tas mus li. Kuv ua tim khawv hais tias Yexus Khetos, tus me nyuam mos liab uas yug los hauv Npelehees, Nws yog tus Cawm Seej thiab tus Txhiv Dim ntawm lub ntiaj teb.

Zoo siab hnub Christmas rau nej txhua tus. Kuv hais tej no los ntawm Yexus Khetos lub npe zoo, amees.