Tsom Ntsoov lub Caij Christmas Khav Khav Li

Kuv nyiam lub sij hawm no heev thaum peb sib sau ua ke ua ib tse neeg thiab nco txog peb tus Cawm Seej Yexus Khetos txoj kev yug los thiab ua Vajtswv tsaug rau Yexus Khetos lub neej thiab Nws txoj kev theej txhoj. Kuv nyiam qhov uas nyob txhua qhov txhia chaw muaj tej cim uas qhia tias lub caij nyoog no tshwj xeeb heev thiab kuv tseem nco tau txog qhov uas thaum kuv tseem me, kuv tos ntsoov lub caij Christmas los, txawm yog kuv nyob Akiv Teb los yog Alanpias Teb los xij.

Tej zaum ib yam li neeg feem coob, lub lis piam tas los kuv sim dai cov teeb Christmas, es muaj teeb meem vim ib lub nyuag teeb tsis cig es ua rau tag nrho cov teeb tsis cig li. Thaum kuv nrhiav tau lub teeb uas muaj teeb meem thiab kuv muab pauv lawm, tag nrho cov teeb txawm cig, thiab peb sawv daws dim pa me ntsis rau qhov kov yeej tau qhov teeb meem ntawd.

Ib yam uas kuv nyiam heev thaum lub Caij Christmas yuav los yog zaum ze ze peb tsob ntoo Christmas, hauv qhov tsaus ntuj tua teeb tib si, thiab cia kuv ob lub qhov muag plooj plooj thaum kuv ntsia ntsoov tsob ntoo uas muaj tej me nyuam teeb dawb paug ci ci lug. Thaum kuv pom kev plooj plooj ntawd, qhov ci ci ntawm txhua lub me nyuam teb loj tuaj zoo nkauj heev thaum qhov ci ci ntawd ci rov qab los ntawm tej khoom dai saib zoo nkauj liab liab. Yeej zoo nkauj heev kawg nkaus. Feem ntau peb tso suab nkauj uas tshaj tawm hais tias, “Kev xyiv fab rau lub ntiaj teb, tus Tswv tau los!”¹ thiab hais tias “Nws lub npe yuav yog Zoo Kawg Nkaus, Neeg Tuav Tswv Yim, tus Vajtswv muaj hwj chim loj kawg, Leej Txiv uas kav ib txhis, tus Tub Vajntxwv ntawm Kev Kaj Siab Lug.” ²

Thaum kuv ntsia cov teeb cig lug ntawm tsob ntoo, cov teeb uas ib sij khav khav ib sij plooj plooj, ua rau kuv xav txog peb tus Cawm Seej txoj hauj lwm tseem ceeb heev, uas yog ib yam uas kuv xav txog yam meej meej li thaum lub sij hawm zoo li ntawd. Nws hais tias, “Kuv yog qhov kaj ci rau neeg ntiaj teb pom kev: tus uas nrog kuv mus, tus ntawd yuav tsis taug txoj kev tsaus ntuj, tiam sis nws yuav ua nws lub neej tshav ntuj nrig.”³ Kuv xav txog hmo dawb huv uas Nws yug los, es kuv ua Leej Txiv Saum Ntuj Ceeb Tsheej tsaug vim yog Nws qhov txiaj ntsim ntawm Nws Tib Leeg Tub uas Nws muab xa los rau hauv lub ntiaj teb no kom peb thiaj muaj kev xyiv fab, kev cia siab, thiab kev hlub.⁴

Tej lub sij hawm ntsiag to no uas peb xav txog lub ntsiab ntawm lub caij no yeej tsawg tsawg feem ntau thaum peb npaj rau Hnub Christmas. Lub Kaum Ob Hlis Ntuj muaj kev lom zem thiab kev ntaus paj nruas ntau, kev sib sau ua ke thiab kev sib pauv khoom plig. Caij tsawg tsawg, thiab qee zaum tej yam peb xav tias peb yuav tsum ua thaum lub caij no ua rau peb tsis muaj kev xyiv fab npaum li qhov uas tsim nyog muaj.

Yog li ntawd Thawj Tswj Hwm Nelson cov lus qhia yeej tseem ceeb heev hais tias: “Kev xyiv fab uas peb muaj tsis los ntawm peb lub neej qhov chaw puag ncig, tiam sis los ntawm tej yam uas peb tsom ntsoov saib rau nqi hauv peb lub neej. Thaum tej yam peb ua hauv peb lub neej yog tsom ntsoov Vajtswv txoj kev cawm seej … thiab Yexus Khetos thiab Nws txoj moo zoo, peb hnov tau qhov kev xyiv fab txawm tias muaj li cas—los tsis muaj—hauv peb lub neej. Kev xyiv fab los vim yog Nws. Nws yog lub hauv paus ntawm tag nrho tej kev xyiv fab.”⁵

Lub caij no yeej zoo heev kom peb xav txog saib peb tsom ntsoov dab tsi. Nej tej kev cia siab rau lub caij Christmas no yog dab tsi? Nej xav kom muaj li cas rau nej tus kheej thiab rau cov neeg nej hlub thaum nej sib sau ua ke thaum hnub dawb huv tshaj plaws no?

Tshuav ob lis piam thiab ib nrab, es Hnub Christmas yuav los txog. Cia li xav saib muaj dab tsi sau rau nej daim ntawv qhia hnub rau ob lis piam tawm tom ntej no. Tej zaum nej xav tsis thoob txog tej yam ntau uas nej yuav tsum ua. Nej puas tau teem caij ua ub no ntau dhau? Puas muaj tej kab lis kev cai Christmas uas ua rau peb ntxhov siab thiab ua rau peb txais tsis tau tej kev xyiv fab vim yog Khetos txoj kev yug los? Nej yuav ua li cas kho nej daim ntawv qhia hnub lub caij Christmas no kom muaj sij hawm ntau dua xav txog Khetos, thiab yuav ua li cas npaj zoo dua rau lwm xyoo?

Peb yuav tsum ua tib zoo kom tsis txhob khwv khwv ntau heev npaum li tias peb tsom ntsoov tsis tau lub ntsiab ntawm lub caij no thiab peb txhos caug pe hawm tsis tau tus Vaj Ntxwv uas yug los, thiab muab peb qhov khoom plig pub rau Nws.

Nej cov niam tsev hluas, thiab peb txhua tus, nej puas ntxhov siab dhau? Nej tsom ntsoov rau dab tsi? Tej zaum xyoo no nej tsis xa ntawv Christmas tawm mus rau nej cov neeg, los yog nej tso tseg qhov uas nej yuav ntxiv duab rau hauv lub vag los yog lwm yam. Tus nqi ntawm sij hawm los yog nyiaj yuav ua rau nej tsom ntsoov tsis tau tus Cawm Seej thiab hnov Nws txoj kev xyiv fab Christmas.

Nej cov txiv tsev, thiab peb sawv daws, nej tsom ntsoov dab tsi? Tej zaum xyoo no nej ua qhov yooj yim lub caij Christmas no thiab xuas tes ua nej tej khoom plig thiab mus pab lwm tus neeg vim tus nqi thiab qhov hnyav thaum sim yuav txhua yam ua khoom plig yeej nyuaj—thiab tsis tseem ceeb—thiab ua li ntawd yuav ua rau nej tsom ntsoov tsis tau tus Cawm Seej thiab hnov qhov kaj siab lug Christ uas los tau rau nej.

Mus pab tom lub tuam tsev thaum lub caij Christmas yeej tseem ceeb heev. Lub tuam tsev kho tau tej yam uas peb tsom ntsoov, ua rau peb txoj kev xyiv fab loj tuaj, thiab ua rau peb tsev neeg sib koom siab txawm yog hauv lub neej no los yog nyob ntawm daim ntaub thaiv sab nraud los xij. Cia li xav tias txoj kev mus tom lub tuam tsev yog ib yam tseem ceeb ua thaum lub caij Christmas uas yuav pab nej nrhiav tau qhov ntsiag to Christmas uas peb nrhiav kom tau. Tej kab ke dawb huv—qhov kaj siab lug thiab lub hwj chim ntawm lub pov thawj hwj uas tej kab ke no muaj rau tag nrho cov uas saib rau nqi—tsuas muaj vim yog Leej Txiv Tib Leeg Tub, tus “Yaj uas raug tua tuag txij thaum chiv keeb los,”⁶ thiab uas yog tus uas peb ua koob tsheej nco txog Nws hnub yug.

Thaum lub caij Christmas no yuav los, cia peb ua tej yam uas muaj nqi ntau dua thiab tso tseg tsis ua tej yam uas tsis muaj qab hau. Cia peb rau rau siab ua tej hauj lwm ntawm Yexus uas tuaj Naxales tuaj—pab nplij cov tu siab lub siab, pab kho cov uas muaj lub siab ntais rhe, mus xyuas cov neeg raug kaw qhov taub, pub mov rau cov neeg tshaib plab, pub ris tsho rau cov neeg liab qab, thiab pab cov neeg uas tsis muaj suab, cov uas nyob ntawm ntug, cov uas peb tsis nco qab txog, thiab cov uas raug xyeej.⁷

Rau nej cov uas txom nyem lub caij Christmas no, kuv thov kom nej nrhiav tau tus Cawm Seej txoj kev hlub rau nej uas yog ib qho txiaj ntsim tshwj xeeb rau nej. Tam sim no xwb, neeg coob heev tab tom yuav xiam ib tug neeg uas lawv hlub vim yog kab mob kev nkeeg, kev laus, los yog kev xwm txheej tsis zoo. Nej coob tug nco txog tej yam uas nej xiam thaum lub caij Christmas yav tas los, thiab xyoo no yuav nyuaj vim nej nco tau txog tej kev nyuaj siab ntawd. Hos ib txhia neeg nyuaj siab vim yog tej yam uas cov neeg uas lawv hlub xaiv ua tam sim no. Ib txhia neeg kho siab khuav, tsis muaj neeg txheeb ze, txom nyem heev, los yog txawm yog li cas yuav muaj ib lub caij Christmas txawv tej uas lawv ua koob tsheej nco txog yav tas los.

Cia li ntseeg hais tias muaj ib qho txiaj ntsim tshwj xeeb rau nej lub caij no. Nrhiav kom tau tej lub sij hawm ntsiag twb to thaum nej yuav xav hauv nruab siab txog Yexus, thov txog Vajtswv, thiab hnov tau txoj kev hlub los ntawm Tib Tug neeg uas Nws txoj kev yug los ua tau rau peb tus twg muaj kev xyiv fab hauv lub neej twg no tiag. Cov lus cog tseg hais tias, “yuav tsis muaj kev tuag, kev tu siab, kev quaj nyiav, thiab yuav tsis muaj kev mob kev nkeeg.”⁸ “Lawv yuav tsis tshaib tsis nqhis. … Vim tus Yaj uas nyob ntawm lub theej kiab tom hauv nej yuav pub lawv, thiab yuav coj lawv los rau qhov dej txhawv uas cawm neeg txoj sia: thiab Vajtswv yuav so lawv tej kua muag huv tib si mus.”⁹

Siv sij hawm nyob twj yim, ua pa, xav tsis thoob. Ntsia mus saud. Tsom ntsoov Vajtswv qhov txiaj ntsim loj heev—qhov uas nej paub tias nej yog leej twg tiag, thiab nej to taub hais tias tej kev sim siab kav tsis ntev thiab hais tias txoj kev xyiv fab uas nej muaj tam sim no yeej yog qhov pib ntawm txoj kev xyiv fab uas yuav muaj mus ib txhis li. Nco qab ntsoov hais tias, “kev xyiv fab uas peb muaj tsis los ntawm peb lub neej qhov chaw puag ncig, tiam sis los ntawm tej yam uas peb tsom ntsoov saib rau nqi hauv peb lub neej.”

“Thiab nim no, kuv xav kom nej nrhiav tus Yexus no, tus uas cov yaj saub thiab cov tim thawj tau sau txog, xwv kom Vajtswv uas yog Leej Txiv, thiab tus Tswv Yexus Khetos, thiab tus Vaj Ntsuj Plig Dawb Huv, uas ua tim khawv txog nkawd, lawv txoj kev tshav ntuj yuav muaj nyob hauv nej mus ib txhis.”¹⁰ Kom peb thiaj yuav hais tau hais tias, “Tus Tswv, peb yeej zoo siab, Koj yug los tag kis no. … Sawv daws los txhos caug pe Nws.”¹¹

Los ntawm Yexus Khetos lub npe, amees.