Falekoloa Webb Blacksmith

ʻI he Falekoloa Webb Blacksmith, naʻe ʻasi mei he kau taukei ʻi he fefakatauʻakí ʻa ʻenau tukupā ke tokoniʻi honau koló. Mei hono faʻu e ʻakiselá (axel) mo e hapi ki he vaʻé (wheel hubs), ki hono kasaʻi ʻo e vaʻe ukameá, fakafuo ʻo e ukamea ʻoku tui ki he vaʻe ʻo e hōsí, naʻe teuteuʻi ʻe he kau ngaahi ukameá, kau faʻu veʻeteka papá, niʻihi ʻoku nau fakatui e ukamea ki he vaʻe ʻo e hōsí, mo e kau ngaahi salioté, ha founga ke fononga ai ʻa e Kāingalotú ki he hihifó.

Naʻe fakaava ʻe ʻEtuini Uepi ʻene falekoloa tufunga ukameá ʻi he faʻahitaʻu māfana ʻo e 1843. Naʻá ne ngāue fakataha mo hono ngaahi tokoua ʻe toko fā—Sonisī, ʻEtuate, Pātoni, mo Sēmisi Uesilī—ʻi he falekoloa ko ʻení, hili hono akoʻi kinautolu ʻe heʻenau tamai ko Sēmisí, ki he fefakatauʻakí.

Naʻe fakahoko ʻe he kau ngāue ʻi he falekoloá ni ʻa e ngaahi fiemaʻu fakaukamea ʻi he ʻaho kotoa pē ki he kau nofo ʻi Nāvuú, ka ko e lahi taha ʻenau ngāué ko ʻenau mateakiʻi e tokoni ke faʻu ʻa e ngaahi saliote ki he fononga ʻa e Kāingalotú ki he hihifó. ʻI he faʻahitaʻu momoko ʻo e 1845-46, naʻe ngāue ʻaki ʻa e Hala Paʻalé ʻe he Kāingalotu ne nau teuteu ke mavahe mei Nāvuú, ke fakatahataha mo fokotuʻu ʻenau ngaahi salioté ʻi he taimi ne maau mai ai ʻa e ngaahi kongá mei he falekoloá ni mo e ngaahi falekoloa tufunga ukamea kehé. Naʻe kau ʻa e kau Uepí ʻi he niʻihi fakamuimuitaha ke mavahe mei Nāvuú; naʻa nau tukupā ki hono tokoniʻi e kakaí ke fakapapauʻi ʻa e founga fefonongaʻaki naʻe fiemaʻu ki heʻenau fononga ki he hihifó.

Meʻa ke ʻAmanaki Ki Aí

Ko e Falekoloa Webb Blacksmith ko ha konga ia ʻo e takimamata ʻi he Halanga ʻo e Paioniá, ʻa ia naʻe kamata ʻi he Holo ʻa e Kau Fitungofuú ʻo ngata ki he ʻApi ʻo Pilikihami mo Mele ʻAna ʻIongí. ʻOku kau ʻi he takimamata ʻoku tataki ʻe ha tahá, ʻa e ongo loki ʻe ua—ko ha falekoloa tufunga ukamea mo ha falekoloa ngaahi mo fakalelei saliote. ʻOku kau ʻi he takimamata ki he falekoloa tufunga ukameá ʻa hono fakaʻaliʻali e founga ʻo hono tufungaʻi ha ukamea ki he vaʻe ʻo e hōsí. ʻOku kau ʻi he takimamata ki he falekoloa ngaahi mo fakalelei salioté, ʻa hono fokotuʻu ha vaʻe salioté.

Vakai takai ʻi he 360°