Trail of Hope

Ang Trail of Hope ay ang landas din na tinahak ng maraming Banal sa mga Huling Araw nang lisanin nila ang Nauvoo at nagsimulang maglakbay pakanluran. Ipinapakita ng trail ang pananampalataya ng mga ordinaryong tao na tapat na sumunod sa Korum ng Labindalawang Apostol tungo sa bagong buhay sa lambak ng Great Salt Lake (kasalukuyang Utah sa Estados Unidos).

Noong Pebrero 4, 1846, ang mga unang bagon ay umalis sa Nauvoo, naglakbay sa mga pampang ng Mississippi River sa kahabaan ng Parley Street, kung saan isang ferry ang maaaring magdala sa kanila patawid sa ilog papunta sa Iowa Territory. Patuloy na umalis ang mga Banal sa Nauvoo na tinatahak ang daan ding ito hanggang Setyembre ng taong iyon.

Mahigit 14,000 mga Banal sa mga Huling Araw ang umalis sa Nauvoo sa loob ng walong buwan na iyon. Sila ay papunta noon sa hindi pamilyar na lugar at kailangan nilang magtiwala sa patnubay ng kanilang mga lider. Marami ang nagtala ng kanilang mga karanasan sa paglisan sa Nauvoo sa kanilang journal, at ang iba ay patuloy na pinagnilayan ang tungkol sa kanilang paglisan pagkaraan ng ilang taon. Sa isang sermon na ibinigay sa Salt Lake City, Utah noong Hulyo 21, 1867, ipinahayag ni Apostol George Q. Cannon, “Kinailangan ng malaking pananampalataya ng mga tao, upang makipagsapalaran sa isang bansang hindi pa nagagalugad at disyerto upang muling subukang magtayo ng mga tahanan, at isagawa ang mga gawaing iniutos sa atin ng Diyos, na ating Ama sa Langit.”

Basahin ang tungkol sa simula ng paglisan sa Nauvoo sa Mga Banal, Tomo 1, Kabanata 46.

Ano ang Aasahan

Ang Trail of Hope ay isang self-guided na karanasan sa Pioneer Trail. Ikaw ay maaaring lumakad sa landas at basahin ang mga interpretive sign. Kung susundan mo ang Trail of Hope, magtatapos ka sa Mississippi River, pati na rin sa Pioneer Memorial at Exodus to Greatness.

Sa mga buwan ng tag-init, tumutulong ang mga artista na buhayin ang mga tinig ng mga pioneer mula sa nakaraan sa pagtatanghal sa gabi sa kahabaan ng Trail of Hope.