Temple Stones Pavilion

Ang pabilyon ay nakatayo sa kalahating ektaryang lupain na dating inookupahan ng pamilya Jones na nanirahan dito mula noong mga 1841 hanggang 1846. Ang mga Jones ay kabilang sa nakipagtipang komunidad ng Nauvoo. Tulad ng iba, malaki ang kanilang sakripisyo upang makatulong sa pagtatayo ng Bahay ng Panginoon noong 1840s. Ngayon, ang pabilyon para sa aktibidad ay gumagamit ng mga makabagong kagamitan upang ipakita ang gawain ng paghuhukay, paglililok at paglalagay ng batong ginamit sa pagtatayo ng Nauvoo Temple.

Sina William at Elizabeth Jones ay ikinasal noong 1825, sumapi sa Ang Simbahan ni Jesucristo ng mga Banal sa mga Huling Araw habang nakatira sa Cincinnati, at lumipat sa Nauvoo noong Disyembre 1840. Isinilang ni Elizabeth ang kanilang ikalabing isa at huling anak habang nakatira sila sa lupaing ito.

Si William Jones ay isang bihasang tagaputol ng bato na lumilok sa unang moonstone para sa Nauvoo Temple. Si William ay mula sa Bristol Township (na kalaunan ay naging bahagi ng Philadelphia), Pennsylvania, at si Elizabeth ay ipinanganak sa New York City, New York. Si Elizabeth Jones ay lumahok sa Female Relief Society of Nauvoo sa unang pulong nito noong Marso 17, 1842. Pinahintulutan siyang mangolekta ng mga donasyon para sa Relief Society na tumulong sa pagpopondo sa pagtatayo ng templo at lalo pa niyang sinuportahan ang mga manggagawa sa templo sa pamamagitan ng pagtatahi ng mga kamiseta. Noong Enero 31, 1846, natanggap nina William at Elizabeth Jones ang kanilang mga endowment sa Nauvoo Temple.

Ano ang Aasahan

Ang Temple Stones Pavilion ay isang interactive na espasyo na may mga aktibidad tulad ng paglalagare, pagpapait, pagpapakinis, at pag-aangat ng limestone. Magbibigay ang mga missionary ng mga salaming pangproteksiyon at guwantes, at kailangang gawin ang mga aktibidad sa ilalim ng kanilang pangangasiwa.