ʻApi ʻo Siosefa mo ʻEma Sāmitá

Naʻe hoko ʻa e ʻApi ʻo Siosefa mo ʻEma Sāmita ʻi Ketilani, ʻOhaioó, ko ha feituʻu ʻo e nonga, malu, mo e fakahā ki he fāmili Sāmitá lolotonga e taʻu ʻe fā ko ia ne nau nofo ai ʻi aí. Lolotonga ʻenau nofo ʻi he ʻapi ko ʻení, naʻe liliu ai ʻe Siosefa ʻa e Tohi ʻa ʻĒpalahamé, fokotuʻutuʻu ha ngaahi kōlomu fakataulaʻeiki mahuʻinga lahi—kau ai ʻa e fuofua alēleaʻanga maʻolungá mo e Kōlomu ʻo e Kau ʻAposetolo ʻe Toko Hongofulu Mā Uá—pea toutou fakataha mo e kāingalotu ʻo e Siasí. Ko e feituʻu ʻeni ne fakahoko ai ʻe ʻEma hono fatongia fakalangi ke “fili ha ngaahi himi toputapu” maʻá e Siasí (vakai, Tokāteline mo e Ngaahi Fuakava 25:11).

ʻI he ʻaho naʻe aʻu atu ai ʻa Siosefa mo ʻEma Sāmita ʻi Ketilaní, naʻe maʻu ʻe Siosefa Sāmita ha fakahā ne pehē ai ki he Kāingalotú ke “langa maʻa ʻeku tamaioʻeiki ko Siosefa Sāmitá, ko e Siʻí ha fale, ʻa ia te ne nofo ai mo liliu lea” (Tokāteline mo e Ngaahi Fuakava 41:7). ʻI he konga kimui ʻo e 1833, hili ha taʻu ʻe ua ʻi he ʻēliá, naʻe faifai pea hiki ai ʻa Siosefa mo ʻEma—mo ha fānau kei iiki ʻe toko tolu—ki honau ʻapí, ʻa ia naʻe langa ʻi he tokoni ʻa e fāmilí, ngaahi kaungāmeʻá, mo e kāingalotu ʻo e Siasí. Neongo ne nau nofo ʻi he ʻapí ʻi ha taʻu ʻe fā, ka naʻe fuoloa ange ʻenau nofo ʻi he ʻapí ni ʻi ha toe ʻapi ne na nofo ai ko ha ongomeʻa mali. Naʻe hoko ʻa e ʻapí ko ha feituʻu ʻo e malu pea lava ai ʻa ʻEma ʻo tokangaʻi ʻa e ʻapí, fāʻeleʻi mai ha tama, pea fakalele ha pisinisi ngaahi koloa mei he huʻakaú. ʻIkai ngata ʻi hono ngaahi fatongia fakaeʻapí, naʻe fakatahatahaʻi heni ʻe ʻEma ha ngaahi himi toputapu.

ʻIkai ngata ʻi he liliu leá ʻi hono tataki ʻe he ʻEikí, naʻe fakahoko ai foki ʻe Siosefa ha ngaahi fatongia fakaepalōfita kehe. ʻI he ʻapí ni, naʻá ne maʻu ai ha ngaahi fakahā, fakataha alēlea mo e kau taki ʻo e Siasí, fakataha mo e Kāingalotú, pea fakalahi ʻa hono fokotuʻutuʻu ʻo e Siasí. Naʻá ne tokangaʻi mei he ʻapí ni ʻa hono pulusi ʻo e fuofua pulusinga ʻo e Tokāteline mo e Ngaahi Fuakavá pea mo e pulusinga hono ua ʻo e Tohi ʻa Molomoná pea tala-kae-tohi ai ʻa e ʻUluaki Mata Meʻa-hā-maí. Naʻe tala-kae-tohi ʻe Siosefa Sāmita ʻi he ʻapí ni ʻa e fakahā ʻoku hā ʻi he taimí ni ʻi he Tokāteline mo e Ngaahi Fuakava 101 ʻa ia ne ʻuhinga ai ʻa hono faʻu ʻo e ʻApitanga ʻo Saioné. Naʻe fokotuʻutuʻu kimui ange ʻa e Kōlomu ʻo e Kau ʻAposetolo ʻe Toko Hongofulu Mā Uá mo e Ngaahi Kōlomu ʻo e Kau Fitungofulú ʻi he kei nofo ai ʻa Siosefá. Naʻe liliu foki ha konga lahi ʻo e Tohi ʻa ʻĒpalahamé lolotonga e nofo ʻa Siosefa mo ʻEma ʻi he ʻapi ko ʻení.

Ko ha kakai angalelei ʻa Siosefa mo ʻEma he naʻá na faʻa fakaʻatā hona ʻapí ki ha kakai. Naʻe faʻa totongi ʻe he kakai ko ʻení ʻenau nofo aí pe ngāue ki he fāmilí. Naʻe nofo ʻa ʻIlisa R. Sinou mo e fāmili Sāmitá tuʻo ua ʻi he ʻapí ni peá ne hoko foki ko ha faiako ki he fānau Sāmitá mo ha kau fiemui tokolahi ʻi he ʻēliá. Naʻe nofo foki ha kau mēmipa ʻo e fāmilí mo e fāmili Sāmitá, kau ai e mātuʻa ʻa Siosefá, ʻa ia ne na nofo ai ʻi ha taʻu ʻe taha lolotonga hono langa ʻa hona ʻapí. Naʻe ʻaʻahi mai foki ʻa e kuifefine ʻa Siosefá mei he tafaʻaki ʻene tamaí, Mele Tute Sāmita, ki he fāmilí ʻi he ʻapí ni.

ʻI he ʻahó ni, kuo fakaleleiʻi ʻa e ʻApi ʻo Siosefa mo ʻEma Sāmitá ʻi Ketilani, ʻOhaiō, pea ʻoku ʻatā ia ke takimamata ai e kakaí.

Lue takai 360°

Ko e Meʻa ke ʻAmanaki Ki Aí

ʻOku ʻatā ʻa e ʻapi ʻo Siosefa mo ʻEma Sāmitá ki he ngaahi takimamata ʻoku fakahoko ʻe he kau faifekaú ʻi ha miniti ʻe 25 pe 30. ʻOku ʻi ai ha ngaahi feituʻu tangutuʻanga ʻi he ngaahi feituʻu takimamatá.