ʻOku fakaʻatā ʻe he ngaahi feituʻu fakahisitōlia ʻi ʻOhaioó ʻa e kau ʻaʻahí ke nau aʻusia ʻa e kuohilí mo ako ki he founga naʻe moʻui mo lotu ai ʻa e fuofua kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻI he 1831, ʻi ha fakahā, naʻe hoko ai ʻa Ketilani ko ha feituʻu tānakiʻanga ʻo e Kāingalotú ʻi loto ʻi ha taʻu ʻe taha mei hono fokotuʻu ʻo e Siasí. Naʻe fakahā mai heni ha ngaahi fakalakalaka fakatokāteline kuó ne fakatupulaki e tui ʻa e Kāingalotú ʻi ha ngaahi toʻutangata, naʻe langa pea fakatapui ai e fuofua Fale ʻo e ʻEikí, pea naʻe foaki ai e ngaahi kī mahuʻinga ʻo e lakanga fakataulaʻeikí ki he Palōfitá ke fakahoko ʻaki e misiona ʻo e siasí ʻi he ngaahi ʻaho kimui ní. Neongo naʻe pau ke mavahe ʻa e Kāingalotú mei Ketilani ko e manavasiʻi ʻi he ngaahi fekeʻikeʻí ʻo toe kamata ʻi Mīsuli, ka ʻoku kei hokohoko atu pē hono tākiekina ʻo e Siasí ʻi he ʻahó ni ʻe he ngaahi fakavaʻe naʻe fakatoka hení. ʻOku tau manatuʻi ʻa e ngaahi talanoa ʻo e niʻihi fakafoʻituitui faivelenga ko ia naʻa nau tokoni ki hono langa ʻo e Siasí ʻi he ngaahi fuofua taʻu ko ʻení.