Ko e ʻApí mo Hono Konga Kelekelé

Hili ʻa e moveuveu lahi ʻi heʻenau moʻuí ʻi ʻOhaiō mo Mīsulí, naʻe hoko ʻa e ʻApi ʻo e Fāmili Sāmitá ko ha hūfangaʻanga malu ki he fāmili Sāmitá. Naʻe maʻu heni ʻe he Palōfita ko Siosefa Sāmitá ha ngaahi fakahā mo akoʻi ha tokāteline foʻou ki hono fāmilí pea ki he kāingalotu ʻo e Siasí. ʻI honau ʻapi foʻoú, naʻe fakaʻaongaʻi ʻe Siosefa hono taimí ke feohi mo hono uaifí mo ʻena fānaú ʻo langa hake ha moʻui fakafiemālie lolotonga ia ʻoku hokohoko atu ʻene ngāue ko ha taki fakapalōfitá.

Naʻe hiki ʻa Siosefa mo ʻEma Sāmita mo ʻena fānau ʻe toko faá ki honau fuofua nofoʻanga ʻi Nāvuú ʻi he ʻaho 10 ʻo Mē 1839. Ko e fale ʻakau loki ua mo e konga kelekele takatakaí naʻe maʻu ia kimuʻa ʻe he fāmili ʻo Kapiteni Sēmisi Uaití, ko e taha ʻo e kau fuofua nofo ʻi he feituʻú. Naʻe nofo ʻa Siosefa Sāmita ko e Lahí ʻi ha kiʻi loki ʻakau naʻe tānaki atu ki he ʻApí kimuʻa peá ne hiki ki ha ʻapi foʻou ʻi he tafaʻaki ʻe taha ʻo e halá. ʻI he 1840, naʻe fakalahi ʻe he fāmili Sāmitá ʻa e falé, ʻo tānaki atu ha loki lahi ki he fakatokelaú. Naʻe fakalahi ʻa e ʻapí ʻaki ha toe tānaki atu ha fungavaka ʻe ua ʻi ha taimi kimui ange. ʻI he loki ʻi laló, naʻe fufū ʻi ha feituʻu fakapulipuli ʻi lalo he sitepú ha loki naʻe faʻa nofo ai ʻa Siosefa ʻo toitoi mei hono ngaahi filí ʻi he Faʻahitaʻu Fakatōlau ʻo e 1842.

Hili ha taimi nounou mei he hiki mai ʻa e fāmili Sāmitá ki he ʻapi ko ʻení ʻi he 1839, naʻe aʻusia ʻe he kolo ʻo e Kāingalotu ʻi he feituʻú ha fokoutua mo ha mahaki ne tufaki ʻe he namú. Koeʻuhí ko honau ʻapí ko e taha ia ʻo e ngaahi fale malu ʻe niʻihi ʻi he koló, naʻe ʻomi ai ʻe Siosefa mo ʻEma ha niʻihi tokolahi ʻo e kau mahakí ki heni. Naʻá na hiki hona fāmilí ki tuʻa ki ha tēniti pea liliu hona ʻapí ko ha falemahaki. ʻI he faʻahitaʻu māfana ko iá, hili ʻene fakaakeake mei heʻene puke pē ʻaʻaná, naʻe fakaʻaongaʻi ʻe he Palōfita ko Siosefá ʻa e mālohi ʻo e lakanga fakataulaʻeikí ke fakamoʻui ʻa e Kāingalotu naʻe puké. Naʻe kamata ʻa e mana fakamoʻui ko ʻení ʻi he ʻApi ʻo e Fāmili Sāmitá ne manatua kimui ange ko “ha ʻaho ʻo e mālohi ʻo e ʻOtuá”.

Laukonga lahi ange fekauʻaki mo e ʻaho ʻo e fakamoʻui ʻi Nāvuú, ʻi he Kau Māʻoniʻoní, Voliume 1, Vahe 34.

Naʻe maʻu mo fakalele ʻe he Komiunitī ʻo Kalaisí ʻa e ʻApi ʻo e Fāmili Sāmitá ko ha konga ʻo e Feituʻu Fakahisitōlia ʻo Siosefa Sāmitá. Naʻe hiki ia ʻo tokangaʻi ʻe he Feituʻu Fakahisitōlia ko Nāvuú ʻi he 2024. ‘Oku mau houngaʻia ‘i he tokanga ‘a e niʻihi ne nau tauhi kimuʻá pea mo e hokohoko atu ‘a e fengāueʻaki mo e Komiunitī ʻo Kalaisí mo e ngaahi hoa ngāue kehé.

Meʻa ke ʻAmanaki Ki Aí

Ko e ʻApí mo hono konga kelekelé ʻoku toki ʻaʻahi pē ki ai ko ha konga ʻo ha takimamata lahi ange ʻoku kau ai ʻa e Fale Lahí mo e ngaahi mamata holo ʻi tuʻa ʻi he Fale Nāvuú. ʻE hū atu ʻa e kau ʻaʻahí mei he tafaʻaki fakatonga ʻo e falé. ʻOku feʻunga ʻa e kotoa ʻo e aʻusiá mo e miniti ʻe 15.

360° Takimamata ʻi he ʻinitanetí