Faʻitoka ʻo e Fāmili Sāmitá

Ko e Faʻitoka ʻo e Fāmili Sāmitá ʻa e mālōlōʻanga fakaʻosi ʻo e Palōfita ko Siosefa Sāmitá, ko hono uaifi ko ʻEma Heili Sāmitá, mo hono ngaahi tokoua ko Hailamé, Toni Kālosí, mo Samuelá; ko ʻenau ongomātuʻá ko Lusi Meki Sāmita mo Siosefa Sāmita ko e Lahí; mo ha ngaahi kaungāmeʻa mo ha kāinga kehe ʻe toko hongofulu mā fitu. Ko e faʻitoká ko ha feituʻu toputapu ia ‘oku fakaʻilongaʻi ai ‘a e moʻui mo e feilaulau ‘a e fāmili Sāmitá, pea mo ‘enau tui ki he palani taʻengata ‘a e ‘Eikí ki he fakamoʻuí.

Hili hono tāmateʻi ʻo Siosefa mo Hailame ʻi he Fale Fakapōpula Kātesí ʻi he ʻaho 27 ʻo Sune 1844, naʻe fakafoki mai hona sinó ki Nāvū. Hili hono teuteuʻi kinaua ke tanú, naʻe fakaʻeʻepa kinaua ʻi he holo maʻu meʻatokoni ʻo e Fale Lahí (Mansion House), ʻa ia naʻe omi ki ai ha kakai ʻe toko 10,000 ke fai haʻanau fakaʻapaʻapa fakaʻosi. ʻI heʻenau manavasiʻi naʻa maumauʻi ʻe he ngaahi filí ʻa e ongo faʻitoká, naʻe tanu fakafufū ai ʻe he ngaahi kaungāmeʻá hona sinó ʻi he loki ʻi lalo ʻo e Fale Nāvuú ne teʻeki ke ʻosí. Kimui ange ʻi he faʻahitaʻu fakatōlau pe faʻahitaʻu momoko ko iá, naʻe toe hiki fakapulipuli pē ʻa e ongo sinó ʻo tanu ʻi he kelekele ʻo e ʻApi ʻo e Fāmili Sāmitá ʻi lalo ʻi ha kiʻi fale ʻi tuʻa.

Laukonga fekauʻaki mo e fakapoongi ʻo Siosefa mo Hailame Sāmitá ʻi he Kau Māʻoniʻoní, Voliume 1, Vahe 44.

Ko e Faʻitoka ʻo e Fāmili Sāmitá ko ha faʻitoka fakataautaha. ʻOku fakaava ia ki he kakaí ʻi he houa ʻe 24 he ʻaho ko ha aʻusia ʻoku tataki pē ʻe kita ʻi he fengāueʻaki mo e fāmili Sāmitá. ʻOku mau houngaʻia ʻi he tauhi lelei mo e hokohoko atu ʻo e fengāueʻaki ʻoku fakafofongaʻi ʻe he hoa ngāue ko ʻení.

Meʻa ke ʻAmanaki Ki Aí

Ko e Faʻitoka ʻo e Fāmili Sāmitá ko ha aʻusia ia ʻoku tataki pē ʻe kita. ʻOkú ke tauʻatāina ke ke luelue holo ʻi he faʻitoká ʻo sio ki he ngaahi maka fakamanatú. ‘Oku tokangaʻi fakalelei ‘a e fa‘itoká pea tauhi ia ko ha fa‘itoka fakahisitōlia. Kātaki ʻoua naʻa ueʻi ʻa e ʻū maka fakamanatu kuo tō pe mafahí; ʻe lava ke fakatupunga ha maumau lahi ange ʻi hono hiki iá.

360° Takimamata ʻi he ʻinitanetí