Ang Bahay

Kasunod ng mahalagang pangyayari sa kanilang buhay sa Ohio at Missouri, ang Bahay ng Pamilya Smith ay naging kanlungan ng pamilya Smith. Dito si Propetang Joseph Smith ay tumanggap ng mga paghahayag at nagturo ng bagong doktrina sa kanyang pamilya at sa mga miyembro ng Simbahan. Sa kanilang bagong tahanan, si Joseph ay gumugol ng oras kasama ng kanyang asawa at mga anak sa pagbuo ng isang komportableng buhay habang patuloy siyang naglingkod bilang pinunong propeta.

Sina Joseph at Emma Smith at kanilang apat na anak ay lumipat sa kanilang unang bahay sa Nauvoo noong ika-10 ng Mayo, 1839. Ang bahay na yari sa troso na may dalawang kwarto at ang lote sa paligid ay dating pagmamay-ari ng pamilya ni Captain James White, isa sa mga unang naniharan sa lugar. Si Joseph Smith Sr. ay nanirahan sa isang maliit na silid na yari sa troso na idinagdag sa Bahay bago lumipat sa isang bagong bahay sa tapat. Noong 1840, pinalaki ng pamilya Smith ang bahay, kung saan nagdagdag sila ng isang malaking kwarto sa hilaga. Ang bahay ay pinalaki pa at dinagdagan ng dalawang-palapag na karagdagang istruktura kalaunan. Sa bodega, na nakatago sa isang sikretong espasyo sa ilalim ng hagdanan ay isang kwarto kung saan si Joseph ay nagtago mula sa kanyang mga kaaway noong Taglamig ng 1842.

Hindi nagtagal mula nang lumipat ang mga Smith sa bahay na ito noong 1839, ang komunidad ng Mga Banal sa lugar ay nagkasakit at ang sakit ay ikinalat ng mga lamok. Dahil ang kanilang bahay ay isa sa kakaunting permanenteng istruktura sa bayan, dinala roon nina Joseph at Emma ang maraming may sakit. Inilipat nila ang kanilang pamilya sa isang tolda sa labas at ginawa nilang ospital ang kanilang bahay. Noong tag-init, pagkatapos gumaling sa pagkakasakit, ginamit ni Propetang Joseph ang kapangyarihan ng priesthood para pagalingin ang Mga Banal na may sakit. Kalaunang ginugunita bilang “araw ng kapangyarihan ng Diyos,” ang mahimalang pagpapagaling na ito ay nagsimula sa Bahay ng Pamilya Smith.

Basahin ang tungkol sa araw ng pagpapagaling sa Nauvoo sa Mga Banal, Tomo 1, Kabanata 34.

Ang Bahay ng Pamilya Smith ay naging pag-aari at pinangasiwaan ng Community of Christ bilang bahagi ng Joseph Smith Historic Site. ito ay inilipat sa Historic Nauvoo noong 2024. Nagpapasalamat kami sa pag-iingat na ginawa ng mga dating nangangalaga at para sa patuloy na pakikipagtulungan ng Community of Christ at ng iba pang mga kasama.

Ano ang Aasahan

Ang Bahay ay binibisita lamang bilang bahagi ng mas malaking tour na kinabibilangan ng Mansion House at labas ng Nauvoo House. Ang mga bisita ay papasok sa timog na bahagi ng gusali. Ang buong karanasan ay tatagal nang mga 15 minuto.

360° Walkthrough