Ang Nauvoo House

Noong Ika-19 ng Hunyo, 1841, si Joseph Smith ay nakatanggap ng paghahayag mula sa Panginoon, na nag-uutos sa mga Banal na magtayo ng isang malaking boarding house na tatawaging Nauvoo House. Ang gusali ay itinayo kasabay ng Bahay ng Panginoon (ang Nauvoo Temple) at nilayong magbigay ng lugar na matutuluyan ng mga nagsisipunta sa lugar upang “pagnilay-nilayan ang kaluwalhatian ng Sion” (Doktrina at mga Tipan 124: 60). Itatayo sa may pampang ng ilog, ang Nauvoo House ay magiging sagisag ng pag-asa, kalusugan, kaligtasan, at kabanalan sa mga magsisidating sa lungsod.

Si Lucien Woodworth ang nagsidensyo ng gusali na magkakaroon ng dalawang malaking bahagi sa magkabilang dulo na ang bawat isa ay 36.58 metro ang haba, 12.19 metro ang lapad, at mahigit 4 na palapag ang taas; kasya rito ang 300 bisita. Sina George Miller, Lyman Wight, John Snyder, at Peter Haws ay nagsilbing mga katiwala ng proyekto, na naglikom ng pera at nangasiwa sa konstruksyon. Ang mga lokal na negosyante at mga miyembro ng Simbahan ay bumili ng mga 50-dolyar na building stock para mapunan ang gastos. Sa isang engrandeng seremonya noong ika-2 ng Oktubre, 1841, nagsimula ang konstruksyon sa paglalagay ng batong panulok sa timog silangan. Ang mga manggagawa ay sabay na itinayo ang Nauvoo House at Nauvoo Temple. Sila ay nagputol ng troso, nagtibag ng bato, at nag-ambag ng kanilang oras sa pagtatayo sa dalawang gusali.

Pagkamatay ni Propetang Joseph Smith, hinikayat ni Brigham Young na ipagpatuloy ang proyekto. Pagsapit ng Taglagas ng 1845, naging malinaw na ang dalawang gusali ay hindi matatapos bago lisanin ng Mga Banal ang lungsod. Itinuon nila ang kanilang mga pagsisikap para matapos ang templo, na nag-iwan ng isang hindi pa tapos na dalawang palapag na gusaling yari sa bato at ladrilyo na walang bubong. Simula noong 1867, kinuha ni Emma Hale Smith at ng kanyang pangalawang asawang si Lewis Bidamon ang mga materyales mula sa hindi natapos na gusali at ginamit ang mga ito para makagawa ng isang boarding house mula sa timog silangang bahagi ng Nauvoo House. Tinawag nila ang bagong gusali na Riverside Mansion at nagdagdag ng isang kuwadra para sa mga kabayo ng mga bisita. Tumira si Emma sa Riverside Mansion sa huling 8 taon ng kanyang buhay bago siya pumanaw noong 1879.

Basahin ang iba pa tungkol sa paninirahan sa Nauvoo, at ang utos ng Panginoon na itayo ang Nauvoo House sa Mga Banal, Tomo 1, Kabanata 35.

Ang Nauvoo House ay naging pag-aari at pinangasiwaan ng Community of Christ bilang bahagi ng Joseph Smith Historic Site. Ang pangangalaga nito ay inilipat sa Historic Nauvoo noong 2024. Nagpapasalamat kami sa pag-iingat na ginawa ng mga dating nangangalaga at para sa patuloy na pakikipagtulungan ng Community of Christ at ng iba pang mga kasama.

Ano ang Aasahan

Bilang bahagi ng mas malawak na tour sa Bahay ng Pamilya Smith, makikita mo ang Nauvoo House mula sa labas.