O Le Fanua

Ina ua mavae le tele o fesouaiga i o latou olaga i Ohaio ma Misuri, sa avea le fanua o le Aiga o Samita ma se sulufaiga saogalemu mo le aiga o Samita. O iinei na maua ai e le Perofeta o Iosefa Samita faaaliga ma aoao atu ai aoaoga faavae fou i lona aiga ma tagata o le Ekalesia. I lo latou fale fou, sa faaalu ai e Iosefa se taimi faatasi ma lona toalua ma le fanau e fausia ai se olaga toafimalie a o faaauau pea lana galuega o se taitai faaperofeta.

Sa siitia atu Iosefa ma Ema Samita ma le la fanau e toafa i lo la uluai fale i Navu i le aso 10 o Me, 1839. O le fale laupapa e lua potu ma le fanua lata ane sa umia muamua e le aiga o Kapeteni James White, o se tasi o uluai tagata na nonofo i le eria. Sa nofo Iosefa Samita le Matua i se tamai potu laupapa na faaopoopo i le Fale a o lei siitia atu i se fale fou i le isi itu o le auala. I le 1840 na faatele ai e le aiga o Samita le fale, ma faaopoopo ai se potu tele i le itu i matu. Sa faatele le fale i se isi faaopoopoga e lua-fogafale i se taimi mulimuli ane. I totonu o le sela, sa tuu ai i se avanoa faalilolilo i lalo ifo o le faasitepu se potu lea sa faaalu ai e Iosefa sina taimi e lafi ai mai ona fili i le Tautoulu o le 1842.

E lei leva ona siitia atu le au Samita i lenei fale i le 1839, ae feagai le nuu o le Au Paia i le eria ma gasegase ma le faama’i na pipisi e ala i namu. Talu ai o lo latou fale o se tasi lea o nai fale tumau i le taulaga, o lea na aumai ai e Iosefa ma Ema le toatele o e mama’i iinei. Sa latou siitia atu lo latou aiga i fafo i se faleie ma liua lo latou fale e avea ma se falemai. O lena taumafanafana, ina ua toe malosi mai i lona foi ma’i, sa faaaoga e le Perofeta o Iosefa le mana o le perisitua e faamalolo ai le Au Paia o e na mamai. Mulimuli ane, na manatuaina o se “aso o le mana o le Atua,” o lenei faamalologa faavavega na amata i le Fanua o le Aiga o Samita.

Faitau atili e uiga i le aso o le faamalologa i Navu i le Au Paia, Voluma 1, Mataupu 34.

O le Fanua o le Aiga o Samita sa umia ma faagaoioia e le Nuu o Keriso o se vaega o le Nofoaga Faasolopito a Iosefa Samita. Na suia i le Navu Iloga i le 2024. Matou te faafetai mo le tausiga a le au tausimea ua mavae ma le faaauau pea ona galulue faatasi ma le Nuu o Keriso ma isi paaga.

O Mea e Faamoemoe i ai

O le Fanua ua na o se vaega o se malaga taamilo tele e aofia ai le Maota Tele ma vaaiga i fafo o le Maota i Navu. O le a ulufale mai tagata asiasi mai le itu i saute o le fale. O le aafiaga atoa e tusa ma le 15 minute.

360° Savali faasolo