Maota Tele

O le Maota Tele o le fale mulimuli lea o Iosefa Samita i Navu. O iinei, sa i ai se ofisa o le perofeta i le fogafale i luga lea sa ia tuuto atu ai lona taimi i lana galuega faalelotu ma faaupufai. O le fale foi o se avanoa e mafai ona i ai o ia faatasi ma uo ma aiga, e galue o se tamā ma se tane a o aofia ai pea ma le nuu.

O Iosefa ma Ema Hale Samita, le la fanau e toafa, ma Lusi Maka Samita, le tina o le perofeta, na siitia atu i le Maota Tele i le aso 31 o Aokuso, 1843. O le Maota Tele na tautuaina ai le tele o manaoga o le Aiga o Samita. Sa auai le fanau a le au Samita ma nisi i le aoga i le Maota Tele. I afiafi, na faafiafia ai e tagata matutua ia malo i pati o le afiafi, siva, ma isi gaoioiga. A o salalau atu le lauiloa o Iosefa Samita i le lalolagi atoa, e toatele tagata asiasi na malaga atu i Navu e saili se avanoa e feiloai ai i le perofeta. A o tausisia e le aiga o Samita ni potu mo le faaaogaina patino, na amata mai ia Ianuari 1844, o le tele o potu sa lisiina atu ia Ebenezer Robinson o le sa faagaoioia se faletalimalo e api ai le toatele o tagata asiasi. Na faaalia e Lusi Maka Samita ia tagata atualalaina Aikupito na faatauina a o i ai le Au Paia i Katelani, Ohaio, mo malo faaaloalogia e naunau e totogi sina pili itiiti.

Ina ua mavae le fasiotia o Iosefa ma Ailama i le Falepuipui o Karefasi i le aso 27 o Iuni, 1844, sa toe aumai o laua tino i le Maota Tele lea sa faanoanoa ai le aiga o Samita ma a latou uo i le maliliu o le au uso; ma saunia tino mo le tanuga. Mo ni nai aso, a o taooto le au uso i pusamaliu i autafa o le tasi ma le isi i le potu tele o le Maota Tele, e faitau afe le Au Paia o Aso e Gata Ai ma isi mai nuu lata ane na o mai e asi ma fai atu se faatofa mulimuli ia Iosefa ma Ailama.

Faitau e uiga i le siitia atu o le aiga o Iosefa Samita i le Maota Tele ma nisi o tagata sa nonofo faatasi ma i latou i le Au Paia, Voluma 1 Mataupu 41.

Faitau e uiga i le toe aumaia o tino o Iosefa ma Ailama i le Maota Tele i le Au Paia, Voluma 1 Mataupu 45.

O le Maota Tele sa umia ma faagaoioia e le Nuu o Keriso o se vaega o le Nofoaga Iloga o Iosefa Samita. Na suia ia Navu Iloga i le 2024. Matou te faafetai mo le tausiga a le au tausimea ua mavae ma le faaauau pea ona galulue faatasi ma le Nuu o Keriso ma isi paaga.

O Mea e Faamoemoe i ai

O le Maota Tele ua na o se vaega o se malaga taamilo e tele atu e aofia ai le Fanua atoa o le Aiga o Samita. Mai le faitotoa i luma, e matamata muamua tagata asiasi i potumoe i le fogafale i luga, ona toe foi lea i le fogafale muamua ma asiasi i se faatusa o le fale e faasino atu ai suiga i le fuafuaga o le fola i le aluga o taimi. O i latou e le mafai ona a’e faaletino i faasitepu e mafai ona vaai i ata o potu i le faatusa. E sosoo atu i ai, e gasolo atu tagata i le potu lautele o le faletalimalo, ona sosoo ai lea ma le potu malolo. O nei potu taitasi e aofia ai se tala e tusa ma le lima minute le umi. A maea le maimoaga, o le a ulufafo tagata mai le umukuka ma o ese atu i fafo mai le faitotoa i autafa.

360° Savali faasolo