O Le Maota i Navu

I le aso 19 o Iuni, 1841, na maua ai e Iosefa Samita se faaaliga mai le Alii na poloaiina ai le Au Paia e fausia se fale mautotogi tele e ta’ua o le Maota i Navu. Sa tatau ona fausia le fale i le taimi lava e tasi ma le Maota o le Alii (o le Malumalu o Navu) ma sa faamoemoe e saunia ai se nofoaga mo i latou e o mai i le eria e “mafaufau ai i le mamalu o Siona” (Mataupu Faavae ma Feagaiga 124: 60). O le tulai ae mai le auvai o le vaitafe, o le Maota i Navu o le a suitulaga i le faamoemoe, soifua maloloina, saogalemu, ma le paia mo i latou e taunuu i le aai.

Na mamanuina e Lucien Woodworth se fale e lua ona itu tetele, e 120 futu le umi, 40 futu le lautele, ma e oo atu i le silia ma le 4 fogafale le umi; o le a lava le avanoa e ofi ai le 300 tagata asiasi. O George Miller , Lyman Wight, John Snyder , ma Peter Haws sa avea ma faatonu o le galuega faatino, sa sailia tupe ma vaavaaia le fausiaina o fale. Sa faatau e faipisinisi ma tagata o le Ekalesia i le lotoifale ni sea o fale ta’i 50 tala e faapaleni ai le tau. I se sauniga maoae i le aso 2 o Oketopa, 1841, na amata ai le fausiaina i le faataatiaina o le maatulimanu i sautesasae. Sa galulue i le taimi e tasi le au faufale i le Maota i Navu ma le Malumalu o Navu. Sa latou tipiina laau, eliina maa, ma ofofua atu e galulue mo fale uma e lua.

Ina ua mavae le maliu o le Perofeta o Iosefa Samita, sa uunaia e Polika Iaga le galuega ina ia faaauau pea. E oo atu i le Tautoulu o le 1845, ua manino lava e le mafai ona faamaeaina fale uma e lua a o lei tuua e le Au Paia le aai. Sa suia taumafaiga i le faamaeaina o le malumalu ma tuua ai se atigi fale fogafale lua o maa ma piliki e lei maea, e leai se taualuga. E amata mai i le 1867, na ave ai e Ema Hale Samita ma lona toalua lona lua, o Lewis Bidamon, ni mea fau fale mai le fale e lei maea ma faaaoga e fausia ai se fale mautotogi i le tulimanu i sautesisifo o le Maota i Navu. Sa latou faaigoaina le fale fou o le Maota i Riverside ma faaopoopo i ai se fale o manu e tuu ai solofanua mo malo faaaloalogia. Sa nofo Ema i le Maota i Riverside mo le 8 tausaga mulimuli o lona soifuaga a o lei maliu o ia i le 1879.

Faitau e uiga i le nuu o Navu, ma le poloaiga a le Alii e fausia le Maota i Navu i le Au Paia, Voluma 1, Mataupu 35.

O le Maota i Navu sa umia ma faagaoioia e le Nuu o Keriso o se vaega o le Nofoaga Faasolopito o Iosefa Samita. Na siitia atu le tausiaina i le Navu Iloga i le 2024. Matou te faafetai mo le tausiga a le au tausimea ua mavae ma le faaauau pea ona galulue faatasi ma le Nuu o Keriso ma isi paaga.

O Mea e Faamoemoe i ai

I le avea ai o se vaega o le malaga taamilo tele i le Fanua o le Aiga o Samita, e mafai ona e vaai i le Maota i Navu mai fafo.