Falepuipui o Karefasi

“Sa matou lagonaina uma e pei sa faatoilaloina e le mana o le pogisa, ma ua lafoa’ia e le Alii Ona tagata. Ua leai lo matou Perofeta ma le Peteriaka!” —Warren Foote¹

Sa tusia e Warren Foote o le Au Paia o Aso e Gata Ai nei upu i lana api talaaga i se tasi aso ina ua uma ona fasiotia e se vaega o tagata faatupu vevesi ia Iosefa Samita ma lona uso o Ailama i le Falepuipui o Karefasi. O upu a Foote ua tuuina mai ai se vaaiga i le faavauvau na lagonaina e le Au Paia o Aso e Gata Ai ina ua mavae le faamaturoina. O le asō, e ala i se vaaiga vavalalata i aso mulimuli o le au uso, ua fesoasoani le falepuipui i tagata asiasi e manatua le perofeta ma le peteriaka.

A o tuputupu a’e Navu mai se taulaga faataufusi i se aai pisi, sa faateleina foi le tetee i le Au Paia o Aso e Gata Ai. O nisi sa popole i le mana o Iosefa Samita i le nuu, o isi sa fefefe i faatosinaga faaupufai a le Au Paia, ae o nisi sa le ioeina aoaoga ma faiga faalelotu—aemaise lava faaipoipoga faaautaunonofo.² Mulimuli ane, na avea le tulaga i Navu ma se tpusa one.

O le faatafunaina o se fale lomitusi na faama’ite ai le tulaga i Navu, ma iu ai i le faamaturo. Sa amata e nisi sa avea ma Au Paia o Aso e Gata Ai sa le fiafia le Nauvoo Expositor, se nusipepa sa faitioina ai le perofeta ma le Ekalesia. Na valaau atu Iosefa Samita mo le faatafunaga o le au faasalalau ina ua uma ona lolomiina e le nusipepa lana lomiga muamua—ma na o le pau lea—o le lomiga.

O le faatafunaga o le falelomitusi na taitai atu ai i se tusi saisai mo le pue faapagotaina o Iosefa ma Ailama i moliaga o le faatupu vevesi ma se faasologa o taualumaga faaletulafono. Mulimuli ane, o le au uso e toalua, o e sa avea ma pulenuu ma sui pulenuu o Navu i lena taimi, na la tuuina atu i la’ua lava i le moliaga o le faatupu vevesi i le faamasinoga a le itumalo i Karefasi, lea na mulimuli ane molia sese ai i la’ua i le taufaalata i le setete o Ilinoi mo le folafola atu o le tulafono faafitafita.³ I le le mafai ai ona talosagaina le tatala i tua, sa la faatalitali ai mo lo la faamasinoga i le Falepuipui o Karefasi.⁴

Ina ua taunuu Iosefa ma Ailama i le Falepuipui o Karefasi i le aso 25 o Iuni, 1844, sa tuu i la’ua i le sela e maualuga atu le puipuiga i le fogafale i luga. Ae peitai, sa na o ni nai itula na la nonofo ai i lenei potu pogisa ae le’i agai atu i lalo i le sela e taofi ai.

O le sela taofia na taga ai nisi o uo e nonofo faatasi ma Iosefa ma Ailama, ma maua ai le mafutaga ma le lagolago. E toavalu alii na nonofo faatasi ma i la’ua i le po o le aso 25 o Iuni.

Ona o le inoino o tagata lautele ia Iosefa Samita, sa manatu ai le leoleo o le falepuipui, o Siaosi Stigall, o le sela o le tagata aitalafu ua matua matautia tele. O le i ai i le fogafale muamua na faigofie ai ona iloa atu le au uso. Sa ia siitia atu Iosefa ma Ailama i le fogafale i luga i le potumoe o le aiga i le aso 26 o Iuni. Sa faatasi atu i ai a la’ua uo o Ioane Teila, Uiliata Risati, Stephen Markham, Dan Jones, ma John Fullmer.

O le aso na sosoo ai, 27 Iuni, na tuua ai e Stephen Markham, Dan Jones, ma John Fullmer le falepuipui e faatino ni feau. Sa nonofo Iosefa ma Ailama, faatasi ai ma Ioane Teila ma Uiliata Risati, i totonu o le potumoe. E itiiti ifo ma le to’a 10 leoleo na puipuia le falepuipui, ma na lamatia ai nei alii e osofa’ia. O lenei puipuiga e le’i lava o le taunuuga o le oti.

E le’i leva ona mavae le 5:00 i le afiafi, ae faalogoina e Iosefa ma ana soa le papa o fana, ma i fafo o le faamalama, na vaaia ai le silia ma le 100 tamaloloa o faapotopoto i fafo.

Sa faanatinati atu le vaega faatupu vevesi i luga o le faasitepu agai i le potumoe.

Sa vave ona faaauupegaina e Iosefa ma Ailama i latou lava i fana, ae o Ioane ma Uiliata sa fetagofi atu i tootoo e puipuia ai i la’ua lava. Sa taufai tulei uma i latou e toafa i le faitotoa ina ia taofia ai le vaega faatupu vevesi mai le tulioso ane i totonu o le potu.

E le’i faavaivai, ae tafana mai e le vaega faatupu vevesi le faitotoa, ma lavea ai le foliga o Ailama ma sa toetoe ina a fasiotia ai loa lava o ia i lena taimi. Sa felelei mai pulusila i le ea a o taumafai nei alii e toatolu e tapuni le faitotoa.

I le taimi o lenei vevesi, sa tamoe atu ai Iosefa i le faamalama, ma le faamoemoe e sola ese. Sa leai se aogā o le taumafaiga, ona sa siomia e tagata faatupu vevesi le falepuipui. A o i ai i le fata o le faamalama, sa ati ni pulusila i lona tino—lua i lona papatua ma le tasi i lalo ifo o lona fatu.

Na pa’ū Iosefa mai le faamalama i le eleele i fafo, ma palasi ai i autafa o le vaieli. Na matuā tugā le taia a le pulufana.

Ina ua mavae le faamaturoina, sa aveina atu tino o Iosefa ma Ailama i le Maota o Navu, o se malaga e tusa ma le 26 maila.

E uiga i le faasologa i le Maota Faapitoa, sa manatua e se tasi molimau:

“Na fetagisi tamaitai i le vaai atu i atigipusa faatauvaa e lua i totonu o taavaletoso, ua ufitia i palanikeke Initia. Sa faasopolia le motu o tagata i le fetagisi, ma oo atu ai i le toatele o tagata mai le Malumalu e oo atu i le fale o le Perofeta. Sa oo ina matua faateleina le oi ma le tagi masusu ma le leotetele, seia oo ina foliga mai le leo o se gogolo o se afā malosi, po o se gogolo ‘o’olo o se asiosio i se mea mamao.”⁵

Na ōmai ni motu o tagata e toatele e faaalia lo latou faaaloalo i le perofeta pele ma lona uso. Sa tanu faalilolilo i la’ua i le fogafale i lalo o le Maota Faapitoa o Navu e le’i mae’a, ae na iu lava ina toe ave i la’ua i le Fanuatanu a le Aiga o le Au Samita.

O le Falepuipui o Karefasi o loo tu o se maafaamanatu ia Iosefa ma Ailama Samita. O i latou o e asiasi mai i aso nei atonu e le gata ina mafaufau i aso mulimuli o le perofeta ma le peteriaka ae faapea foi i lo la’ua talatuu. A tatou faitau i le Mataupu Faavae ma Feagaiga 135:3, na tusia i le mavae tonu ai o le faamaturoina, “[O Iosefa] sa soifua maualuga o ia, ma sa maliu maualuga o ia i luma o fofoga o le Atua ma lona nuu; ma e pei o le toatele o le ʼau faauuina a le Alii i taimi anamua, ua faamaufaailogaina lana misiona ma lana galuega i lona lava toto; ma ua faapea foi lona uso o Ailama.”