Nofoaga o le Ofisa o le Falelomitusi i Initipene

Ia Iuni ole 1831, sa faaali atu ai e le Alii i le Perofeta o Iosefa Samita e faapea, o Viliamu W. Phelps, o se tagata faatoa liliu mai i Katelani, e tatau ona me’i atu i le Itumalo o Siakisone, Misuri:

“E fesoasoani i la’u auauna o Oliva Kaotui e fai le galuega o le lomitusi, ma le filifiliga ma le tusia o tusi mo aoga i lenei ekalesia, ina ia mafai ona maua foi e fanau laiti aoaoga i o’u luma e pei ona ou fiafia i ai” (Mataupu Faavae ma Feagaiga 55:4).

I le mulimulitaia ai o le poloai a le Alii, sa malaga atu ai Phelps i Sinisinati, Ohaio, lea na ia faatauina ai se masini lomitusi ma auina atu ai i Misuri. Ia Iuni o le 1832, sa ia lolomia ai le uluai lomiga o le The Evening and the Morning Star. I le lomiga lenei, sa tautino atu ai e Phelps le faamoemoega o le pepa “o le uo a le tagata, e faatauanau ai o ia e liliu atu i le Atua ma ola ai, ao lei taia e le Alii le lalolagi i le aso sili ma le matautia ona o ana amioleaga.” Na pau le nusipepa faalelotu i le Itumalo o Siakisone, o le The Star, na avatu ai se leo o le Ekalesia i tagata lautele.

O tusiga na lolomiina i le The Star na faateia ai tagata i le lotoifale, o e na fefefe i le faatupulaia o le i ai o le Au Paia o Aso e Gata Ai i le Itumalo o Siakisone. I le aso 20 o Iulai, 1833, sa laga faaleaga ai e nisi o nei tagata le fale, ma tau’ai i le aualatele masini lomitusi ma lomiga.

O le taimi lena, ua maea ona lolomi e Phelps nisi o vaega o le Tusi o Poloaiga, ae sa lei maea le tusi. Sa talitalia e nisi o tagata o le Ekalesia osofaiga saua mai o latou tuaoi ina ia sefe mai itulau o le Tusi o Poloaiga. O nisi o i latou na o le auso o Mary Elizabeth ma Caroline Rollins. Sa la aoina mai itulau o le Tusi o Poloaiga na salalau solo ma lalafi i se togasana lata ane. O nei itulau na tuufaatasia mulimuli ane i totonu o le Mataupu Faavae ma Feagaiga o le 1835.

A o sosola ese le au paia mai le Itumalo o Siakisone, sa toefoi le aiga o Phelps i Ohaio, lea na faaauau ai e Viliamu ona lolomi mo le Ekalesia.

Faitau atili e uiga i le ofisa lomitusi i le Au Paia, Voluma 1, Mataupu 14, 16.

Mea e Faamoemoeina

E ui ua le o toe i ai le ofisa lomitusi, ae ua faailogaina i se maa apamemea lona nofoaga. O iinei na amata ai e tagata ona lolomi kopi o faaaliga a Iosefa Samita e avea o se Tusi o Poloaiga.