Faama ʻO ʻAisake mo Lusi Moalií

Naʻe kau ʻa ʻAisake Moalī ʻi he kau fuofua nofo ʻi Ketilani, ʻOhaioó. Naʻá ne tauhi mo hono uaifi ko Lusí ha faama lahi ʻeka ʻe 80, ʻa ia naʻá na fakaʻatā ki he kāingalotu ʻo ha kolo naʻa nau fekumi ki he Siasi ʻo Kalaisí ʻo hangē ko hono fakamatalaʻi ʻi he Fuakava Foʻoú.

Naʻe kau ʻa ʻAisake mo hono fāmilí ki he Siasí ʻi he taimi naʻe fou atu ai ʻa e kau faifekaú ʻi honau feituʻú, pea naʻe kau foki ha kau mēmipa kehe tokolahi ʻi he kolo ko iá. Naʻe ʻikai ngata pē ʻi he hoko ʻa e faama lahi ʻa e Fāmili Moalií ko ha feituʻu fakatahatahaʻangá, ka ko ha feituʻu foki ia naʻe maʻu ai ha fakahā pea hoko ko ha hūfangaʻanga kia Siosefa Sāmita.

Hili e kau ʻa e Fāmili Moalií ki he Siasí, naʻa nau fakaʻatā ke nofo ha Kāingalotu tokolahi ange naʻa nau hiki mai ki he ʻēliá, lolotonga iá naʻa nau langa foki ha ʻapi maʻa Siosefa mo ʻEma Sāmita. Neongo naʻe nofo ʻa Siosefa mo ʻEma Sāmita ʻi he ʻapi ko ʻení ʻi ha ngaahi māhina siʻi pē—mei Māʻasi ki Sepitema 1831—ko ha feituʻu ʻeni ʻo e maʻu fakahā.

Lolotonga ʻa e nofo ʻa Siosefa hení, naʻe aʻu ʻo 13 ʻa e ngaahi fakahā naʻá ne maʻu ʻa ia kuo lekooti ʻi he taimí ni ʻi he Tokāteline mo e Ngaahi Fuakavá. ʻI ha kiʻi faleako siʻisiʻi ʻi he konga ʻapí, naʻe kikite ai ʻa Siosefa Sāmita ki ha kau tangata fekauʻaki mo e tupulaki ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻI he fakatahaʻanga tatau, naʻe fakanofo ha kau tangata ʻe toko 23, kau ai ʻa Siosefa Sāmita, ko ha kau taulaʻeiki lahi.

Kuo fakaava ha konga siʻisiʻi ʻo e kelekelé he ʻahó ni, ki he kakaí. Ko e ʻapi ʻoku tuʻu ʻi he taimí ni ʻi he konga kelekelé ʻoku ʻikai ʻatā ki he kakaí, pea ʻoku ʻikai ko e ʻapi ia naʻe nofo ai ʻa e Fāmili Moalií pe Fāmili Sāmitá. Ka neongo ia, ʻe lava ke lue ʻa e kau ʻaʻahí ʻi ha kiʻi halanga nounou ʻoku tahake ki he feituʻu naʻe tuʻu ai ʻa e faleakó.

Laukonga lahi ange fekauʻaki mo e Fāmili Moalií ʻi he Kau Māʻoniʻoní, vōliume 1, vahe 10 mo e 11.

Meʻa ke ʻAmanaki Ki Aí

Ko e Faama Moalií ko ha aʻusia ʻokú te lava ʻo fakahoko ʻiate kita pē, ʻa ia te ke lava ʻo vakaiʻi ʻa e ngaahi feituʻu takatakai ʻi he kelekelé.