ʻApi ʻo Siosefa Sāmita Heʻene kei Siʻí

Naʻe nofo ʻa Siosefa Sāmita ʻi he ʻapí ni ʻi ha taʻu ʻe nima ʻi heʻene kei talavoú. Naʻe hoko heni ha ngaahi meʻa lahi ʻi he kamataʻanga ʻo hono Fakafoki Mai ʻo e Ongoongoleleí. ʻI he ʻapí ni, naʻe ako ʻa Siosefa Sāmita ke ngāue, lau e folofolá, mo lotu mei he ngaahi sīpinga ʻa ʻene ongomātuʻá. Ko e lolotonga e nofo heni ʻa Siosefa Sāmitá naʻá ne fifili ai fekauʻaki mo e tuʻunga ʻo hono laumālié pea mo e siasi ʻoku totonu ke ne kau ki aí. Ko e feituʻu ʻeni naʻá ne fakapapauʻi ai lolotonga ʻene lau e folofolá, ke ne fai ʻa e lotu naʻe iku ai ki heʻene ʻUluaki Mata Meʻa-Hā-Maí. Ko e ʻapi foki ʻeni naʻe ʻaʻahi ai ʻa e ʻāngelo ko Molonaí kia Siosefa Sāmita ʻi he loki ʻi ʻolungá ʻo ʻoange kiate ia ʻa e fakahinohino ki he feituʻu ke maʻu ai ʻa e ʻū lauʻi peleti ʻo e Tohi ʻa Molomoná.

ʻI he faʻahitaʻu momoko ʻo e 1818–19, naʻe hiki ʻa e fāmili Sāmitá ki ha kiʻi fale ʻakau siʻisiʻi ʻi he ngataʻanga ʻo ʻenau faama foʻoú. Neongo ʻoku ʻikai ke tuʻu ʻa e ʻuluaki fale ʻakau totonú, ka naʻe fakahaaʻi ʻe he ngaahi keliʻanga koloá ʻa e feituʻu naʻe tuʻu aí, pea mo ha ngaahi koloa fakakuongamuʻa ʻe 2,000 ʻo fakafuofua ki he taimi naʻe nofo ai ʻa e fāmili Sāmitá. ʻI hono fakaʻaongaʻi ʻo e ngaahi founga, naunau, mo e ngaahi meʻangaue tatau naʻe fakaʻaongaʻi ʻi hono langa ʻo e fale totonú, ʻoku tuʻu he taimí ni ha fale naʻe langa fakatatau ki he fale ʻakaú ʻi he feituʻu totonú.

Naʻe tautautefito e tokanga ʻa e taʻokete ʻo Siosefa Sāmita ko ʻAlaviní, ki he meʻa naʻe ʻilo ʻe Siosefa mei he ngaahi ʻaʻahi mai ʻa Molonaí. Kimuʻa pea mālōlō ʻa ʻAlaviní, naʻá ne talaange kia Siosefa, “ʻOku ou fakaʻamu ke ke hoko ko ha tamasiʻi lelei, pea fai ʻa e meʻa kotoa pē ʻi ho mālohí ke maʻu ʻa e Lekōtí. Faivelenga ʻi hono maʻu mai e fakahinohinó pea tauhi e fekau kotoa pē ʻoku ʻoatu kiate koé” [ʻi he Lucy Mack Smith, History of Joseph Smith, 87]. Naʻe mālōlō ʻa ʻAlavini ʻi he ʻaho 19 ʻo Nōvema 1823, hili pē ia ha māhina ʻe ua mei he fuofua ʻaʻahi ʻa Molonai kia Siosefa Sāmitá. Naʻe maʻu ʻe Siosefa ʻa e lekōtí meia Molonai ʻi he Moʻunga ko Komolá ʻi he 1827.

Laukonga lahi ange fekauʻaki mo e ngaahi meʻa naʻe hoko ʻi he ʻApi ʻo Siosefa Sāmita ʻi heʻene Kei Tamasiʻí ʻi he Kau Māʻoniʻoní, Voliume 1, Vahe 3.

Meʻa ke ʻAmanaki Ki Aí

 ʻOku kau ʻa e ʻApi naʻe tupu hake ai ʻa Siosefa Sāmita ʻi heʻene kei Tamasiʻí (pe Fale ʻAkaú) ʻi he ngaahi feituʻu ʻoku fakahoko ki ai ʻe he kau faifekaú ha takimamata ʻi he ngaahi ʻapi ʻa e Fāmili Sāmitá ʻi he Fāmá. ʻOku kamata ʻa e ngaahi ʻaʻahí ʻi he Senitā Talitaliʻanga ʻo e Vao ʻAkau Tapú.

Vakai takai ʻi he 360°