ʻApi ʻo ʻAisake mo ʻElisapeti Heilí

Ko e ʻapi ʻo ʻAisake mo ʻElisapeti Heilí ko e ʻapi ia ʻo e mātuʻa ʻa ʻEma Heili Sāmitá. Fakafuofua ki he 1810, ʻi he taʻu ono nai ʻa ʻEmá, naʻe hiki ai ʻa e fāmili Heilí mei he fale ʻakau naʻe fāʻeleʻi aí ki he fale papa fakaʻofoʻofa ko ʻení. Ko e feituʻu ia naʻá ne nofo ai ʻi heʻene fuofua feʻiloaki mo Siosefa Sāmita ko e Siʻí.

ʻI he 1790, naʻe nofo ai ʻa ʻAisake mo ʻElisapeti Heili ʻi Hāmoni, Penisilivēnia, ʻa ia naʻe fakatau ai ʻe ʻAisake ha faama ʻeka ʻe 100. ʻI he taʻu ʻe 20 hono hokó, naʻe ngāue ai ʻa e fāmili Heilí ke faʻu ʻenau fāmá (ʻa ia naʻe tupu ʻo aʻu ki ha ʻeka ʻe 150), langa ha kiʻi fale ʻakau, pea tā tongitongi ha fale ʻo nofo ai ʻi he feituʻu maomaonganoa ʻi Penisilivēniá. Naʻe fokotuʻu foki ʻe ʻAisake ha pisinisi lelei ko ha tokotaha tuli manu, pea fakatau atu ha ngaahi kakanoʻi manu mo e koloa ngaohi mei he letá. Naʻá ne tutuʻu papa, fakateka e fanga sipí, pea tānaki mo e huhuaʻi māpelé mo e suká. Naʻe fāʻeleʻi ʻe ʻElisapeti ha ngaahi foha ʻe toko nima mo e ngaahi ʻofefine ʻe toko fā ʻi he ngaahi fuofua taʻu ko iá. Fakafuofua ki he 1810, naʻe hiki ai ʻa e fāmili Heilí ki ha ʻapi fungavaka ua ne toki langa ofi mai pē ki honau fale ʻakaú. Ko e ʻapi lolotongá ko hano toe langa foʻou ia ʻo e ʻapi ʻo e fāmili Heili totonú ʻi he feituʻu tatau naʻe tuʻu ai ʻa e ʻapí.

Naʻe fuofua fetaulaki ʻa Siosefa Sāmita ko e Siʻí mo e fāmili Heilí ʻi ʻOkatopa ʻo e 1825 ʻi he taimi naʻe fakangāueʻi ai ia mo ʻene tamaí ʻe Sosaia Sitoeli ke tokoni ki he keli silivá ʻi he feituʻu ko iá. Naʻe fakaʻatā ʻe ʻAisake Heili ʻa e kau ngāue ʻa Sosaia Sitoelí ke nau nofo ʻi he fale ʻakau motuʻá ʻi hono ʻapí ʻi ha uike nai ʻe tolu. Lolotonga e taimi ko ʻení, naʻe fuofua fetaulaki ai ʻa Siosefa pea kamata ke ne ʻeva ki he ʻofefine ʻo ʻAisake Heilí ko ʻEma. Lolotonga e faʻahitaʻu hono hokó, naʻe ʻoange ai ʻe Sosaia Sitoeli kia Siosefa Sāmita ko e Siʻí ha ngāue kehe ʻi heʻene fāmá ʻi Kolesivili, Niu ʻIoke, ke fakaʻatā ʻa Siosefa mo ʻEma ke hoko atu ʻena faikaumeʻá. Naʻá na mali ʻi Sānuali 1827.

Hili ʻena malí, naʻá na fuofua nofo mo e fāmili ʻo Siosefá ʻi Manisesitā, Niu ʻIoke. Hili ha taimi nounou mei hono maʻu ʻe Siosefa ʻa e ʻū lauʻi peleti koulá, naʻá ne hiki mo ʻEma ki Hāmoni ʻo fakatau ai ha ʻapi mei he fāmili ʻo ʻEmá.

Laukonga lahi ange fekauʻaki mo e taimi ʻo Siosefa ʻi he ʻApi ʻo e Fāmili Heilí ʻi he Kau Māʻoniʻoní Voliume 1, Vahe 4.

Meʻa ke ʻAmanaki Ki Aí

ʻOku hoko ʻa e ʻApi ʻo ʻAisake mo ʻElisapeti Heilí ko ha konga ʻo e takimamata ʻoku fai ʻi he Feituʻu ne Fakafoki Mai Ai e Lakanga Fakataulaʻeikí. ʻOku kamata ʻa e ngaahi ʻaʻahí ʻi he Senitā Takimamatá. Te ke vakaiʻi ʻi he lolotonga ʻo e ʻaʻahí ʻa e peitó, loki feleokó, mo e ngaahi loki mohé.

360 ° Walkthrough