ʻApi ʻo Uiliami mo ʻĒseta Kiiní

ʻI he ʻapí ni, naʻe fakatapui ʻe he fāmili Kiini ʻenau moʻuí ki hono langa hake ʻo Saioné. Naʻe foaki ʻe Uiliami ʻa e vahe hongofulu kotoa pē ʻo ʻene ngāué ke tokoni ʻi hono langa ʻo e temipalé ʻaki ʻene ngāue ʻaki e fanga hōsí ke ʻave ha maka keli ki he feituʻu naʻe fai ai e langá. Naʻe kau ʻa ʻĒseta ki he Kautaha Fineʻofa ʻa e Kakai Fefiné ʻi he 1842. Naʻá ne foaki mo ʻene fānaú ki he tānaki sēniti ʻe taha naʻe fai ʻe he Fineʻofá ke tānaki ha paʻanga ki hono langa ʻo e temipalé.

Naʻe papitaiso mo hilifakinima ʻa Uiliami mo ʻĒseta Kiini ko e ongo mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻi he 1839 ʻi Penisilivēnia. ʻI he 1842, fakataha mo e fāmili Hanitaá, naʻe hiki ai ʻa Uiliami, ʻĒseta, mo ʻena fānau ʻe toko onó ʻi ha maile ʻe 900 mei he Vahefonua Sesitā, Penisilivēniá ki Nāvū, ʻIlinoisi. Naʻa nau fakatau ha konga kelekele ʻeka ʻe taha ʻi lalo pē ʻi he kiʻi tafungofunga mei he feituʻu ʻo e temipalé pea langa honau ʻapi piliki ʻi ai. ʻI Tīsema ʻo e 1844, naʻá na foaki ai ʻa e vaeua ʻo ʻena konga kelekele ʻeka ʻe tahá ko e vahehongofulu. Naʻe nofo ʻa e fāmili Kīní ʻi he ʻapí ni mei he 1842 ki he 1846.

Lolotonga ʻenau nofo ʻi he ʻapi ko ʻení, naʻe faitāpuekina e fāmili Kīní ʻe he ngaahi ouau ʻo e temipalé. ʻI he 1843, naʻe ʻalu tuʻo ua ai ʻa Uiliami mo ʻĒseta ki he faiʻanga papitaiso ʻi he temipalé ke na papitaiso maʻá e kau mēmipa ʻo hona fāmilí naʻe pekia kuo teʻeki ke nau maʻu ʻa e ongoongolelei kuo fakafoki mai ʻo Sīsū Kalaisí. Hili e mālōlō fakafokifā ʻa Uiliami ʻi Sune 1845, naʻe kei faivelenga pē ʻa ʻĒseta. Naʻá ne maʻu hono ʻenitaumení ʻi he Temipale Nāvuú, ʻi Tīsema 1845 pea naʻe silaʻi ia ki he taʻengatá ʻi he ouau fakafofonga ki hono husepāniti kuo pekia ko Uiliamí ʻi he ʻaho 2 ʻo Fēpueli, 1846.

Lau fekauʻaki mo e ngāue fakataha ʻa e Kāingalotú mo ʻenau ngaahi faingataʻaʻiá ʻi hono langa ʻa e Temipale Nāvuú, kau ai ha fakamatala ʻo e loto-fiemālie ʻa ʻĒseta Kiini ke foaki ʻa e filo naʻá ne takai pē ʻe iá, ʻi he Kau Māʻoniʻoní, Voliume 1, Vahe 41.

Meʻa ke ʻAmanaki Ki Aí

Ko e ʻApi Kīní ko ha takimamata loki ua ia ʻoku kau ai ʻa e loki kaí mo e loki talanoá. Hili ʻa e takimamata ʻo e ʻApi Kīní, ʻoku ʻatā ke ke vakaiʻi ʻa e toenga ʻo Nāvuú.

Vakai takai ʻi he 360°