Pavilione Maka ʻo e Temipalé

ʻOku tuʻu ʻa e pavilioné ʻi ha vaeua ʻeka kelekele naʻe nofoʻi ʻi ha taimi ʻe taha ʻe he fāmili Sōnasí ʻa ia naʻa nau nofo heni mei he 1841 ki he 1846. Naʻe kau ʻa e kau Sōnasí ki he kolo fuakava ʻo Nāvuú. Hangē ko e niʻihi kehé, naʻa nau fai ha ngaahi feilaulau maʻongoʻonga ke tokoni ʻi hono langa ʻo e Fale ʻo e ʻEikí ʻi he ngaahi taʻu ʻo e 1840 tupú. ʻI he ʻahó ni, ʻoku fakaʻaongaʻi ʻe ha pavilione faiʻanga ʻekitivitī ʻa e ngaahi meʻangāue fakaonopōní ke fakaʻaliʻali ʻaki ʻa e ngāue ki hono keli, fakafuo mo fokotuʻu ʻa e maka naʻe fakaʻaongaʻi ki hono langa ʻo e Temipale Nāvuú.

Naʻe mali ʻa Viliami mo ʻIlisapeti Sōnasi ʻi he 1825, ului ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní lolotonga ʻena nofo ʻi Sinisinatí, pea hiki ki Nāvū ʻi he aʻu ki he Tīsema ʻo e 1840. Naʻe fāʻeleʻi ʻe ʻIlisapeti ʻena fānau fika hongofulu ma taha mo fakaʻosí lolotonga ʻenau nofo ʻi he ʻapi ko ʻení.

Ko Viliami Sōnasí ko ha taukei ia ʻi he tā tongitongi maká ʻa ia naʻá ne fakafuo e ʻuluaki maka māhina ki he Temipale Nāvuú. Ko Viliamí mei he Kolo Pilisitoló (ʻa ia naʻe hoko kimui ko e konga ʻo Filatelafia), Penisilivēnia, pea naʻe fāʻeleʻi ʻa ʻIlisapeti ʻi Niu ʻIoke Siti, Niu ʻIoke. Naʻe kau ʻa ʻIlisapeti Sōnasi ki he Houʻeiki Fafine Fineʻofa ʻo Nāvuú ʻi heʻenau fuofua fakataha ʻi he 17 ʻo Māʻasi, 1842. Naʻe fakamafaiʻi ʻa ʻIlisapeti ke ne tānaki ha ngaahi foaki maʻá e Fineʻofá ʻa ia naʻe tokoni ki hono fakapaʻanga ʻo hono langa ʻo e temipalé pea naʻá ne toe tokoniʻi foki mo e kau ngāue ʻo e temipalé ʻaki hano monomono ʻo e ʻū soté. ʻI he ʻaho 31 ʻo Sānuali 1846, naʻe maʻu ai ʻe Viliami mo ʻIlisapeti Sōnasi hona ʻenitaumení ʻi he Temipale Nāvuú.

Meʻa ke ʻAmanaki Ki Aí

Ko e Pavilione Maka ʻo e Temipalé ko ha feituʻu fengāueʻaki ia mo e ngaahi ʻekitivitī hangē ko hono kili, tongitongi, fakahamolemoleʻi, mo hiki hake ʻa e maka lahé. ʻE ʻoatu ʻe he kau faifekaú ʻa e ngaahi matasioʻata maluʻi mo e kofunima, pea ko kinautolu kuo pau ke nau tokangaʻi ʻa e ngaahi ʻekitivitií.