Tuʻuʻanga ʻo e Temipale Hihifo Mamaʻó

ʻOku fakaʻilongaʻi ʻe he Tuʻuʻanga ʻo e Temipale Hihifo Mamaʻó ʻa e lotomālie ʻo e feituʻu naʻe hoko ko ha kolo lahi naʻe nofoʻi ʻe ha lauiafe. Neongo naʻe ʻikai pē ke toe ʻosi ʻa e temipalé, ka ko ha feituʻu mahuʻinga ia ki he fuofua Kāingalotú. Ko e fē pē feituʻu ne nofo ai e Kāingalotú, naʻe fakahā ʻe he ʻEikí ʻa e feituʻu ki ha temipale ʻo fakafou ʻi Heʻene palōfitá, ʻo angamaheni ke ʻi he lotomālie ʻo e koló. ʻI he ʻahó ni, ʻoku fakamanatu ʻe ha maka fakamanatu mo e ngaahi makatuliki ʻe fā ʻo e temipalé ʻa e ngāue e Kāingalotú ke fokotuʻu ha siteiki ʻo Saione pehē ki he ngaahi fakahā naʻe maʻu aí.

Hili hono fakaʻauha ʻe he kau fakatangá ʻa e ngaahi ngāue ke langa ha ngaahi temipale ʻi Tauʻatāina, Mīsuli, ʻi he 1833, naʻe tokanga taha e Kāingalotú ki heʻenau ngāue langá ʻi he fale ʻo e ʻEikí ʻi Ketilani, ʻŌhaioó. Naʻe kakato mo fakatapui ʻa e Temipale Ketilaní ʻi he ʻaho 27 Māʻasi , 1836. ʻI he 1838, naʻe fekauʻi ʻe he ʻEikí ke langa ha temipale foʻou ʻi he lotomālie ʻo Hihifo Mamaʻo ʻi he Vāhenga Kalatiuela, Mīsulí. ʻI he ʻaho 4 ʻo Siulai, 1838—ʻi he ʻAho Tauʻatāiná ʻi he ʻIunaiteti Siteití—naʻe tokangaʻi ʻe Siosefa Sāmita ʻa e ouau ki hono fakatoka e ngaahi makatuliki ʻe faá ʻi he tapafā fakapuleʻangá ʻi he lotolotonga ʻo e kolo tupu tokolahí. Naʻe fakamoʻoni ha kau mamata ʻe lauiafe ki he ouaú.

Naʻe taimi nounou pē ʻa e ngaahi ngāue ki he langa ʻa e temipalé. Naʻe tupu mei he fekīhiaki mo e kau Mīsuli fakalotofonuá ʻa hono liʻaki ʻe he Kāingalotú ʻa Hihifo Mamaʻo ʻi Nōvema 1838. Hili ha lau māhina mei he mavahe ʻa e konga lahi ʻo e Kāingalotú, naʻe foki ha kau mēmipa ʻe toko nima ʻo e Kōlomu ʻo e Kau ʻAposetolo ʻe Toko Hongofulu Mā Uá mo ha niʻihi kehe ki he tuʻuʻanga ʻo e temipalé, ko ʻenau talangofua ki ha fekau mei he ʻEikí (vakai Tokāteline mo e Ngaahi Fuakava 115:11; 118:5). ʻI he ʻaho 26 ʻo ʻEpeleli, 1839, naʻe foki ai ʻa e kau ʻAposetoló ki he tuʻuʻangá ʻo fakanofo ʻa Uilifooti Utalafi mo Siaosi A. Sāmita ke ngāue ʻi he ngaahi lakanga ʻatā ʻi he kōlomú lolotonga ʻena talitali ki ha misiona ki Pilitānia Lahi.

Laukonga lahi ange fekauʻaki mo e taimi ʻa e Kāingalotú ʻi Hihifo Mamaʻó ʻi he Kau Māʻoniʻoní, voliume 1, vahe 24–33.

Ko e Meʻa ke ʻAmanaki Ki Aí

ʻOku kau ʻi he Tuʻuʻanga ʻo e Temipale Hihifo Mamaʻó ha feituʻu ʻoku ʻaaʻi mo ha maka fakamanatu ke fakamanatu e ngaahi meʻa naʻe hoko aí. Ngaahi falemālōlō, ko ha ʻēlia kaimeʻakai, mo ha faama ʻokú ne ʻātakaiʻi e ʻēlia ʻoku ʻaaʻí. ʻOku ʻikai ha senitā maʻá e kau ʻaʻahí mo ha kau faifekau, ko ia ai, ko e ngaahi aʻusia kotoa pē ʻi he tuʻuʻangá, ʻoku takitaha ʻalu pē. Kumi ʻa e ngaahi makatuliki ʻe fā ʻo e temipalé ʻi loto ʻi he ʻēlia ʻoku ʻaaʻí. ʻOku nofo e kau ʻaʻahí ʻi he tuʻuʻangá ʻi he meimei miniti ʻe 30.