Hihifo Mamaʻó

Ko e tuʻuʻanga ʻo e kolo Hihifo Mamaʻó ʻoku tuʻu ʻi he houa ʻe taha fakatokelau hahake ʻo Tauʻatāina, Mīsulí. Neongo kuo fuoloa hono toʻo e ngaahi fale mo e nofoʻangá, ka ʻoku fakaʻilongaʻi ʻe he Tuʻuʻanga ʻo e Temipale Hihifo Mamaʻó ʻa e uhouhonga ʻo e meʻa ne ʻamanaki e Kāingalotú ʻe hoko ko ha siteiki lahi ʻi Saione. ʻOku ʻomi ʻe he feituʻu kuo tō ngoue ʻi he ʻātakai ʻo e tuʻuʻangá ha feituʻu nonga
ke fakalaulauloto ai ki heʻenau ngaahi feilaulau ke langa ʻa Saioné.

Hili hono tuli kinautolu mei he Vāhenga Siakisoni, Mīsulí, naʻe fiemaʻu ʻe he Kāingalotú ha feituʻu fakatahatahaʻanga foʻou. Neongo ne nau movete ʻi he ngaahi vāhenga kaungāʻapí, naʻa nau kei ʻamanaki mo feinga ke langa ʻa Saione. Ka neongo ia, ne kei hohaʻa pē honau ngaahi kaungāʻapi Mīsulí kau ki he Kāingalotú. ʻE uesia fēfē nai ʻe heʻenau ngaahi tuí mo e tukufakaholó ʻa e kakai fakalotofonuá? Naʻe ʻi ai nai ha solovaʻanga maʻá e ongo tafaʻakí fakatouʻosi?

ʻI he 1836, naʻe faʻu ʻe he kau faʻu lao ʻo e siteiti ʻo Mīsulí ʻa e Vāhenga Kolotiuelá pea vaheʻi ia ko ha feituʻu maʻá e Kāingalotú ke nau nofo ai. Ko Hihifo Mamaʻo ʻa e feituʻu ne nofoʻi lahitaha mo ʻi ai e ngaahi fale fakapuleʻanga maʻá e vāhengá kotoa. ʻI he aʻu ki he 1838, kuo tupu ʻa Hihifo Mamaʻo ʻo fakalaka ʻi he konga kelekele sikuea kilomita ʻe 2.5 ʻo tānaki mai mo a toe sikuea kilomita ʻe 5, pea fakafuofua ki he toko 5,000 naʻe nofo aí.

Naʻe hiki ʻa Siosefa Sāmita ki Hihifo Mamaʻo ʻi Māʻasi 1838. ʻI he māhina ʻe valu hono hokó, naʻe liliu e hetikuota ʻo e Siasí mei ʻŌhaiō ki Mīsuli. Naʻe fakahā ʻe he ʻEikí kia Siosefa Sāmita ha ngaahi fakahā ʻe fitu ʻi Hihifo Mamaʻo ʻa ia ne hoko kimui ko he vahe ʻo e Tokāteline mo e Ngaahi Fuakavá. ʻOku kau ʻi he ngaahi fakahā ko ʻení ʻa e fakahinohino ki he hingoa ʻo e Siasí (Tokāteline mo e Ngaahi Fuakava 115), ko e taumuʻa ʻo e ngaahi siteikí (Tokāteline mo e Ngaahi Fuakava 115), ko e fono ʻo e vahe hongofulú (Tokāteline mo e Ngaahi Fuakava 119), pea mo ha fekau ki he Kōlomu ʻo e Toko Hongofulu Mā Uá ke malanga ʻaki e ongoongoleleí ʻi ʻIulope (Tokāteline mo e Ngaahi Fuakava 118). Tānaki atu ki aí, naʻe fakahinohinoʻi ʻe he ʻEikí ʻa e Kāingalotú ke langa ha temipale ʻi Hihifo Mamaʻo. ʻI he ʻaho 4 ʻo Siulai, 1838, naʻe talangofua e Kāingalotú ki he fekau ʻa e ʻEikí ʻo fakatoka e ngaahi makatuliki ki ha temipale ʻi he lotomālie ʻo e koló.

Naʻe fakaʻau ke holo kovi ange e vā ʻo e Kāingalotú mo honau ngaahi kaungāʻapí ʻi he faʻahitaʻu māfana mo e fakatōlau ʻo e 1838, ʻo iku ai ki hono ʻoatu ʻe Kōvana Poki ha “tuʻutuʻuni fakaʻauha (ko ha tuʻutuʻuni fakaʻofisiale ke mavahe ʻa e kau Māmongá ka ʻikai, ʻe ʻatā ki he kakaí ke tamateʻi kinautolu).” ʻI ʻOkatopa 31, 1838, naʻe puke pōpula ai ʻe he kau sōtia Mīsulí ʻa e kau taki ʻo e Siasí, kau ai ʻa Siosefa mo Hailame Sāmita. ʻI he ʻaho hono hokó, naʻe tukulolo ʻa e koló, pea toʻo fakamālohiʻi ʻe he kau sōtiá ʻa e ngaahi koloá, ʻapí, mo e kelekelé. ʻI he lotolotonga ʻo e moveuveu ko ʻení, naʻe fāʻeleʻi ai ʻe Mele Filitingi Sāmita ko e uaifi ʻo Hailamé, ʻa Siosefa F. Sāmita, ko e palesiteni hono ono ʻo e Siasí, ʻi hono ʻapi ʻi Hihifo Mamaʻó.

Koeʻuhi ko e fakamamahi ko ʻení, naʻe liʻaki ʻa Hihifo Mamaʻo ʻe he tokolahi taha ʻo e Kāingalotú ʻi ʻEpeleli 1839, ʻo tuenoa ai ʻa e koló. Ko e ngaahi makatuliki pē ʻe faá naʻá ne fakaʻilongaʻi ʻaki e tuʻuʻanga ʻo e temipalé. ʻI hono fakahoko e fekau ʻa e ʻEikí, naʻe foki ha kau ʻAposetolo ʻe toko fitu ki Hihifo Mamaʻo ʻi he ʻaho 25 ʻo ʻEpeleli, 1839, ʻo fakatapui ʻa e tuʻuʻangá kimuʻa pea nau mavahe ki honau misiona ʻi ʻIulopé.

ʻI he 1840, naʻe foki ai ʻa Sione Uitemā ki Hihifo Mamaʻo ʻo fakatau ʻa e kelekele naʻe kau ai ʻa e kelekele ʻo e temipalé. Naʻá ne nofo ai ʻi ha taʻu ʻe 38 pea tanu ia ʻo ofi ʻi Kingisitoni. Naʻe fakatau ʻe he Siasí ʻa e kelekelé mei he fāmili Uitemaá ʻi he 1909. ʻI he 1968, naʻe fakatapui ha maka fakamanatu ʻi he kelekele ʻo e temipalé. ʻOku ʻi ai ha ʻū tēpile kai mo e falemālōlō ʻi he feituʻu ko ʻení.

Laukonga lahi ange fekauʻaki mo Hihifo Mamaʻo mo e kakai naʻe nofo aí, ʻi he Kau Māʻoniʻoní Voliume 1, Vahe 24-33.