ʻI he 1831, naʻe kamata ke hiki ʻa e Kāingalotú ki Mīsuli. Lolotonga e taʻu e valu hono hokó, naʻa nau muimui ki he fakahā fakalangi ke faʻu ha kolo ʻo e kakai tuí ʻo fakatatau ki he sīpinga ʻo e kolo ʻo ʻĪnoké ʻi he kuonga muʻá. ʻI he lolotonga ʻenau ngāué, naʻa nau fetaulaki mo e fakatangá mei honau ngaahi kaungāʻapí. Naʻe hanga ʻe he fetāʻaki mei tuʻá mo e fepakipaki ʻi loto ʻi he Siasí ʻo fakamālohiʻi ʻa e kakaí ke nau hiki mei he vahefonua ki he vahefonua ʻo toe kamata foʻou hake ai ʻI hono fakaʻosí, naʻe tuʻutuʻuni ʻe he kōvaná ki he Kaingalotu kotoa pē ke mavahe mei Mīsuli. Koeʻuhi koe tuli ko ʻení, ko ha kiʻi konga siʻi pē ʻo e ngaahi ʻapi, ngaahi faama, mo e ngaahi pisinisi naʻa nau fokotuʻú ʻoku kei tuʻu he ʻaho ní. Ka neongo ia, naʻe hanga ʻe he founga hono fakamālohia ʻo e tuí ʻaki ʻa e tui neongo e fakatangá ʻo langaki ha falala moʻoni kia Sisu Kalaisi mo ueʻi hake ha mahino lahi ange fekauʻaki mo e ʻuhinga ʻo hono langa ʻo Saioné ʻi hotau kuongá.

Kamata ʻi he senitulu uofulú, naʻe fokotuʻu ai ʻe he Siasí ha ngaahi fakaʻaliʻali mo ha ngaahi maka fakamanatu ʻi Tauʻatāina, Hihifo Mamaʻo, ʻĀtama-ʻonitai-ʻĀmani, Lisimoni, mo Lipetī. Kuo ngāue fakataha ha niʻihi mo e Siasí ke langa ha ngaahi maka fakamanatu mo fakaʻilongaʻi ha ngaahi faʻitoka ʻi ha ngaahi feituʻu kehe. ʻI hono fakakātoá, ʻoku fakahaaʻi ʻe he ngaahi feituʻu fakahisitōlia ko ʻení ʻa e mateaki, loto toʻa, mo e ngaahi feilaulau ʻa e fuofua Kaingalotú ʻi hono moʻuiʻaki ʻo e ongoongolelei ʻo Sīsū Kalaisí. ʻE lava ke ako lahi ange ʻe kinautolu ʻoku nau ʻaʻahi ki he ngaahi feituʻu toputapu ko ʻení fekauʻaki mo e ngaahi talanoa ʻo e tuí, vilitakí, mo e ʻamanaki leleí ʻa ia ʻoku kei mahuʻinga ki he hisitōlia ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimuí Ní.