Fairport Harbor

Daghang Santos nga mibiyahe sa Ohio gikan sa kasadpang New York mibiyahe agi sa Fairport Harbor. Sa kadugayan, samtang ang mga Santos mibiya para sa mga misyon gikan sa Kirtland, ang pipila miagi sa Fairport Harbor padulong sa amihanan ug silangan nga mga dapit sa Kirtland aron sa pagsangyaw sa ebanghelyo. Sa dihang ang lola ni Joseph Smith nga si Mary Duty Smith mibisita sa iyang pamilya sa Ohio, gisugat siya sa iyang apo nga propeta didto sa Fairport Harbor.

Ang Fairport Harbor misangkap sa ekononiya sa amihanang silangan sa Ohio nga may nakatutok nga koneksiyon ngadto sa mga komersiyo sa mas establisado na nga Silangan. Gikan niini nga dunggoanan, ang mga barko makabalikbalik og biyahe sa mga katubigan sa Lake Erie ngadto sa Buffalo, the Erie Canal, ug sa kataposan ngadto sa Pittsburgh, Philadelphia, Boston, Washington, DC, ug sa Siyudad sa New York. Ang lokal nga mga negosyante, lakip na ni Joseph Smith ug ni Newel K. Whitney, magpadala ug makadawat og mga palaliton pinaagi sa Fairport Harbor. Sama pananglit, si Whitney posibling nakadawat og mga produkto nga igbabaligya sa iyang tindahan ug mitumod og kinahon nga abo gikan sa Kirtland Ashery agi sa Fairport Harbor.

Karon, adunay timaan nga nagbarog duol sa atubangan sa Marine Museum ug Parola sa Fairport Harbor. Ang usa ka eksibit sa sulod sa Marine Museum nga giulohan og “Fairport Harbor: Ganghaan ngadto sa Pundokanan” nagpasidungog sa papel sa Fairport Harbor sa mga kinabuhi sa mga Santos samtang didto pa sa Kirtland.

Unsay Malaoman

Ang Fairport Harbor usa ka gamayng lungsod nga adunay buhong nga kasaysayan. Ang usa ka timaan nga naghisgot sa kamahinungdanon niini nga dapit ngadto sa mga Santos sa Ulahing mga Adlaw makita diha sa amihanang kasadpan nga eskina sa 2nd ug High Streets.