Newell K. Whitney Ashery

Niadtong 1824, si Newel K. Whitney mitukod og ashery sa mga patag sa Kirtland. Ang ashery gipadagan sa iyang kasosyo sa negosyo nga si Sidney Gilbert hangtod si Gilbert mibiya padulong sa Missouri niadtong 1831. Si Whitney mikuha og daghang aktibo nga tahas sa pagpadagan sa ashery hangtod sa 1832, dihang iyang gidonar ang ashery ngadto sa Simbahan. Ang kwarta nga gikan sa ashery nakatabang sa pagbayad sa mga utang, sa paggasto sa pagtukod sa templo sa Kirtland, ug pagprinta sa literatura sa Simbahan. Ang pagpadayag nga nadawat niadtong Abril 23, 1834, mipabalik sa ashery ngadto ni Whitney isip kabahin sa iyang “pagkatinugyanan” ug isip “panalangin diha kaniya ug sa iyang binhi nga nagsunod kaniya” (Doktrina ug mga Pakigsaad 104:39–40).
 
Ang mga ashery komon sa utlanan sa America. Diha sa mga ashery, ang abo nga gikan sa gisunog nga kahoy sa dapit ug gipundok sa duol nga mga panimalay gihimong potasa, usa ka alkali nga gigamit sa paghimo og daghang produkto, lakip ang sabon, kolon, ug pampaputi. Salamat sa daghang lain-laing paggamit niini, ang potasa [potash] usa ka bililhon nga produkto nga gibaligya sa taas nga presyo. Isip resulta, daghang magpapatigayon sama ni Newel K. Whitney nanag-iya usab og mga ashery.

Uban sa pagdagsang sa mga Santos nga miabot sa Kirtland, daghang katawhan ang nangita og trabaho, ug ang Whitney Ashery nahimong usa ka dapit diin daghan sa batan-ong mga lalaki ang nakatrabaho. Si Orson Hyde, usa sa orihinal nga mga sakop sa Korum sa Napulog Duha ka Apostoles, nagtrabaho sa Whitney Ashery sa iyang sayong bahin sa pagka-baynte.  
 
Karon ang tukma nga replica sa Whitney Ashery nahimutang sa lokasyon sa orihinal ug lagmit mao lang nga sampol sa gitukod pag-usab nga ashery sa Amihanang America. 

Unsay Malaoman

Ang ashery usa ka opsiyonal nga bahin sa giniyahan nga paglibot nga gitanyag sa mga misyonaryo sa Makasaysayanon nga Kirtland. Ang mubo nga dalan (0.16 kilometro) nga padulong sa bansohan ug sa Whitney Ashery kay medyo bakilid ug natabonan sa mga tipak sa kahoy. Ang panagsa nga mga gamot sa kahoy, libaongong agianan, ug ubang peligrosong makapandol makahimo sa paglakaw nga mahagiton alang sa mga bisita nga dunay mga limitasyon sa paglihok.

360° nga Pag-aninaw sa Tibuok Palibot