Faleoloa o Cooper

E tu i le itu i matusisifo o le Fale Faatoaga a Iosefa ma Lusi Samita, o le Faleoloa o Cooper o se tasi lea o nofoaga na natia ai e Iosefa Samita, le Itiiti, papatusi auro lea na faaliliuina ai le Tusi a Mamona. E le’i leva ona maua e Iosefa papatusi, ae o mai nisi o tuaoi o le Aiga o Samita i le Fale o Samita e saili papatusi. A o faateleina taufaamatau o le a gaoia papatusi, sa afifi e Iosefa i ie ma nanā i le fale mautotogi i luga a‘e o le faleoloa. Ona ia ave lea o le pusa gaogao sa teuina ai ma tuu i lalo o fola laupapa. Na o mai se vaega o tagata faatupu vevesi i lena po ma sue faamalosi le Faleoloa o Cooper. Sa latou mauaina le pusa gaogao i lalo o le fola laupapa, ae latou te le’i siakiina le pito i luga lea sa natia saogalemu ai papatusi.

Sa aoaoina o ia e le tamā o Iosefa Samita le Matua, o Asaeli, i le fefaatauaiga o le faiga o paelo ma o Iosefa, le Matua, na tuufaasolo atu le tomai i lona atalii o Ailama. I se faleoloa e talitutusa ma lenei, sa fai faalelei ai e Iosefa le Matua ma Ailama ni paelo, ato, ma ni meafale māmā mo lo latou lava faaaogaina ma faatau atu i isi . E ui e le o iloa le uluai nofoaga o le Faleoloa o Cooper, ae o lenei toe gaosiga o se faleoloa fai paelo e sa‘o lava i le vaitaimi sa nonofo ai le Aiga o Samita iinei.


Aoao atili e uiga i taumafaiga a Iosefa Samita e nanā papatusi mai tagata sa fuafua e gaoi i le Au Paia Voluma 1, Mataupu 5.

O Mea e Faamoemoe i ai

O le Faleoloa o Cooper o se vaega o le maimoaga taamilo e taialaina e tuuina atu e faifeautalai o fale a le aiga o Samita, lea e aofia ai foi le Joseph Smith’s Boyhood Home ma le Smith Farm Home.