Monumento ni Anghel Moroni

Halos hindi nagtagal matapos bilhin ng Simbahan ang Burol ng Cumorah noong 1928, nagsimulang maisip ng iskultor na si Torleif Knaphus ang isang malaking monumento na magsisilbing saksi sa mga pangyayaring naganap doon mahigit 100 taon na ang nakararaan. Ang natapos na eskultura ay mahigit 30 talampakan (10 m) ang taas. Isang pigura na kumakatawan sa anghel na si Moroni ang nakatingin sa sangkatauhan habang itinuturo ng kanyang kanang kamay ang langit at hawak sa kaliwang kamay ang sinaunang talaan na nakasulat sa mga laminang ginto. Siya ay nakatayo sa tuktok ng isang mataas na haliging granite na may nakaukit na mga sinag ng liwanag sa ibabaw nito. Sa ibaba sa tatlong panig ng haligi ay may mga diskripsyon na yari sa tanso tungkol sa mga pangyayaring nauugnay sa mga laminang ginto. Sa hilagang panig ay nakalagay ang mga salita ng panghihikayat ni Moroni na basahin ang Aklat ni Mormon at tanungin ang Diyos kung totoo ang mga salitang nakapaloob dito.

Gumugol si Knaphus ng mahigit limang taon sa pagdisenyo ng monumento at pangangasiwa sa pagtatayo nito. Pinatotohanan niya sa malalapit na pamilya at kaibigan na ito ay tunay na espirituwal na karanasan. Nadama niya na tinulungan siya ng mga anghel habang nilililok niya ang anghel na si Moroni. Hindi tulad ng ibang mga paglalarawan sa sugong ito ng langit, nais ni Knaphus na ilarawan ang isang malakas, na pinuno ng militar na may seryoso at kagalang-galang na mukha. Pinili niya si Elwin Clark, isang bricklayer sa Salt Lake City, bilang kanyang modelo para sa mga braso at katawan. Ang ama ni Elwin na si Don Carlos Clark ang naging modelo ng mukha ng anghel. Lahat ng lalaking ito ay naniniwala na ang natapos na pigura ay bunga ng tulong ng langit.

Inilaan ni Pangulong Heber J. Grant ang monumento noong Hulyo 21, 1935.

Ano ang Aasahan

May tatlong daan o trail mula sa Hill Cumorah Visitors’ Center ang patungo sa Monumento ni Anghel Moroni sa tuktok ng Burol ng Cumorah. May ilang baitang sa palibot ng monumento. Ang mga bisitang nahihirapang maglakad o kumilos ay maaaring humiling na makapunta sa burol sakay ng isang shuttle.