Li qayeechi’ihom sa’ li santil ochoch nokoxb’ak’ rik’in li Dios ut qik’in chiqib’il qib’

Li santil ochoch a’an jun na’ajej loq’. Naqapaab’ naq li santil ochoch a’an li rochoch li Qaawa’ Jesukristo. Jalan li santil ochoch chiru jun ch’utleb’aal kab’l b’ar wi’ nokoloq’onin rajlal Domingo ut naqab’aanu xkomoneb’ chik li k’anjel. Q’axtesinb’ileb’ li santil ochoch re lix k’anjel li Dios li q’axal sant.

Wankeb’ naab’al li eetalil sa’ li santil ochoch. Jun reheb’, a’an naq eb’ li neke’ok sa’ li santil ochoch neke’xk’am li saqi t’ikr chirixeb’ re reetalinkil li saqalil ut li juntaq’eetil chiru li Dios. Li santil ochoch a’an jun loq’ ut tuqtuukil muheb’aal, b’ar wi’ lix moos li Jesukristo naru neke’xjilosi rib’ rik’in a’an.

Ut li tz’aqal aajel ru, a’an naq li santil ochoch a’an jun loq’laj na’ajej b’ar wi’ naru noko’ok sa’ sumwank rik’in li Dios.

Naru naqakawob’resi li qawanjik rik’in li Dios ut naru naqak’ul xninqal ru qosob’tesinkil li naxk’e a’an rik’ineb’ li sumwank. Jun sumwank a’an jun loq’laj xaqab’anb’il aatin wan wi’ li Dios rik’ineb’ li ralal xk’ajol. Li Dios naxk’e lix chaq’rab’il li sumwank, toja’ naq nokoxkanab’ chixsikb’al ru ma taqak’ulub’a malaj ink’a’.
Qatz’ilaq rix li kub’iha’ jo’ reetalil a’an.

Naq nakub’e qaha’, naqayeechi’i re li Dios naq took’anjelaq chiru, taqapaab’ lix taqlahom, ut taqak’ul sa’ qab’een lix k’ab’a’ li Jesukristo. Wi naqab’aanu chixjunil a’an, li Dios naxyeechi’i naq tixkuy qamaak, toorosob’tesi rik’in lix Loq’laj Musiq’, ut tixk’e qe li junelik yu’am rik’in a’an.

Naqa’ak’ob’resi li sumwank noko’ok wi’ sa’ li kub’iha’ naq naqak’ul li loq’laj wa’ak, malaj comunion, rajlal Domingo sa’ li iglees. Li loq’laj wa’ak a’in a’an reetalil li loq’laj wa’ak re li Wa’ak sa’ roso’jik kixtikib’ li Jesus rik’ineb’ lix apostol naq maji’ nakam.

Chirix xk’ulb’al li kub’iha’, eb’ li komon ninq re Lix Iglees li Jesukristo reheb’ laj Santil Paab’anel sa’ Roso’jikeb’ li Kutan naru neke’ok sa’ xkomoneb’ chik li sumwank rik’in li Dios sa’ li santil ochoch. Eb’ li sumwank ut yeechi’ink a’in neke’xkawob’resi lix wanjikeb’ rik’in li Dios ut neke’xk’am xkomoneb’ chik li osob’tesink.

Li loq’laj tiqib’aak sa’ li santil ochoch

Li aatin loq’laj tiqib’aak naraj naxye “maatan.” Sa’ li loq’laj tiqib’aak, eb’ li komon ninq re li Iglees neke’ok sa’ sumwank, jo’ xpaab’ankil lix taqlahom li Dios ut xq’axtesinkil lix hoonaleb’ ut lix seeb’aleb’ choq’ re lix k’anjel li Qaawa’. Jo’ reeqaj, li komon neke’xk’ul li osob’tesink jo’ xkomon chik xnawomeb’ chirix lix k’uub’anb’il na’leb’ li Dios, xkomon chik xkawilaleb’ re xtaaqenkil li Kristo, ut xwankilaleb’ re wank rik’in li Dios chi junelik.

Li tz’ape’k sa’ junajil

Jun nimla sahil ch’oolejil sa’ lix evangelio li Jesukristo a’an naq toj tooruuq chi wank sa’ li qajunkab’al chirix li yu’am a’in. Sa’ li santil ochoch, eb’ li junkab’al neke’junajiik malaj “neke’tz’ape’ sa’ junajil” chi junelik.

Naq neke’sumla ut neke’tz’ape’ sa’ junajil, jun b’eelomej ut jun ixaqilb’ej neke’wiq’la chiru jun artal re ok sa’ sumwank chirib’ileb’ rib’ ut rik’in li Dios. Neke’xyeechi’i naq te’roxloq’i ut te’xra rib’ chirib’ileb’ rib’ chi tz’aqal ut neke’xteneb’ rib’ chixtaaqenkil li raatin ut lix b’aanuhom li Jesus. Jo’ reeqaj, yeechi’inb’il reheb’ naq lix sumlajikeb’ ut lix junkab’aleb’ te’wanq chi junelik.

Li k’anjel choq’ reheb’ li qaxe’ qatoon kamenaqeb’

Laa’o naqapaab’ naq tiik ut aj uxtaan li Dios, ut naq maajun wa tixrameb’ li ralal xk’ajol chixk’ulb’aleb’ li junelikil osob’tesink wi ink’a’ ke’ru chi ok sa’ sumwank rik’in.

Sa’ li santil ochoch naqab’aanu li kub’iha’, li loq’laj tiqib’aak, ut li tz’apok sa’ junajil choq’ reheb’ li qaxe’ qatoon li ink’a’ ke’ru chixk’ulb’aleb’ li k’ojob’anb’il k’anjel a’an rub’elaj naq ke’kam. Sa’ li k’anjel a’in, jun kristiaan li yo’yo naxb’aanu li k’anjel chi uuchilej sa’ xk’ab’a’ jun kristiaan kamenaq.

Li loq’laj k’anjel a’in nab’aanuman ka’ajwi’ sa’ li santil ochoch. Naqapaab’ naq li qaxe’ qatoon neke’ru chixk’ulub’ankil malaj chixtz’eqtaanankil li mayej re rahok b’aanunb’il choq’ reheb’.