Li junkab’al naru nawan sa’ komonil chi junelik

Li komonil nakat-ok wi’ sa’ junkab’al sa’ li yu’am a’in naru nakana chirix li kamk. Xkawob’resinkil laa wanjik rik’in li Dios naru tixkawob’resi laa komonil rik’in laa junkab’al.
Sa’ li perel a’in
A family enjoys their time together as they walk down a sidewalk.

Li junkab’al wan jo’ xyi li na’leb’ kixk’uub’ li Dios

Jo’ laa Yuwa’ sa’ Choxa li nakatxra, li Dios naraj naq tattzoloq ut tatk’iiq sa’ laa yu’am. Aajel ru li junkab’al sa’ laa k’iijik. Laa’o naqapaab’ naq:
  • Li junkab’al a’an xk’ub’elal jun kawil tenamit.
  • Li junkab’al a’anaq raj jun na’ajej b’ar wi’ naqeek’a naq k’ulb’ilo, kolb’il qix, ut raab’ilo.
  • Li nach’ok rik’in li Dios natenq’an chixkawresinkil jun junkab’al b’ar wi’ nak’eeman li na’ajman ru choq’ re li musiq’ej, li aamej, ut li tib’elej.
A mother bakes cookies with her three children in the kitchen.

Naru nakatwan rik’in laa junkab’al chi junelik

Wi nakak’ul naab’al li rahok ut sahil ch’oolejil rik’in laa junkab’al sa’ laa yu’am, maare ch’a’aj raj xk’oxlankil jun choxa b’ar wi maak’a’eb’ raj laa komon. Li chaab’il esilal re lix evangelio li Jesukristo a’an naq li junkab’al naru nawan chi junelik.

Sa’ li Santil Hu, li Jesus kixk’e li wankilal re li tijonelil reheb’ li Kab’laju chi Apostol, ut kixye naq “li taab’ak’ sa’ ruchich’och’, b’ak’b’ooq ajwi’ sa’ choxa” (Mateo 18:18). Li wankilal a’an li naxk’e li Dios naxjunajiheb’—malaj naxtz’apeb’ sa’ junajil—li b’eelomej ut li ixaqilb’ej ut li na’b’ej yuwa’b’ej ut li kok’al chi junelik.

Family life in Hong Kong. Images include: Family at ocean, laughing together, reading, praying, playing games etc.
Li sumlaak neke’b’aanuman sa’ li santil ochoch rik’in ajwi’ li wankilal a’in, ut yeechi’inb’il naq lix sumlajikeb’ li ani tiikeb’ chiru li Dios ut chirib’ileb’ rib’ ink’a’ naraqe’ rik’in li kamk, nawan b’an chi junelik.

Naqab’aanu ajwi’ li k’anjel re xtz’apb’aleb’ sa’ junajil li qaxe’ qatoon, li neke’ru chixsik’b’al ru xk’ulub’ankil malaj xtz’eqtaanankil lix tz’apb’aleb’.

Wan naq ch’a’aj xwanjik li junkab’al, ut ink’a’ naqanaw chi tz’aqal chan ru taakanaaq chixjunil sa’ li yu’am chalel. A’b’an naqapaab’ naq tz’aqal re ru lix nawom ut lix rahom li Dios, ut naqapaab’ naq li choxa a’anaq jun na’ajej re nimla sahil ch’oolejil maji’ naqataw ru.

Naru taataw li tenq’ re xkawob’resinkil laa junkab’al

xJulie Hillyard na’aatinak chirix li junkab’al
Xtawb’al sahil ch’oolejil sa’ jun junkab’al li jalan
Li rahok sa’ li junkab’al, k’a’jo’ wi’chik naq taatawmanq naq k’ojob’anb’il sa’ xb’eeneb’ li na’leb’ k’utb’il xb’aan li Jesukristo, jo’:
  • Li tzʼaqal rahok
  • Li kuyuk maak
  • Xmaakʼaʼil li bʼalaqʼ
  • Li b’antioxink
  • Li tijok
  • Li loq’onink sa’ komonil
Naq laa junkab’al naxjilosi rib’ rik’in li Dios sa’ xb’aanunkileb’ li na’leb’ a’in, teejilosi ajwi’ eerib’ cherib’il eerib’.

Naqapaab’ naq li junkab’al jwal aajel ru sa’ li yu’am a’in jo’ ajwi’ sa’ li chalel, jo’kan naq Lix Iglees li Jesukristo reheb’ laj Santil Paab’anel sa’ Roso’jikeb’ li Kutan nak’anjelak chi kaw re xtenq’ankileb’ li junkab’al. Naru nakawoksiheb’ li k’a’aq re ru a’in re xtenq’ankil laa junkab’al.

Eb’ li k’anjeleb’aal re li Iglees choq’ re li junkab’al

Li Iglees naxk’eheb’ li k’anjeleb’aal li naru neke’roksi li komon ut li junkab’al naq neke’xtzol lix evangelio li Jesukristo. Eb’ li k’anjeleb’aal re tzolok a’in nakate’xtenq’a chixyu’aminkil li k’a’ru nakatzol ut chixnimob’resinkil laa paab’aal. Eb’ li na’leb’ neke’tzolman rajlal xamaan sa’ li iglees.

Ileb’ li tusleb’aal re tzolok, Kim, Taaqehin nayeeman re.
Eb’ li k’anjeleb’aal re li Iglees choq’ reheb’ li saaj neke’xtenq’aheb’ li na’b’ej yuwa’b’ej chixk’utb’al li na’leb’ chirix li Kristo chiruheb’ lix kok’al, ut neke’xtenq’aheb’ li saaj chixnawb’aleb’ ru li rech saajil aj paab’anel. Eb’ li saaj naru neke’oken sa’eb’ li k’anjel a’in:
  • Li tzolok chirix li paab’ank
  • Li wank sa’ komonil rajlal xamaan jo’ saaj
  • Li k’anjelak chiru as iitz’inb’ej
  • Li xajok
  • Li campamento chiru saq’ehil
  • Li ch’utub’aj-ib’
Li q’ojyin re junkab’al a’an jun k’anjel naru neke’xb’aanu li junkab’al re wank sa’ komonil chiru jun q’ojyin re li xamaan. Maare neke’xtzol li evangelio, neke’b’atz’un, neke’tzekan, ut neke’xb’aanu li k’a’ru tixkawob’resi xjunajileb’. Us chixjunil li k’a’ru nak’anjelak choq’ re laa junkab’al! Li jwal aajel ru, a’an xk’eeb’al xhoonal li junkab’al sa’ xb’een yalaq chik k’a’ru. Naru ajwi’ nab’aanuman rik’ineb’ laa wamiiw, laa wech kab’al, ut li komon sa’ laa ch’uut re li Iglees.
K’eeb’il xtaqlankileb’ li komon sa’ li Iglees chirilb’aleb’ wiib’ oxib’ li komon sa’ xch’uuteb’. Naq naqileb’ li qas qiitz’in, nokok’anjelak chiruheb’ jo’ tixb’aanu raj li Kolonel. Chi jo’ka’in naq chixjunileb’ li komon sa’ li ch’uut wan li ani na’ilok reheb’, ut wan ani naru neke’xsik’ wi wan li te’raj ru. Qayehaq, jun winq malaj ixq aj ilol komon naxk’ameb’ li komon sa’ li iglees, naxk’uub’ li tzakemq choq’ reheb’ wi toje’ xe’yo’la xk’uula’al, malaj neke’xk’e xsahileb’ xch’ool sa’ li iglees.
Wi jun junkab’al malaj komon ch’a’aj chiru xtawb’al li taak’anjelaq reheb’ sa’ xyu’ameb’, lix k’anjeleb’aal li Iglees chirix li tenq’ank-ib’ naru natenq’an rik’in li k’a’aq re ru, jo’ li tzakemq. Li k’anjeleb’aal re li Iglees chirix li tawok trab’aaj naru naxtenq’aheb’ li komon chixtawb’al xtrab’aaj malaj chixkawresinkil rib’ re xsik’b’al xtrab’aaj. Naqak’eheb’ li tzolok kawresinb’il xb’aan li Iglees, li naru na’oken wi’ yalaq ani, chirix rilb’al li tumin, li kawilal sa’ ch’oolej, ut xtikib’ankil jun k’ayib’aal.
Chixjunileb’ li kristiaan wankeb’ sa’ xjunkab’al li qachoxahil na’ qayuwa’. Moko chixjunileb’ ta li neke’wulak sa’ li iglees wankeb’ rik’in xjunkab’al, a’b’an chixjunileb’ naru neke’kawob’resiik sa’ musiq’ej ut neke’k’ulub’aak sa’ li iglees. Eb’ li ninq li moko sumsuukeb’ ta naru neke’loq’onin sa’ jun ch’uut neke’wulak wi’ li junkab’al ut li kok’al—malaj, sa’ junjunq na’ajej re li ruchich’och’, naru neke’wulak sa’ jun ch’uut choq’ reheb’ li rech komonil li moko sumsuukeb’ ta. Li wulak sa’eb’ li tzolok ut k’anjel choq’ reheb’ li ninq li moko sumsuukeb’ ta naru naxtenq’aheb’ chixtawb’aleb’ li ramiiw ut chi kawresiik sa’ musiq’ej.

Aatinaqo chirix li junkab’al

Li Iglees naru tatxtenq’a chixkawob’resinkil laa junkab’al ut chi wank sa’ junajil chi junelik. Naru nakataw xkomon chik laa na’leb’ rik’ineb’ li misioneer sa’ internet malaj sa’ kristiaanil.
Aatinan rik’ineb’ li misioneer