Li Jesukristo a’an laa Kolonel

Naq li Dios kooxtaqla sa’ li ruchich’och’ re tzolok ut k’iik, a’an kixnaw naq toomaakob’q. Xb’aan a’in naq kixk’e jun aj Kolol qe.

Naqapaab’ naq li Jesukristo a’an li Ralal li Dios ut jun komon sa’ roxichal li Dios, rochb’een li Dios Yuwa’b’ej ut li Loq’laj Musiq’ej. A’an kichal sa’ ruchich’och’ re xb’aanunkil jun choxahil k’anjel, b’ar wi’:

• Tixnumsiheb’ xyalb’al rix li yu’amej.
• Taak’utuq ut tixch’olob’ xyaalal li Dios.
• Tixb’aanu ninqi sachb’a-ch’oolej.
• Tixk’ul rahilal ut taakamq sa’ xk’ab’a’ li qamaak re naq tooruuq chi ch’aje’k chiru li qamaak.
• Tixq’ax ru li kamk rik’in lix waklijik chi yo’yo, re naq tooruuq ajwi’ chi wakliik chi yo’yo.

Li Jesukristo kixk’ut li tz’aqal rahok. Chi nujenaq rik’in xtoq’ob’ahom, a’an kixk’irtesiheb’ li yaj ut li wankeb’ xmajelal, kixch’oolaniheb’ li neke’tz’okaak, kixwaklesiheb’ li kamenaq, kirileb’ li neb’a’, kixk’ulub’eb’ li tz’eqtaananb’ileb’, ut kik’anjelak chiru chixjunileb’ li ke’sik’ok re rik’in paab’aal.

Li Kolonel nakatxra ajwi’ laa’at ut naxtoq’ob’a aawu.

Jo’ aj Kristiano, naqayal qaq’e chi wank jo’ li Kolonel ut chixk’utb’al lix rahom a’an sa’ chixjunil li naqab’aanu.

Li Jesukristo a’an li nimla aj k’utunel. Li na’leb’ kixk’ut, 2000 mil chihab’ chaq anajwan, toj naxwaklesi xch’ooleb’ li kristiaan chiru chixjunil li ruchich’och’ chixchaab’ilob’resinkil lix yu’ameb’ sa’ li kutan a’in. A’an kixtzoleb’ li ninqi ch’uut, a’b’an naqatzol sa’ li Santil Hu naq kixk’e ajwi’ xhoonal li kristiaan chi junjunqal.

Li junjunq qe, jo’ ajwi’ laa’at, naru nasaho’ ut natuqla qach’ool wi taqataaqe lix k’utum li Jesukristo. Sa’ li na’ajej wankat wi’, wankeb’ li komon re Lix Iglees li Jesukristo reheb’ laj Santil Paab’anel sa’ Roso’jikeb’ li Kutan li neke’ch’utla rajlal xamaan, ut aran naru nakataw xkomon chik aana’leb’ chirixeb’ lix k’utum ut chan ru naq neke’k’anjelak sa’ laa yu’am. Wan ajwi’ sa’ lix Hu laj Mormon resil li raatin li Kristo li nak’anjelak sa’ komonil rik’in li raatin sa’ li Santil Hu.

Lix mayej ut lix kamik li Jesukristo

Us ta tz’aqal re ru li Kolonel chiru xyu’am, wankeb’ li kristiaan li ke’wan xk’a’uxl chirix lix wankilal malaj ke’josq’o’ naq a’an kixye resil xka’pak’alileb’ ru. Eb’ a’an ke’xk’uub’ xna’leb’ re xkamsinkil li Jesus.

Sa’ li q’ojyin rub’elaj lix k’eeb’al chiru krus, li Jesukristo naxik sa’ li Awimq Getsemani, b’ar wi’ kixk’ul rahilal sa’ xk’ab’a’ xrahilaleb’ ut xyajeleb’ chixjunileb’ li ralal xk’ajol li Dios. Chi jo’kan naq a’an kiru chi tenq’ank ut chi k’irtesink sa’ chixjunil.

Chirix a’an kiq’axtesiik, kichape’, kirapleek, ut kik’ehe’ chiru krus. Chirix oxib’ kutan, kiwakli chi yo’yo, kinumta sa’ xb’een li kamk ut li maak. Us ta k’a’jo’ xrahil ut moko tiik ta lix kamik li Jesukristo, lix choxahil mayej kooxtenq’a chiqajunilo re naq taaruuq chi kuye’k qamaak ut tooruuq chi wakliik sa’ xyanqeb’ li kamenaq.

Naru taakuye’q qamaak sa’ xk’ab’a’ lix tojb’al rix li maak xb’aan li Kristo

Naq li Jesukristo kixk’ul rahilal sa’ li Awimq Getsemani ut chiru li krus, a’an kixk’ul li qamaak sa’ xb’een. A’an kixtoj xtz’aq li tiik ruhil na’leb’ re naq tooruuq chi uxtanaak. Naq naqajal qak’a’uxl chi maak’a’ qab’alaq’, naru taakuye’q qamaak.

Naru taawanq qayu’am wi’chik sa’ xk’ab’a’ li wakliik chi yo’yo

Li Jesukristo kiwakli sa’ xyanqeb’ li kamenaq sa’ rox li kutan chirix lix k’eeb’al chiru krus. Sa’ xk’ab’a’ a’an, laa’o ajwi’ tooruq chi wakliik chi yo’yo ut taawanq qayu’am wi’chik. Naru toowanq rik’in li Dios ut eb’ li qaraarookil komon rik’in jun tib’elej tz’aqalaq chik re ru, chi maak’a’aq chik xwankil li yajel, li rahil ch’oolej, ut rahilal sa’ qab’een.

Li Kolonel nakatxra ut naxtaw aawu. A’an kireek’a raalileb’ lix yalb’al aawix ut kixk’ul rahilal sa’ xk’ab’a’ laa maak. A’an nakatxb’oq chixtaaqenkil a’an ut chixtawb’al tuqtuukilal.