Li Jesukristo kixk’ut chiqu naq taqara qib’ chiqib’il qib’

Li Jesukristo kixye naq li wiib’ xninqal ru taqlahom a’an xraab’al li Dios ut xraab’al li qas qiitz’in.

Li Jesukristo kixch’olob’ naq xraab’al li qas qiitz’in moko a’an ta yal xk’eeb’al xsahil xch’ooleb’ laa wech kab’al. Eb’ li neke’taaqenk re li Jesus tento te’xk’ut li tz’aqal rahok—li tz’aqal rahok narahok wi’ li Kristo—reheb’ chixjunil, jo’eb’ ajwi’ li xik’ neke’ilok qe.

Laa’o naqapaab’ naq li k’anjelak sa’ komonil re xk’utb’al lix rahom li Kristo a’an jun reheb’ li k’anjel jwal nak’irtesin, nasahob’resin, ut najunajin. Chi jo’ka’in naq nokok’anjelak, ut naqaj naq tattz’aqonq qik’in!

Li tenq’ank naq wan li ajb’il ru

Sa’ chixjunil li Iglees, patz’b’il reheb’ li komon naq te’xkuy xsa’ rajlal po, li naraj naxye xramb’aleb’ rib’ chiru li wa’ak ut li uk’ak chiru maare 24 hoor (wi naru chiruheb’). Eb’ li komon sa’ li Iglees neke’xk’e li tumin li xe’roksi raj re xloqb’al li tzakemq re xtenq’ankileb’ li ani wankeb’ rajom ru.

Rik’in li tumin a’in, eb’ laj jolominel naru neke’xtenq’aheb’ li kristiaan rik’in tzakemq, muheb’aal, ut li viaaj. Eb’ laj jolominel neke’xtenq’aheb’ ajwi’ li kristiaan li neke’xk’ul xtenq’ chixk’uub’ankil chan ru te’xchaab’ilob’resi xyu’ameb’, rik’ineb’ li k’anjeleb’aal re xtawb’al li trab’aaj, li Servicios para la Familia, li tzolok chirix li tenq’ank-ib’, ut wankeb’ chik xkomon.

Li tenq’ a’in naxtenq’aheb’ li wankeb’ rajom ru chireek’ankil lix rahom li Kolonel jo’ ajwi’ xrahomeb’ li ras riitz’in—tz’aqal sa’eb’ li hoonal ch’a’aj.

Li tenq’ank naq wankeb’ ninqi rahilal

Naq wankeb’ li ninqi rahilal, li pleetik, ut xkomon chik li rahilal, li Iglees ut eb’ lix komon neke’xch’utub’ rib’ re xk’eeb’al li tzakemq, li b’an, li t’ikr, ut xkomon chik li na’ajman ru.

Li Iglees nak’anjelak rik’ineb’ li chaab’il ch’uut re tenq’ank rik’in li na’ajman ru sa’ li junjunq chi rahilal. Eb’ li komon sa’eb’ li jar na’ajej neke’xch’utub’ ut neke’xtusub’ li k’a’ru naq’axtesiman, neke’xmes li po’lem, ut neke’xk’e li tzakemq, li t’ikr, li muheb’aal, ut li tenq’ank re ch’oolej naq na’ajman ru.

Xtenq’ankileb’ li neb’a’

Li Iglees nak’anjelak re rilb’aleb’ li wankeb’ rajom ru chiru li ruchich’och’ rik’in naab’aleb’ paay chi k’anjel.

Jalan jalanq li k’anjel a’in a’ yaal li na’ajman ru sa’ li junjunq chi na’ajej. Li Iglees kaw nak’anjelak re xtenq’ankileb’ li kristiaan rik’in saq ruhil ha’ ut li saab’esink-ib’, xtenq’ankileb’ li na’b’ej ut li k’uula’al, rilb’al xkawilal li tib’elej, li tzolok, li tzakemq, ut li tenq’ choq’ reheb’ li ani isinb’ileb’ sa’ xtenamiteb’.

Rochb’een xkomoneb’ chik li chaab’il ch’uut, li k’anjel re xb’aanunkil chixjunil a’an naxtenq’a li Iglees chi k’anjelak chi chaab’il chiruheb’ li kristiaan.

Li ilok komon

Sa’eb’ li qach’uut, eb’ li komon neke’k’ehe’ sa’ wiib’al ut neke’taqlaak chirilb’aleb’ junjunqeb’ li kristiaan. Wan li k’anjel re ilok komon re qatenq’ankil chirilb’al qib’ chiqib’il qib’ jo’ tixb’aanu raj li Kristo. A’an jun k’anjel re amiiwul—eb’ laj ilol aawe naru nakate’ril sa’eb’ li hoonal chaab’il jo’ ajwi’ sa’eb’ li hoonal ch’a’aj.

Jo’ nakak’oxla laa’at, k’a’ru naraj naxye xraab’al laa was aawiitz’in? Chi jo’ka’in naru nakara laa was aawiitz’in:

• Tijon re naq tatruuq chixk’utb’al xchaab’ilal aach’ool chiru li kutan.
• K’e aach’ool chixkuyb’al xmaakeb’ li ani xate’xrahob’tesi.
• Tz’eqtaana li rahob’tesink, li racismo, ut chixjunil li k’iila paay chi xik’ ilok.
• Puktesi li chaab’il na’leb’ ut matrahob’tesin sa’eb’ li redes sociales.
• K’e xsahileb’ xch’ool laa wamiiw li wankeb’ xch’a’ajkilal.
• Ye junaq chaab’il aatin re anihaq.
• Tz’aqon sa’eb’ li k’anjel ut li k’anjeleb’aal re xtenq’ankileb’ li ani wankeb’ rajom ru.

Naru taataweb’ li k’anjel re tenq’ank sa’ laa na’aj, malaj naru tatk’anjelaq chi najt wi tatxik sa’ JustServe.org.