Есүс Христ бидэнд бие биеэ хайрлахыг заасан

Есүс Христ хамгийн агуу хоёр зарлиг бол Бурханаа хайрлах мөн бусдыг хайрлах юм хэмээн заасан.

Хөршөө хайрлах гэдэг нь эргэн тойрондоо амьдардаг хүмүүст сайн хандахаас илүү зүйл гэдгийг Аврагч тодорхой болгосон. Түүний дагалдагчдын хүлээсэн үүрэг хариуцлагуудын нэг хэсэг нь Христийн цэвэр хайр болох энэрлийг хүн бүрд, бүр дайснаа гэж үздэг хүмүүст хүртэл үзүүлэх явдал юм.

Христийнхтэй адил энэрлийг үзүүлэхээр хамтран ажиллах нь сүмийн гишүүдийн хийж болох хамгийн их эдгэрэл, баяр баясал, эв нэгдэл авчрах зүйлсийн нэг гэдэгт бид итгэдэг. Энд бидний үйлчлэл үзүүлж болох хэд хэдэн арга замыг танилцуулъя. Таныг бидэнтэй нэгдэхийг хүсэж байна!

Халамжийн үйлчлэл

Сүм даяар гишүүдийг (эрүүл мэндийн асуудалгүй тохиолдолд) сар бүр ойролцоогоор 24 цагийн турш хоол идэж, ус уулгүйгээр мацаг барихыг уриалдаг. Сүмийн гишүүд тухайн хэмнэсэн хоолныхоо мөнгийг тусламж хэрэгтэй хүмүүст хандивладаг.

Энэ хандиваар харьяа нэгжийн удирдагч тусламж хэрэгтэй хүмүүст хоол хүнс, орон байр, тээврийн зардалд зориулж санхүүгийн дэмжлэг үзүүлэх боломжтой болдог. Мөн Сүмийн удирдагчид тусламж хүлээн авч буй хүмүүст Гэр бүлийн үйлчилгээгээр дамжуулан хөдөлмөр эрхлэлтийн үйлчилгээ, зөвлөгөө болон бие даах чадварын хичээлүүд зэрэг олон нэмэлт эх сурвалжийг ашиглан нөхцөл байдлаа сайжруулахад нь тусалдаг.

Энэхүү дэмжлэг нь тусламж хэрэгтэй хүмүүст хүнд хэцүү цаг үед Аврагчийн болон эргэн тойрныхоо хүмүүсийн хайрыг мэдрэх боломжийг олгодог.

Гамшгийн тусламж

Байгалийн гамшиг, дайн дажин, бусад гай зовлон тохиолдох үед Сүм болон сүмийн гишүүд хоол хүнс, эм тариа, хувцас хунар болон бусад нэн шаардлагатай зүйлсээр хангахад идэвхийлэн оролцдог.

Сүм тухайн нөхцөл байдлаас үүссэн онцгой хэрэгцээг хангахын тулд итгэл хүлээсэн бусад байгууллагатай хамтран ажилладаг ба хандив цуглуулах, ялгах, хог хаягдлыг цэвэрлэх, хоол хүнс, хувцас хунар, орон байраар хангах, сэтгэл санааны дэмжлэг үзүүлэх зэрэг ажлуудад харьяа нэгжийн гишүүдийг оролцуулдаг.

Хүмүүнлэгийн тусламж

Сүм дэлхий даяарх тусламж шаардлагатай хүмүүст олон талт төсөлт хөтөлбөрөөр дамжуулан тусламж үзүүлэхээр ажилладаг.

Энэ ажил нь өөр өөр бүсийн онцлог хэрэгцээнээс шалтгаалж ялгаатай байдаг. Сүм цэвэр усны хангамж, ариутгал, эх нярайн асаргаа, эрүүл мэнд, боловсрол, хүнсний аюулгүй байдал, дүрвэгчдэд үзүүлэх тусламжийг илүү сайжруулах ажилд голчлон анхаардаг.

Сүм эдгээр санаачилгыг хэрэгжүүлэхдээ итгэмжит байгууллагуудтай хамтрах нь үйлчлэх цар хүрээгээ нэмэгдүүлэхэд тустай.

Тохинуулал

Сүмийн гишүүд цуглаан дотроо хамтралд хуваагдан тохинуулал үзүүлэх цөөн хэдэн хүнийг хуваарилж авсан байдаг. Христийнхтэй адил нөхөрлөлийг бий болгох нь тохинууллын үндсэн зорилго юм. Үүнийг найз нөхдийн системтэй зүйрлэж болно. Таны тохинуулагчид бол жаргал зовлонгоо хуваалцаж болох дэмжлэг үзүүлэх дотоод систем юм.

Таны хувьд хөршөө хайрлах гэдгийг юу гэж ойлгож байна вэ? Хөршөө хэрхэн хайрлах талаар хэдэн санааг доор өглөө:

• Тухайн өдрийн турш эелдэг найрсаг хандлагыг харуулах боломжуудыг эрэлхийлэн залбир.
• Өөрт тань шударга бус хандсан хүмүүсийг уучлахыг хичээ.
• Дээрэлхэл, гадуурхал болон ялгаварлан гадуурхах бусад хэлбэрийн эсрэг зогс.
• Олон нийтийн мэдээллийн хэрэгслээр эерэг зүйлсийг түгээж, бусдад эелдэг ханд.
• Хүнд хэцүү цаг үеийг туулж буй найз нөхөдтэйгөө холбоо барь.
• Бусдыг чин сэтгэлээсээ магтаж, урамшуул.
• Тусламж хэрэгтэй хүмүүст чиглэсэн аливаа ажил, байгууллагуудад дэмжлэг үзүүл.

Түүнчлэн та JustServe.org сайтаас өөрийн эргэн тойронд хэрэгжиж буй үйлчлэлийн төслүүд болон үйлчлэл үзүүлэх арга замуудын талаар мэдэж авах боломжтой.