Бурхан бүх үнэний эх сурвалж мөн

Заримдаа бид амьдралынхаа талаар эргэлзэн, ирээдүйдээ тээнэгэлзэж болох юм. Бид үнэний эх сурвалж болох хайраар дүүрэн Тэнгэрлэг Эцэг, Түүний Хүү Есүс Христтэй замаа олж чадна.

Үнэн гэдэг бол юмсын бодит байдлын тухай мэдлэг юм. Жишээ нь:, Бурхан танд хайртай, амьдралыг тань өөрчлөхөд тусалж чадна гэдэг нь үнэн. Бурхан биднийг хувь хүн талаас нь мэддэг мөн Ариун Сүнсээр дамжуулан бидэнд үнэнийг танихад тусладаг.

Тэнгэрлэг Эцэг бидэнд хэрхэн аз жаргалтай байж, амьдралынхаа утга учрыг олж авахыг заалгахаар Өөрийн Хүү, Есүс Христийг илгээсэн юм.

Есүс бол бидний хэрхэн амьдрах ёстойг харуулах төгс үлгэр жишээ юм. Түүний сургаал биднийг амар амгалан руу хөтлөх чиглүүлэгч гэрэл билээ. Есүс Христийг дагахыг хүссэн хэн боловч энэ гэрлийг хүлээн авч чадна; Түүнийг эрж хайдаг хүн бүр Түүнийг олно гэж Тэр амладаг.

Ариун Сүнс буюу Сүнс нь Тэнгэрлэг Эцэг, Есүс Христ хоёрын төлөөлөгч элч юм. Ариун Сүнс биднийг хэд хэдэн арга замаар Бурханд илүү ойртуулдаг. Ариун Сүнс:

• Тайтгаруулдаг (Иохан 14:16–17, 26; Моронай 8:26; Сургаал ба Гэрээнүүд 36:2-ыг үзнэ үү).
• Үнэнийг илчилж, гэрчилдэг (2 Нифай 32:4–5; Алма 5:46–47; Сургаал ба Гэрээнүүд 8:2–3-ыг үзнэ үү).
• Эцэг, Хүү хоёрыг гэрчилдэг (Иохан 15:26; 3 Нифай 11:32, 36-г үзнэ үү).
• Ариусгаж, цэвэршүүлдэг (Алма 13:10–12; 3 Нифай 27:19–20; Моронай 6:4-ийг үзнэ үү).

Хайраар дүүрэн Тэнгэрлэг Эцэгтээ хандан залбир

Бурхан бидэнд хайртай. Бас биднийг сонсохыг хүсдэг. Биднийг залбирах үед Тэр бидэнд хариулж, удирдамж заавар өгнө хэмээн амласан.

Есүс бидэнд хэрхэн залбирахыг Библид (Maтай 6:9–13) болон Мормоны Номон дээр (3 Нифай 18:19) заасан.

Итгэлтэй бай

Библи “итгэл бол найддаг зүйлсийн маань бодит байдал, харагдахгүй зүйлсийн баталгаа мөн” хэмээн заасан (Еврей 11:1). Бид итгэлтэй байх үедээ Тэнгэрлэг Эцэг ба Есүс Христ амьдралд маань аз жаргал, утга учрыг олоход тусална гэдэгт итгэхийг сонгодог.

Ариун Сүнсийг ялган таних

Бурхан Ариун Сүнсээр дамжуулан бидэнтэй олон арга замаар харилцдаг. Библид үүнийг ихэвчлэн “намуухан хүнгэнэх дуу” (1 Хаад 19:11–12-ыг үзнэ үү) хэмээн дүрсэлдэг ч хүн бүр Ариун Сүнсийг өөр өөрийн арга замаар мэдэрнэ. Таны хувьд Ариун Сүнс дараах байдлаар мэдрэгдэж болох юм. Үүнд:

• Хайр, баяр баясгалан, амар тайван, сайн сайхан мэдрэмж (Галат 5:22–23)
• Амьдралд тань өгөх удирдамж, тодорхой байдал (Сургаал ба Гэрээнүүд 8:2-3)
• Таны оюун дахь санаа бодол, зүрх сэтгэл дэх мэдрэмж (1 Коринт 2:9-11)
• Харанхуй гэрлээр солигдох байдлаар (Алма 19:6).

Аврагчийн үлгэр жишээг дагах

Есүс бид бүгдэд төгс үлгэр жишээг харуулсан. Хэрэв бид юу үнэн болохыг мэдэхийг хүсвэл Түүний жишээг дагаж, Түүний хийсэн зүйлийг хийж болно.

Энэ нь ямар байх вэ?

• Бусдад болон Бурханд хайр, энэрэл үзүүл.
• Эдгээр үйлдэл танд ямар сэтгэгдэл төрүүлэхийг хараарай.
• Эдгээр үйлдэл таны амьдралыг хэрхэн өөрчилж байгааг тунгаан бод.