Aisea ua Tatou I Ai Iinei i le Lalolagi ma O Le a le Mea e Tupu pe a Mavae Ona Tatou Oti

E finagalo le Atua, lo tatou Tama Faalelagi alofa, ia tatou lagona le fiafia ma le olioli. Na Ia fatuina se fuafuaga mo i tatou e o mai ai i le lalolagi, tuputupu a’e, ma toe foi atu e nonofo faatasi ma Ia e faavavau. O Lana fuafuaga e tuuina mai ai le uiga ma le talaaga i o tatou olaga ma tali ai fesili tetele: “O fea na ou sau ai?” “Aisea ua ou i ai iinei?” ma le “O le a le mea e tupu pe a mavae ona ou oti?”

E amata lau tala ae e te le’i fanau mai. I le lagi, sa e i ai o se agaga faatasi ma le Atua ma le vaega o totoe o Ana fanau agaga. O i tatou uma lava o tagata o Lona aiga, ma i lo tatou muai olaga, sa tatou filifili ai e mulimuli i le fuafuaga a le Atua. O lona uiga o le omai i le lalolagi ina ia mafai ona tatou uia le isi laasaga i lo tatou alualu i luma e faavavau.

O Le Foafoaga

I lalo o le taitaiga a le Tama Faalelagi, na foafoaina ai e Iesu Keriso le lalolagi ma mea uma o i ai. O Atamu ma Eva o uluai fanau agaga ia a le Atua na omai i le lalolagi. Na foafoaina e le Atua o la’ua tino faaletino i Lona lava faatusa ma tuu i la’ua i le Faatoaga o Etena.

O Le Pa’ū o Atamu ma Eva

A o i ai Atamu ma Eva i le faatoaga, sa poloaiina i la’ua e le Atua e ‘aua nei aai i le fua o le laau e iloa ai le lelei ma le leaga.

Afai la’ua te usiusitai i lenei poloaiga, e mafai ona la tumau i le faatoaga, ae o le a le mafai ona la’ua alualu i luma e ala i le aoao mai le tetee ma luitau o se olaga faaletino. Semanu la te le mafai ona iloa le olioli aua la te le mafai ona iloa le faanoanoa ma le tiga.

Na faaosoosoina e Satani Atamu ma Eva e aai i le fua faasāina. Na filifili Eva e ai i le fua ma avatu iā Atamu se vaega o le fua. Na ia filifili foi e ai. Talu ai ona o lenei filifiliga, na tuliese ai i la’ua mai le faatoaga ma o ese ai mai le afioaga o le Atua. E ta’ua lenei mea na tupu o le Pa’ū.

O le Pa’ū o se laasaga agai i luma mo tagata ma o se faamanuiaga sili ia i tatou uma. O le Pa’ū ua mafai ai ona tatou fananau mai i le lalolagi ma alualu i luma i le fuafuaga a le Tama Faalelagi.

O le Pa’ū o se laasaga agai i luma mo tagata ma o se faamanuiaga ia i tatou uma. O Faamanuiaga o le Pa’ū e aofia ai:

• Na avea Atamu ma Eva ma tagata faaletino.
• Sa la oo i ai ma e mafai ona faaaoga lo la faitalia e filifili ai i le va o le lelei ma le leaga.
• Ona sa feagai Atamu ma Eva ma mea faafeagai, sa mafai ai ona la’ua aoao ma alualu i luma.
• Ona sa la’ua oo i le faanoanoa, sa mafai ai foi ona la’ua lagonaina le olioli.
• O le Pa’ū ua mafai ai ona tatou fananau mai i le lalolagi ma alualu i luma i le fuafuaga a le Tama Faalelagi.

Ona o le Pa’ū, ua tatou maua ai ni tino faaletino, le aia tatau tatou te filifili ai i le lelei ma le leaga, ma le avanoa tatou te maua ai le ola e faavavau. Semanu tatou te le maua ia avanoa, pe a na tumau pea Atamu ma Eva i le faatoaga.

Sa faaali atu e Atamu ma Eva lo la lotofaafetai mo faamanuiaga na faapea ona oo mai o se taunuuga o le Paʼū:

“Na viia ai e Atamu le Atua ma sa faatumuina, ma sa amata ona vavalo e uiga i aiga uma o le lalolagi, ua fai mai: Ia viia lava le suafa o le Atua, aua ona o laʼu solitulafono ua pupula ai oʼu mata, ma o le a ou maua i le olaga lenei le olioli, ma o le a ou toe vaai i le Atua i le tino.

“Ma o Eva, lana ava, sa faalogo atu i nei mea uma ma sa fiafia, ua fai mai: Ana le seanoa la ta solitulafono po ua le maua e i taua ni fanau, ma po ua le mafai ona ta iloa le lelei ma le leaga, ma le olioli o le togiolaina o i ta’ua, ma le ola e faavavau ua tuu mai e le Atua ia i latou uma o e e usiusitai.”

O lo tatou olaga i le lalolagi o se vaega taua o le fuafuaga a le Atua mo i tatou taitoatasi. O aafiaga ua tatou maua iinei e fesoasoani ia i tatou e aoao ai, tuputupu a’e, ma saunia ai e toe foi atu i lo tatou Tama oi le Lagi.

O le Togiola a Iesu Keriso e totonugalemu i le Fuafuaga o le Fiafia a le Atua.

• Ona o le Pa’ū o Atamu ma Eva, ua tatou oo uma ai i le agasala ma le oti.
• Ona e alofa le Atua ia i tatou, na Ia auina mai ai Lona Alo, o Iesu Keriso, i le lalolagi e togiola i tatou mai le agasala ma le oti.
• Ona o le taulaga togiola a Iesu, ua mafai ai ona faamagaloina ma faamamaina i tatou mai a tatou agasala ma e mafai ona suia o tatou loto. O lenei mea ua mafai ai ona tatou toe foi atu i le afioaga o le Atua ma maua ai se atoatoaga o le olioli.

Ua ofo mai e Iesu Keriso le faamafanafanaga, faamoemoe, ma le faamalologa. O Lana taulaga togiola o le faailoaga silisili lea o Lona alofa. O mea uma e le talafeagai i le olaga e mafai ona faasa’oina e ala i le Togiola a Iesu Keriso.’

E pei lava ona tatou ola ae tatou te le’i omai i le lalolagi, o le a faaauau pea ona tatou ola pe a tatou oti. O le iloaina o lenei mea e mafai ona maua ai le mafanafana ma le filemu pe a feagai i tatou po o e pele ia i tatou ma le oti. A o tatou faanoanoa mo i latou ua maliliu, o loo i ai le faamoemoe ona o Iesu Keriso—o le oti e le o le mutaaga lea (tagai Ioane 11:25–26).

O Le Lalolagi o Agaga

A tatou oti, o le a tuueseeseina o tatou agaga ma o tatou tino. E ui lava ina oti o tatou tino, ae o loo ola pea o tatou agaga—o le ute o i tatou. E alu lo tatou agaga i le lalolagi o agaga, o se vaitaimi faatalitali lea o le aoaoina ma sauniuniga seia oo ina tatou maua le meaalofa o le toetu.

Toetu

O le toetu o le toe faatasia lea o o tatou tino ma agaga ma o le isi laasaga lea i lo tatou tuputupu a’e e faavavau.

Pe a tatou toetutu, o le a tofu i tatou ma se tino faaletino atoatoa, e leai se tiga ma se ma’i. O le a tatou ola pea, ola e faavavau.

Ona o le Togiola ma le Toetu o le Faaola, o le a toetutu ai tagata uma o e na ola (Alema 11:42–44).

Ua Mafai le Faaolataga ona o Iesu Keriso

Ona o le a tatou toetutu uma, o le a faasaoina i tatou uma—pe maua le faaolataga—mai le oti faaletino. Ae e le mafai ona maua le Toetu po o le faaolataga mai a tatou agasala e aunoa ma Iesu Keriso.

Sa puapuagatia o Ia mo a tatou agasala ina ia mafai ai ona tatou mama pe a tatou tatalo mo se faamagaloga ma taumafai e sui. Na maliu foi o Ia i luga o le satauro ma toetu mai le oti. Ona o Iesu Keriso, o le oti e le o le mutaaga lea.

Faamasinoga ma le Mamalu e Faavavau

I le taimi o le toetu, o le a faamasinoina i tatou taitoatasi e Iesu, lo tatou Faaola. O lenei faamasinoga mulimuli o le a faavae i o tatou manaoga, amioga, ma filifiliga.

E na o le Atua ma Iesu e silafia atoatoa o tatou loto ma tulaga o o tatou olaga, o lea e na o i La’ua lava e mafai ona faamasinoina atoatoa i tatou. O lenei faamasinoga o se tasi o le alofa, alofa mutimutivale, faamasinotonu, ma le tali atu mo ia lava (tagai i le 3 Nifae 27:14–15).

O le sini tupito a le Atua o le fesoasoani lea i Ana fanau uma ia toe foi atu e nonofo faatasi ma Ia i le malo selesitila.

O le fuafuaga a le Atua mo i tatou ua mafai ai ona maua le ola e faavavau faatasi ma Ia ma o tatou aiga. O le mulimuli i le fuafuaga o le fiafia a le Atua e aofia ai:

• Talitonu ia Iesu Keriso
• Salamo i a tatou agasala
• Papatisoina i Lona suafa.
• Mauaina o le Meaalofa a le Agaga Paia
• O le tausiaina o poloaiga a le Atua
• Salamo pe a tatou le atoatoa.