K’a’ut naq wanko sa’ li ruchich’och’ ut k’a’ru nak’ulman chirix naq nokokam

Li Dios, li qaChoxahil Yuwa’ aj rahonel, naraj naq taasaho’q qach’ool. A’an kixk’uub’ jun na’leb’ re naq toochalq sa’ li ruchich’och’, took’iiq, ut toosutq’iiq chi wank rik’in a’an chi junelik. Li na’leb’ kixk’uub’ naxk’e xyaalal li qayu’am ut naxsumeb’ li ninqi patz’om: “B’ar xinchal chaq?” “K’a’ut naq wankin arin?” ut “K’a’ru taak’ulmanq chirix naq tinkamq?”

Laa yu’am kitikla rub’elaj naq xatyo’la. Sa’ choxa, katwan jo’ musiq’ej rik’in li Dios ut chixjunileb’ li ralal xk’ajol sa’ musiq’ej. Chiqajunilo komono sa’ xjunkab’al, ut sa’ li yu’am naq maji’ nokoyo’la, kiqasik’ ru xtaaqenkil lix na’leb’ Dios. Li na’leb’ a’an naq toochalq sa’ ruchich’och’ re naq tooxik chi uub’ej sa’ xjayal li junelik q’e kutan.

Li Yoʼobʼtesink

Chi b’eresinb’il xb’aan li Dios, li Jesukristo kixyo’ob’tesi li ruchich’och’ ut chixjunil li k’a’ru yo’yo. Laj Adan ut xEva, a’aneb’ li xb’een musiq’ejil ralal xk’ajol li Dios ke’chal sa’ li ruchich’och’. Li Dios kixyo’ob’tesi lix junxaqalileb’ jo’ chanru xjalam-uuch a’an ut kixk’eheb’ sa’ li Awimq Eden.

Lix tʼanik laj Adan ut li xEva

Naq wankeb’ laj Adan ut li xEva sa’ li awimq, li Dios kixtaqlaheb’ naq ink’a’ te’xk’ux ru li che’ re xnawb’al ru li us ut li ink’a’ us.

Wi te’xpaab’ raj li taqlahom a’an, te’ruuq chi kanaak sa’ li awimq, a’b’an ink’a’ te’ruuq chi k’iik ut chi tzole’k xb’aan li ch’a’ajkilal re li yu’am a’in. Ink’a’ raj te’xnaw ru li sahil ch’oolejil xb’aan naq ink’a’ te’xk’ul ajwi’ li rahil ch’oolejil ut li rahilal.

Laj Satanas kiraale laj Adan ut xEva chixk’uxb’al ru li che’. Li xEva kixsik’ ru xk’uxb’al ru li che’ ut kixk’e ajwi’ ru li che’ re laj Adan. A’an ajwi’ kixsik’ ru xk’uxb’al. Xb’aan a’an, ke’isiik sa’ li awimq ut ke’isiik chiru li Dios. A’an li t’ane’k nayeeman re.

Li t’ane’k aajel ru choq’ re li winqilal ut rikʼin aʼan nokoʼosobʼtesiik chiqajunilo. Xb’aan li t’ane’k, kooru chi yo’laak sa’ li ruchich’och’ ut chi xik chi uub’ej sa’ li na’leb’ k’uub’anb’il xb’aan li qaChoxahil Yuwa’.

Li t’ane’k aajel ru choq’ re li winqilal ut rikʼin aʼan nokoʼosobʼtesiik chiqajunilo. Noko’osob’tesiik xb’aan li t’ane’k chi jo’ka’in:

• Laj Adan ut xEva ke’ru chik chi kamk.
• Ke’ru chiroksinkil li xtaql xch’ooleb’ re xsik’b’al ru li us ut li ink’a’ us.
• Naq ke’xk’ul xka’pak’alil li k’a’aq re ru, laj Adan ut li xEva ke’ru chi tzolok ut chi k’iik.
• Rik’in naq ke’ru chireek’ankil li rahil ch’oolej, ke’ru ajwi’ chireek’ankil li sahil ch’oolej.
• Xb’aan li t’ane’k, chiqajunilo kooru chi yo’laak sa’ li ruchich’och’ ut chi xik chi uub’ej sa’ li na’leb’ k’uub’anb’il xb’aan li qaChoxahil Yuwa’.

Xbʼaan lix tʼanik laj Adan ut li xEva, nokoʼosobʼtesiik rikʼin li tzʼejwalejil junxaqalil, rikʼin li qawankil chixsikʼbʼal ru li us ut li inkʼaʼ us, ut rikʼin naq naru chiqu xkʼulbʼal li qayuʼam chi junelik. Maajun rehebʼ aʼin taaruuq raj taqakʼul wi ta keʼkana laj Adan ut li xEva saʼ li awimq.

Laj Adan ut xEva ke’b’antioxin xb’aaneb’ li osob’tesink li ke’chal rik’in li t’ane’k:

“Laj Adan kirosobʼtesi li Dios ut kinujobʼresiik, ut kiʼok chi aatinak joʼ profeet chirix chixjunilebʼ li junkabʼal re li ruchichʼochʼ, ut kixye: Osobʼtesinbʼilaq taxaq xkʼabʼaʼ li Dios, xbʼaan naq xbʼaan li qʼetok aatin inbʼaan teebʼil xsaʼ wu, ut saʼ li yuʼam aʼin taawanq xsahil inchʼool, ut saʼ li tzʼejwalej tinwil wiʼchik ru li Dios.

“Ut li xEva, li rixaqil, kirabʼi chixjunil li kʼaʼaq re ru aʼin ut kisahoʼ xchʼool, kixye: Wi ta inkʼaʼ xooqʼetok aatin maajun wa raj kiwan qiyajil, ut maajun wa raj kiqanaw ru li us ut li inkʼaʼ us, ut li sahil chʼoolejil re lix tojbʼal qix, ut li junelik yuʼam li naxkʼe li Dios re chixjunilebʼ li nekeʼabʼin chiru.”

Li wank sa’ li ruchich’och’ a’an jun raqal aajel ru sa’ lix ch’ina-usil na’leb’ li Dios choq’ qe chiqajunjunqal. Li k’a’ru naqak’ul arin nokoxtenq’a chi tzolok, chi k’iik, ut chixkawresinkil qib’ re sutq’iik rik’in li qaYuwa’ sa’ Choxa.

Lix tojb’al rix li maak xb’aan li Jesukristo a’an xch’oolil lix k’uub’anb’il na’leb’ li Dios re sahil ch’oolejil.

• Xb’aan lix t’anik laj Adan ut li xEva, nokonume’ sa’ li maak ut li kamk.
• Xb’aan naq li Dios nokoxra, kixtaqla li Jesukristo, li Ralal, re xtojb’al qix chiru li maak ut li kamk.
• Xb’aan naq li Jesus kixtoj rix li qamaak, naru taakuye’q ut taach’aje’q li qamaak ut naru taajalaaq li qach’ool. Chi jo’kan, naru tooq’ajq rik’in li Dios ut naru taqak’ul li sahil ch’oolejil maak’a’ roso’jik.

Li Jesukristo naxyeechi’i li qak’irtesinkil, li qayo’onihom, ut xk’ojob’ankil li qach’ool. Lix tojb’al rix li maak, a’an tz’aqal reetalil lix rahom. Chixjunil li k’a’ru ink’a’ tiik sa’ li yu’am a’in naru taatuqub’aaq rik’in lix tojb’al rix li maak xb’aan li Jesukristo.

Jo’ naq koowan rub’elaj li qak’ulunik sa’ li ruchich’och’, toj toowanq chirix naq tookamq. Li xnawb’al a’in naru tixk’ojob’ qach’ool naq kamk reheb’ li qaraarookil komon. Nokoyaab’ak chirixeb’ li qakomon li neke’kam, a’b’an wan qoyb’enihom rik’in li Jesukristo—li kamk maawa’ a’an xraqik chixjunil (chi’ilmanq Jwan 11:25–26).

Li ruchichʼochʼ rehebʼ li musiqʼej

Naq nokokam, li qamusiq’ ut li qajunxaqalil neke’xjach rib’. Us ta nakam li qajunxaqalil, li qamusiq’—a’an lix ch’oolil aniho laa’o—toj nawan xyu’am. Li qamusiq’ naxik sa’ li ruchich’och’ reheb’ li musiq’ej, a’an jun xq’ehil li tzolok ut li kawresink-ib’ toj reetal naq taqak’ul li maatan re li wakliik chi yo’yo.

Li wakliik chi yo’yo

Li wakliik chi yo’yo a’an lix junajinkil wi’chik li qajunxaqalil rik’in li qamusiq’ ut chi jo’kan naq nokoxik chi uub’ej toj sa’ li junelik q’e kutan.

Naq toowakliiq chi yo’yo, tz’aqalaq re ru li qajunxaqalil, ut maak’a’aq chik xrahilal chi moko xyajel. Ink’a’ chik tookamq, ut yo’yooqo chi junelik.

Rik’in lix tojb’al rix li maak ut lix waklijik li Kolonel chi yo’yo, chixjunileb’ li yo’lajenaqeb’ te’wakliiq chi yo’yo (Alma 11:42–44).

Li kolb’a-ib’ nachal sa’ xk’ab’a’ li Jesukristo

Xb’aan naq chiqajunilo toowakliiq chi yo’yo, chiqajunilo tookole’q chiru li kamk. Ink’a’ tooruuq chi wakliiq chi yo’yo chi moko kole’k chiru li qamaak wi ta maak’a’ raj li Jesukristo.

A’an kixk’ul rahilal sa’ xk’ab’a’ li qamaak re naq wi tootijoq re xpatz’b’al xkuyb’al qamaak ut taqajal qak’a’uxl, naru tooch’aje’q. A’an kikam ajwi’ chiru li krus ut kiwakli sa’ xyanqeb’ li kamenaq. B’antiox re li Jesus, li kamk maawa’ a’an li roso’jik.

Li raqb’a-aatin ut li junelikil loq’al

Naq toowakliiq chi yo’yo, taaraqe’q aatin chiqix chiqajunjunqal xb’aan li Jesus, laj Kolol qe. Taaraqe’q aatin chiqix a’ yaal li qajom, li qab’aanuhom, ut li b’e naqasik’ ru.

Ka’ajwi’ li Dios ut li Jesukristo neke’xnaw ru chi tz’aqal li qaam ut li nokonume’ wi’ sa’ li ruchich’och’, jo’kan naq ka’ajwi’ eb’ a’an naru neke’raqok aatin chiqix chi tz’aqal re ru. Li raqb’a-aatin a’in a’anaq re rahok, uxtaan, tiikilal, ut li teneb’aak (chi’ilmanq 3 Nefi 27:14–15).

Li tz’aqal rajom li Dios a’an xtenq’ankil chixjunileb’ li ralal xk’ajol chi sutq’iik re wank rik’in a’an sa’ li choxahil awa’b’ejihom.

Rik’in lix k’uub’anb’il na’leb’ li Dios choq’ qe naru taawanq qayu’am chi junelik rik’in a’an ut li qajunkab’al. Xtaaqenkil lix k’uub’anb’il na’leb’ li Dios re sahil ch’oolejil naraj naxye:

• Xpaab’ankil li Jesukristo
• Xjalb’al qak’a’uxl chirix li qamaak.
• Xkub’sinkil qaha’ sa’ xk’ab’a’ a’an.
• Xkʼulbʼal li maatan re li Loqʼlaj Musiqʼej.
• Xpaab’ankileb’ lix taqlahom li Dios.
• Xjalb’al qak’a’uxl naq nokosach.