Unsa ang Kahulogan sa Pagkabanhaw alang Kanimo?

Si Presidente Dallin H. Oaks, Unang Magtatambag sa Unang Kapangulohan, miingon: “Sa pagbawi kanato gikan sa kamatayon ug sa sala, ang atong Langitnong Amahan mohatag kanato og usa ka Manluluwas. Ang Iyang Pagkabanhaw motubos sa tanan gikan sa kamatayon.”

Sa panahon sa mortalidad nahimulag kita sa temporal ug espirituhanon nga paagi gikan sa presensya sa Dios (tan-awa sa Alma 42:6–9). Gipadala si Kristo sa pagpuyo og mortal nga kinabuhi dinhi sa yuta isip kabahin sa plano sa kaluwasan, sa paghatag og paagi alang sa matag usa kanato sa pagbalik ngadto sa presensya sa Langitnong Amahan. “Kay maingon nga diha kang Adan ang tanan nangamatay, maingon man usab diha kang Kristo ang tanan mangabuhi” (1 Mga Taga-Corinto 15:22). Si Elder D. Todd Christofferson sa Korum sa Napulog Duha ka Apostoles mitudlo: “Ang Manluluwas naghimo sa tanang butang nga matarong. Walay inhustisya sa mortalidad nga permanente, bisan ang kamatayon, kay Siya mipahiuli sa kinabuhi pag-usab. Walay mga kasakit, kakulangan, pagluib, o pang-abuso nga dili kabayran sa kataposan tungod sa Iyang walay kinutoban nga kaangayan ug kaluoy.”

Sa unsang paagi ang pag-angkon og kahibalo sa tahas sa Manluluwas diha sa plano sa Dios nagtabang kaninyo sa pagduol ngadto ni Kristo?

Kon kita nakasala, mahimong bation nato nga makonsiyensya o maulaw, apan si Kristo “magahinlo kanato gikan sa tanang pagkadili makatarunganon” (1 Juan 1:9) samtang kita maghinulsol. Tungod sa Iyang Pag-ula ug Pagkabanhaw, adunay gahom si Kristo isip usa ka “magtutunaw ug mag-uulay” (Malaquias 3:3).

Si Elder Ronald A. Rasband sa Korum sa Napulog Duha ka Apostoles nangutana, “Kanunay ba kitang mapasalamaton alang sa dili ikatandi nga Pag-ula ni Jesukristo? Ato bang nabati ang makapaputli nga gahom niini, karon mismo?”

Sa unsang paagi imong nabati ang makaputli nga gahom ni Jesukristo diha sa imong kinabuhi?

Tungod kay gibuntog ni Jesukristo ang kamatayon, “ang lubnganan walay kadaogan” (Mosiah 16:8).

Si Elder Gerrit W. Gong sa Korum sa Napulog Duha ka Apostoles miingon: “Ang pagkabanhaw naglakip sa pisikal nga pagpahiuli sa atong ‘tukma ug hingpit nga bayanan’; ‘matag bahin sa lawas ug lutahan,’ ‘gani bisan buhok sa ulo dili mawala’ [Alma 40:23]. Kini nga saad naghatag og paglaom niadtong nawad-an og mga bahin sa lawas; kadtong kinsa nawad-an sa kapasidad sa pagkakita, pagkadungog, o paglakaw; o kadtong naghunahuna nga napilde sa walay hunong nga sakit, nawad-an sa maayong pangisip, o sa ubang nagkakunhod nga kapasidad. Siya makakita kanato. Siya moayo kanato.”

Unsaon nimo paggamit og mas maayo ang paglaom sa Pagkabanhaw diha sa imong kinabuhi?