Digital Lamang: Mga Young Adult
Nagpili sa Pagsalig sa Dios Pag-usab Human Nasinati ang mga Hagit diha sa Akong Misyon
Ang tagsulat nagpuyo sa Espanya.
Ang akong misyon wala matuman ingon sa akong gihunahuna, ug kana mibilin kanako og pagbati nga kalibog ug pag-inusara—hangtod akong nakat-unan ang pagbutang sa akong pagsalig diha sa Dios.
Sa dihang ako misugod sa akong misyon, ako dihay taas nga mga gipaabot. Moserbisyo ako sa matinud-anong paagi, mobunyag og daghang mga tawo, ug mopauli uban ang pagsalig ug makadasig nga mga istorya nga iistorya. Himoon kong mapasigarbohon ang akong pamilya.
Bisan pa niana, sa akong tibuok nga pagbansay, ako sa wala damha napuno sa kabalaka. Gihigugma ko ang ebanghelyo—wala ako makasabot nganong kini malisod kaayo alang kanako sa pagpakigbahin niini. Nakigbisog nga mobati nga masaligon samtang nagtudlo mihimo kanako sa pagsugod og duda sa akong kaugalingon ug sa akong hugot nga pagtuo.
Samtang ang panahon nagpadayon, nahimo akong nagmagul-anon (ang COVID-19 wala usab makatabang). Ang akong presidente sa misyon dili kaayo sinati sa mga pakigbisog sa mental nga kahimsog, ug dili kami kanunay nga konektado pag-ayo atol sa among mga panagsultihanay. Misugod ako sa pakigkita og magtatambag, nga mitabang pag-ayo, apan ang akong mga pakigbisog sa ebanghelyo wala mopalayo. Nahadlok akong makigsulti pag-usab sa akong presidente sa misyon mahitungod sa akong mga pagbati tungod kay ako nahadlok nga iya akong papaulion, ug ako gusto nga mohuman sa akong misyon.
Sayop akong mituo nga ang mga tawo kinahanglang dili makigbisog sa misyon o sila maningkamot sa pagbuhat unsa ang matarong, busa ang akong sitwasyon milibog kanako. Dili ba ako unta magsinati og hingpit nga kalipay ingon nga ako nagbuhat sa buhat sa Ginoo?
Hugot nga Pagtuo taliwala sa Kalisod
Human matapos ang akong misyon, ako nakigbisog sa pagpangita og mga tubag ug suporta mahitungod sa akong komplikadong mga pagbati. Wala akoy kontak sa akong mga kompanyon o presidente sa misyon, ug gibati nako ang dakong kaulaw mahitungod sa akong mga pagbati. Nahadlok akong makigbahin niini tungod kay walay laing ingon og nakigbisog sa ilang mga misyon—o sa labing ubos sila wala maghisgot mahitungod niini.
Usa ka adlaw niana sa simbahan, ang akong magtutudlo sa Sunday School mihisgot mahitungod kon giunsa sa iyang anak nga lalaki, kinsa matinud-anong mipuyo sa ebanghelyo ug miserbisyo og usa ka misyon, nagpadayon nga nag-atubang og mga hagit sa iyang kinabuhi ug mibati og sama nga kini dili patas. Gihulagway niya ang samang sitwasyon nga ako anaa!
Mipamatuod siya nga ang pagbaton sa kahibalo sa ebanghelyo dili mopanalipod kanato gikan sa mga kalisod ug mga hagit, apan ang pagbaton og hugot nga pagtuo ug pagsunod sa atong mga pakigsaad makatabang kanato sa pagdawat og kalig-on gikan sa Langitnong Amahan ug ni Jesukristo ug sa kahupayan sa Espiritu Santo.
Ang kinabuhi mahitungod sa pagpili sa pagsalig sa Langitnong Amahan diha niadtong mga higayon ug pagkaplag sa kalinaw, pagtubo, ug mas dakong hugot nga pagtuo taliwala sa kalisod ug sa pagkadili patas.
Si Presidente Henry B. Eyring, Unang Magtatambag sa Unang Kapangulohan, makausa mitudlo: “Ako nangandoy sa pag-awhag niadtong kinsa mga anaa sa taliwala sa malisod nga mga pagsulay, kinsa mibati sa ilang hugot nga pagtuo nga nagkawala ubos sa pag-atake sa mga kasamok. Ang kasamok mismo mahimong inyong paagi sa paglig-on ug sa kataposan makaangkon og dili matarog nga hugot nga pagtuo.”
Akong naamgohan nga ang mga misyon, ug bisan unsa nga gihangyo sa Ginoo kanato nga buhaton, dili sa kanunay nga masayon. Ug sa tanan, ang mga pagsulay nga akong gihunahuna nga nagpaluya sa akong hugot nga pagtuo mao ang mga kiasinatian nga makapalig-on niini. Gikinahanglan nakong usbon ang akong panglantaw. Pinaagi sa akong Langitnong Amahan ug sa Iyang Anak, si Jesukristo, makatugot ako sa mga kalisod nga akong giatubang sa akong misyon ug human sa pagpatubo sa akong hugot nga pagtuo.
Pagsalig Pag-usab
Si Elder Dieter F. Uchtdorf sa Korum sa Napulog Duha ka Apostoles bag-ohay nga mitudlo: “Ang hugot nga pagtuo molahutay sa mga pagsulay ug sa mga walay kasigurohan sa kinabuhi tungod kay kini lig-on nga nakagamot diha ni Kristo ug sa Iyang doktrina. Si Jesukristo, ug ang atong Amahan sa Langit kinsa mipadala Kaniya, nag-uban paglangkob sa usa nga walay pagtipas, hingpit nga masaligan nga tumong sa atong pagsalig.”
Kon ang kinabuhi nahimong lahi sa atong gipaabot, imbis magtuo nga ang Langitnong Amahan mibiya kanato o nga ang ebanghelyo dili tinuod, kita makapili sa pagsalig Kaniya.
Nakat-onan ko usab kon unsa ka importante kini ang pagpakigsulti ngadto sa kasaligan nga mga tawo ug dili mag-antos diha sa kahilom. Dili tanan hingpit nga mosabot sa atong mga kasinatian, apan ang makahuloganong mga koneksiyon ngadto sa uban hilabihan ka importante sa atong mental ug espirituhanong kaayohan.
Ang atong Langitnong Amahan nahigugma kanato sa hingpit, ug kita adunay usa ka Manluluwas kinsa nakasabot kanato. Gusto Nila kanato nga mahinumdom nga kita makasalig Kanila—sa kanunay.