Digital Lamang: Mga Young Adult
4 ka mga Paagi sa Pagkaplag og Kalinaw Kon Nag-atubang og Dili Matarong nga Paghukom diha sa Simbahan
Kon magpunting kita diha ni Jesukristo, kita mobati sa hingpit nga kalipay ug kalinaw sa ebanghelyo sa atong mga kinabuhi.
Ang gipahiuli nga Simbahan ni Jesukristo usa ka dapit sa hingpit nga kalipay, paglaom, ug pagkanasakop. Kini usa ka komunidad diin kita magkapundok isip mga disipulo ni Kristo sa pagpakita sa atong gugma alang Kaniya ug alang sa usag usa, ug kini usa ka dapit diin daghang mga tawo adunay talagsaong mga kasinatian. Apan isip dili hingpit nga mga tawo dinhi sa dili hingpit nga kalibotan, usahay atong itandi ang atong mga kaugalingon ngadto sa atong isig ka mga disipulo o gani mohatag og dili patas nga paghukom sa usag usa.
Tingali ikaw nakasinati og paghukom tungod sa pagbaton og lahi nga opinyon. Tingali ikaw nakaatubang og dili pag-uyon tungod sa paghimo og usa ka sayop. O tingali ikaw nalambigit sa hitabo o mga hungihong pinaagi sa sayop nga dili imong kaugalingon. Bisan tuod kini sakit ang pagsinati og pagsaway gikan sa uban, ilabi na gikan sa ubang mga miyembro sa Simbahan, nagtanyag si Jesukristo kanato og paglaom ug pagkaayo. Kon ikaw nanlimbasog sa pagbati nga madawat sa simbahan, ania ang upat ka butang nga makatabang kanimo sa pagkaplag og kalinaw pinaagi ni Kristo.
1. Hinumdomi kon Giunsa sa Ginoo sa Pagtan-aw Kanimo
Kini normal nga gusto kitang hunahunaon sa uban nga may respito. Kon ikaw nanlimbasog sa gibug-aton sa mga opinyon sa uban, kini importante ang paghinumdom nga ang Langitnong Amahan ug si Jesukristo nakakita kanimo ug nahigugma kanimo sa hingpit.
Sa Mga Taga-Roma 8:39 mabasa, “[Walay] arang nga makapahimulag kanato gikan sa gugma sa Dios, nga anaa kang Kristo Jesus nga atong Ginoo.” Kon kita mahinumdom nga ang labing gamhanan nga Binuhat sa kalibotan nahigugma kanato ug gusto sa labing maayo alang kanato, ang opinyon sa uban dili kaayo ingon ka importante. Ang Iyang Anak, si Jesukristo, mao ang atong Manluluwas ug higala, ug Siya nakaila kanato sa hingpit. Kon kita magsunod sa mga sugo ug naghiusa sa atong mga kaugalingon ngadto Kanila pinaagi sa mga pakigsaad, kita modawat og kalig-on sa paghupot sa mga hagit nga atong giatubang. Ug kana naglakip sa kalig-on sa pagsagubang sa mga paghukom ug pagkawalay puangod sa uban.
Sa panan-awon ni Lehi, kadtong kinsa naminaw sa mga tawo diha sa dako ug lapad nga gambalay nahulog gikan sa gunitanan nga puthaw ug sa kataposan gikan sa kahoy sa kinabuhi (tan-awa sa 1 Nephi 8:31–34). Apan sama sa mga tawo kinsa wala maminaw niadtong diha sa dako ug lapad nga gambalay ug nanggunit pag-ayo ngadto sa gunitanan nga puthaw, samtang kita naghupot sa atong mga kasingkasing nga nakapunting diha sa pulong sa Dios ug sa Iyang mahangturong gugma, kita makahimo sa pagbale-wala sa masakit nga mga tingog sa uban.
2. Pagkaplag og Kalinaw diha sa Paghinulsol
Kon ikaw gisaway tungod sa usa ka sala o sa usa ka sayop nga imong nahimo, pahinumdomi ang imong kaugalingon nga ang Ginoo lamang ang hingpit nga nahibalo sa imong kasingkasing ug mga katuyoan. Kon kinahanglan, ang imong bishop o presidente sa branch makatambag kanimo samtang ikaw nagtinguha sa paghinulsol. Samtang ikaw kinasingkasing nga naghinulsol sa imong mga sala ug naningkamot sa pagbuntog sa imong mga kahuyang, imong bation ang personal nga kalinaw ug pagsalig nga ang Ginoo lamang ang makahatag.
Si Elder K. Brett Nattress sa Seventy sa makausa mipakigbahin sa istorya kalabot sa usa ka batan-ong lalaki nga iyang kaila kinsa mibuntog sa usa ka seryosong adiksiyon sa droga. Bisan human sa paghinulsol ug sa pagserbisyo og misyon, kining batan-ong lalaki sa gihapon naguol nga siya wala mapasaylo sa iyang miaging mga kasaypanan.
Miingon si Elder Nattress ngadto kaniya, “Sa tinuod ikaw napasaylo na! Talagsaon ikaw! Karon ang angay nimong buhaton mao ang pagpadayon sa imong kinabuhi. Ayaw lingia ang kagahapon! Tan-aw sa unahan uban sa hugot nga pagtuo ngadto sa sunod nga ordinansa.”
Kon ang mga tawo nga nagpalibot kanimo nagpunting sa imong nangagi nga mga sala, tan-aw ngadto sa mga pulong ni Isaias:
“Ngari kamo, ug maghusay kita, nag-ingon ang Ginoo: bisag unsa ka pula ang inyong sala, maputi kini kaayo; bisan pa kinig dagtom-pula, maputi kini sama sa balhibo sa karnero.
“Kon andam kamong magmasinugtanon, makakaon kamo sa maayong abot sa yuta” (Isaias 1:18–19).
Pagbaton og hugot nga pagtuo sa maulaong sakripisyo ni Kristo. Nagpakamatay siya alang kanimo tungod kay Siya gusto kanimo nga maghinulsol ug mobalik ngadto Kaniya. Samtang ikaw naningkamot sa pag-usab ug sa pagpahisubay sa imong kinabuhi ngadto sa Langitnong Amahan ug ni Jesukristo, ikaw makasinati sa kalinaw sa usa ka limpyo nga konsyensya.
3. Hibaloi nga ang Pagpasaylo Posible
Kon ang mga tawo naghukom kanimo sa dili matarong nga paagi, kini masayon sa pagpalambo og mga pagbati sa kasuko. Apan ang paghambin og pagdumot o ngil-ad nga mga pagbati nagpatunhay lamang og dugang nga walay kalipay.
Sa Doktrina ug mga Pakigsaad 64, si Jesukristo mitudlo:
“Kamo kinahanglan nga mopasaylo sa usag usa …
“Ako, ang Ginoo, mopasaylo kinsa Ako mopasaylo, apan kamo gikinahanglan nga mopasaylo sa tanan nga mga tawo” (mga bersikulo 9–10).
Kon imong makita kini nga malisod ang pagpasaylo, hangyoa ang Langitnong Amahan sa pagtabang kanimo sa pagsunod sa tambag sa Manluluwas diha sa Bag-ong Tugon: “Higugmaa ninyo ang inyong mga kaaway ug pag-ampo kamo alang sa nagalutos kaninyo” (Mateo 5:44).
Mahimong bation nimo nga kini labing maayo alang kanimo nga dili magpabilin nga suod sa usa ka higala o miyembro sa ward kinsa naghukom kanimo—ug kana OK. Bisan kon ikaw magdesisyon nga nagkinahanglan ka og gintang gikan niini nga tawo, ang Dios makatabang kanimo nga mamaayo ug makapasaylo.
4. Pagpalambo og Positibo nga mga Panaghigalaay
Ang Daang Tugon nagtudlo sa importansya sa maayong mga panaghigalaay: “Ang duruha labi pang maayo kay sa usa; … kay kon sila mangapukan, ang usa magabangon sa iyang kauban” (Ecclesiastes:4:9–10). Ang maayong mga higala makaawhag kanato kon kita naluya ug naglig-on sa atong determinasyon sa pag-uswag.
Kon ikaw mibati og kamingaw o nag-inusara, ikaw makapangita og mga oportunidad sa pagtukod og mga panaghigalaay uban sa mga tawo kinsa gusto sa labing maayo alang kanimo. Samtang ikaw nangita og mga higala, ang ikanapulog tulo nga artikulo sa hugot nga pagtuo makahatag og pipila ka makatabang nga mga giya. Pangita og mga tawo kinsa naninguha sa “pagkamatinuoron, pagkamatinud-anon, pagkaputli, pagkamanggiloloy-on, mahiyason, ug … pagbuhat sa matarong ngadto sa tanan nga mga tawo.”
Si Jesukristo Dili Gayod Mopasagad Kanimo
Kini nasulti na sa makadaghang higayon kaniadto, apan kini importante nga kamatuoran nga pagahinumdoman—ang Simbahan gilangkoban og dili hingpit nga mga tawo. Ug bisan kita naningkamot sa atong labing maayo sa pagsunod sa ehemplo sa Manluluwas, ang tanan kanato mohimo og mga kasaypanan. Apan samtang kita modangop ngadto ni Jesukristo, makasinati kita sa gasa sa gugmang putli ug tinuod nga pagkaayo kon kita masakitan ug madasig sa pagpangayo og kapasayloan gikan niadtong atong napasakitan.
Kon kini ingon og ang uban batok kanimo, Siya kinsa hingpit dili gayod mopasagad kanimo.