Ko tēhea te Hāhi Tika?

I tēnei wā o te whakaohorere nui, i meinga ai ōku mahara kia kaha te hurihuri, ā kāore i te tatū. … he maha ōku meatanga ki ahau anō: Me pēhea rā? Ko tēhea o ēnei roopu katoa e tika ana; arā kei te hē katoa rānei rātou? Mehemea e tika ana tētahi o rātou, ko tēhea, ā me pēhea e mōhio ai au ki tērā?

I a au e mahi ana i raro i ēnei take uaua, he mea nā ngā tohetohenga a ngā rōpū karakia, ka pānui ahau i tētahi rā, i te Pukapuka a Hēmi, te tahi o ngā upoko, te rima o ngā rārangi, pēnei ngā kupu; “Ki te hapa tētahi o koutou i te mātauranga, me inoi ia ki te Atua e homai nui nei ki ngā tāngata katoa kāhore hoki āna tāwai mai; ā ka homai ki a ia.”

Kāhore he rārangi karaipiture i pēnā te kaha ki te ngākau tangata i pēnā i tēnei ki a au i tēnei wā. I tino kaha tōna ākinga mai ki roto i ngā wāhi katoa o tōku ngākau. Honohono tonu ōku mahara mō runga i taua mea, nō te mōhio hoki mehemea tērā tētahi tangata e hapa ana i te mātauranga nō te Atua, ko ahau ia. Nō te mea kīhai ahau i mōhio me pēhea rānei, ā ki te kāhore e nuku ake taku mātauranga, e kore rawa ahau e mōhio; nō te mea ko ngā kai whakaako o ngā Hāhi huhua e rereke ana ō rātou mōhiotanga ki ngā rārangi karaipiture, hei whakangaro i te whakapono e taea ana e te ui ki te Paipera te mea i ngā whakaaro kia tatū.

Nāwai ā, i mea ahau me noho tonu ahau i roto i te pouritanga me te pōauautanga, me pērā rānei ki tā Hemi i mea ai, arā, me inoi ki te Atua; nāwai ā, ka tatū tōku whakaaro kia “inoi ki te Atua”, me te mahara, mehemea ka hōmai e ia te matauranga ki te hunga e hapa ana i te mātauranga, ā ka homai nui, ā kāhore he tāwai, e tika ana me pērā ahau.