Suobel el mo er a Remeklou el Chad: Suobel el mo er a Roungalek el Kirel a Technology

Kid a roungalk, a soad a klungiaol el mo er a rengeleked, e tia uldimukl er ngii a osischekelterir el mo meduch lousbech a mesil klekedall er tial beluulechad. Chelsel tial suobel, e kede mo mesaod a teletael el sebeched el ngosuterir a rengeleked el mo ungil lousbech a technology, meng diak bo lomtebechel er tir. Kede mo mesaod a beot el teletael el ngosukid lomekrael er a rengalk el mo ngarngii a moktek er tir lousbech a technology.

Klungiolel

• A Ikelesia ousbech a technology el mengedecheduch e omerk er a ebangkelio er a beluulechad el rokir.

• A technology meskid a techelled el ngmai a llomes e sebechel a ududed.

Kngtil

• A kngtil a temed lousbech er ngii, e sel kmal kngtil, a tomer a techall me a klengeltengat el me er kid.

• A lak de kerkikl, e kede kmal mo mechesang er a kmo ngerang el diak a belkul, a lechub eng oridid er a telbiled me a teletael dongeleuolou.

Philipi 4:8

• E sel ulebongel, e rodam, e a ngii di el ngerang el klemerang, ngii di el ngera el bleketakl, ngii di el ngera el melemalt, ngii di el ngera el klikiid, ngii di el ngera el klebokel, ngii di el ngera el ungil tekoi; a le ngarngii a kldung, a le ngarngii odanges, e momtab aika el tekoi.

A rechad er a omesuub, science, me a remeruul a mla metik a teletael el ngosuterir a rechad me te mo kerkikl el kirel a klemanget er a taem me sel klungiolel a rengrir el ngara technology. Ng kmal di uaia siobai el meruul a kall. A science a mla ngosuterir a rechad er a kombalii el meruul a kall me te remuul “kmal mo ungil” el k mal mo ungil a telemtemul. A leuaisei eng kngtim a lsekum e ke blechoel soam a lmuut el bebil?

Oi, ng uaisei … e dirrek el diak. A technology meng dirrek el m“engesuseu er kid,” e omtebechel a domelchesiu er a bedenged el melemolem lousbech er ngii. Ng chetim a lsekum eng meringel er kau el mondiak mousbech a technology? Ng kmal mechitechut a rengum? Ng diak. A lungil a rengud lousbech er a technology a di ungil, eng di a domtebechel a usbechelled er a technology a sebechel kmal meringel. Ke meringel loldekedek a tekoi er a science, me a bdelum lomdasou, me a klausichai er a kombalii el mengesuseu— e diak el beot el tekoi.

Ng klou a belkul bo dodengei el kmo a remeklou el chad me te dirrek el kurusii er a usbechellel a technology el di uaia rengalek. Ng sebeched el soiseb er sel “omengesuseu” el teletael er a technology e mo diak dolchesuar a taem el di merael, el di uaia rengeasek me a rengalek.

• A technology a dongu lomak er kid el mo er a llomes er a beluulechad e sebechel usbechall el kirel a klungiaol.

• A bo deblechoel lousbech a technology, e ng klou el udoud el mo er a remeruul a technology.

• A remesuub me a romeob a technology a ousbech a duch el meruul er kid me kede di mechesang e ungil a rengud lousbech, el di uaia kombalii er a omeruul kall el “mengesuseu er kid.”

• A Chedam er a Babeluades me a Osobeled a kmal medengelii a ringel el de ngara chelsel kirel a technology e mo melisiich er kid.

2 Korinth 12:9

• E dilu er ngak el kmo, A krasia er ngak a medeel kirem: le klisichek a mo cherrungel lokiu a chelitechetuk. Ng meral dmeu a renguk er a ringel el ngak a ngar ngii, me a klisichel a Kristo bo lobengkek.

• Ng kired el mo medengei el kmo a technology a “mengesuseu” a domelchesiu me a uldesued.

• Eng bleketakl el de ngara ringel er a usbechellel a technology. Kede oldekedek a tekoi er a science, uldesued, me a siobai el mengesuseu er kid.

• Ng sebeched el mo omtebechel a usbechelled er a technology sel dil kid loker a ngarngii a belkul ker, kudmkelii a moktek, e olengull a lsekum eng kired lolengull.

• Mo kerkil aikel domes me a klekedall el dousbech-dmedesii a basio er a rekeblid a sebechel ngosukid el mo selbechakl er sel “mengesuseu” lusbechellel a technology.

Mateus 26:41

• Bom klekar e moluluuch, me lak mechetikaik; a reng a soal, eng di tech a mechitechut.

Kid a roungalek, a sebeched lochotii okesiu el mo er a rengeleked el mo kerkikl a usbechelled er a technology. Ng kirel mo ngarngii a telkelel a usbechelled er a technology e mo oureor el kirel aikel ongetikaik meng diak lengelakl a temed lousbech er ngii meng sebechel mekdebechii a ungil deleuill er kid me a technology el kired me a telungalek er kid. Molbedebek el kmo, kid a kantok er a usbechelled er a technology, ng diak el ngii kantok er kid.

A. Moktek: Meral lousbech a technology el mesuub e meruul.

Kolose 3:23

• Me a ngii di el ngera el moruul, e moruul er ngii, el kirel a Rubak, e diak el kirel a chad.

• Moker a ker el uaia “Ngera uchul me a kusbech er ngii er chelechang?” me a “Ngungil a renguk el kirel a kuruul er ngii?”

A ungil usbechellel a technology a uldiukl er ngii a oldurokl a ungil klumech, orrenges a kellechakl chelitakl, e di kau el meruul a kuk ungil soam. Ngera bebil er a ungil el sebechem el mdasou?

B. Kudmeklii a moktek: Omuchel kudmeklii a ungil moktek.

Osisechakl 16:3

• A urerem bo lolutk el kirel a Rubak, e a ngara uldesuem a mo mekedmokl.

• Moker kau el kmo “Ngera moktek er ngak lousbech er a technology?” me a “Ngera lolangch a kumsa Dios er a usbechellel a temek?”

A ungil luldasou er a moktek a uldimukl er ngii a kudmeklii a klemanget er a taem el mousbech a technology, el di mengedecheduch er a re kmeed el chedal a telungalek me a resechelei, kudmeklii a basio er a blai el diak a technology er ngii, oterkeklii a basio er a blai el mcharge a technology er ngii, e ousbech a filter. Ngera bebil er a teletael el ngosukau me a rengelekem el mo melilt a ungil usbechellel a technology?

C. Olengull: Kuk olengull a lsekum eng kirem.

Psalm 46:10

• Bom chelellakl, e modengei el kmo ngak a Dios.

• Moker kau a ker el uaia “Ngak ak mengeroid er ngak a teletael el diak lungil a lechub eng diak a moktek er ngii” me a “A kulmelchesiu er a Chedaol Reng el mo cheroid er ngak?”

A bebil er a ungil teletael el kuk olengull er a usbechellel a technology a uldimukl er ngii a mo mecherei e mo cheroid er ngii, meluluuch el kirel a klisiich, e mengedecheduch er a tara chad. Ng mekera telungalek er kau e kuk olengull er a usbechellel a technology a lsekum eng kirel?

V. Chadecheduch el betok el chad

Chelecha el bla desaod a bebil er a ungil usbechellel a technology, e dechadecheduch el rokui. Ng soak el rmeenges a uldesuiu el kirel a usbechellel a technology e mekera a momtebechel er ngii er a klengar kemiu.

1. Ngera sel kot el meringel tekoi el mchelbangel er ngii el kirel a usbechellel a technology er a blimiu?

2. Ngera el ungil tekoi a somiu a rengelekiu a bo lodengei el kirel a usbechellel a technology?

3. Ngera ng rulii a technology er a deleuill me a rolel a cheldecheduch er a telungalek er kemiu?

4. Kuk ngera el teletael a mousbech a technology er a telungalek er kemiu? Ngera ng rulii a lechub eng tomelii er a temiu el dmak?

5. Ng mekera om kantok a klungiolel me a kngtil a usbechellel a technology er a telungalek er kemiu er a bek el sils?

6. Ngera ikel mues el technology rulii el kirel omesubel a ngelekem? Ke mekera mo medengei el kmo te ungil lousbech er ngii?

7. Ngera telmellel a technology er a ulekereuil a uldesuel a ngelekem? Ngera ikel moruul el torob a kngtil a technology?

8. Ngera olakel er a usbechellel a technology er a blim? Ng mekera omolisiich?

9. Ng mekera mochotii a ungil okesiu er a usbechellel a technology el mo er a rengelek?

10. Ngera el klekedall a lechub e ngesou a omousbech el mo ungil mtebechel a usbechellel a technology er a blim?

11. Ngera ng mla rulii a technology er a deleuill er ngak me a rengelekek?

12. Ngera bebil er a kengaol tekoi el kirel a usbechellel a technology er a blai? Ng mekera omorrob aikaikid el kengaol tekoi/

13. Ngera el ungil tekoi a soam a rengelekem a bo lodengei el kirel a usbechellel a technology? Ng mekera moltirakl aika el ungil teletael?

14. Ke mekera kudmeklii a moktek er a usbechellel a technology el kirel a telungalek er kau el kirel a kngtil a technology, e melemolem loltirakl er ngii?

15. Ng mekera mousbech a technology el uaia le dongu er a omesubir me a ulekerulir a rengelekem e diak el ua di longesang er tir?

VI. Uldasou el Kirel Osischeklel a Technology er a Blai

Momuchel mesaod a urerel a technology er a klengar kid e mekera sebechel tomall a blekerdeled me a domelchesiu.

A. Msodii a klou el ultutelel a ungil usbechellel a technology

Mouchais el kmo ng mekera technology a dongu el kirel a klungiaol, eng di dirrek el sebechel mo mekngit a lskeum eng mo kantok er kid. Msodii el kmo ng klou a ultutelel el dungil lousbech a technology meng diak el bol kantok er kid.

B. Molisechakl aikel luldasou el kirel a ungil usbechellel a technology

Mluut el smaod aikel tekoi er a ungil usbechellel a technology el beldukl er sel (moktek, uldasou, me a olengull). Mosaod el kmo ng mekera dersta er ngii a ngosuterir el mo kantok a usbechellir er a technology.

C. Momdasou a rolel e te mo oltirakl aika el tekoi er a rekeblirir

Mosaod a kakerous el teletael el technology a sebechel mo monddai, el uaia kuk kmal klou el taem a mechoit el ngara social media a lechub ousekool a game el kemanget el taem.

Momdasou a teletael el mo oltirakl osisechakl er a ungil usbechellel a technology el uaia oterkeklii a taem lousbech, kudmeklii a basio el diak a technology er ngii, a lechub a kuk olengull a lsekum eng kirel.

D. Melisiich a mimokl cheldecheduch me a ngerachel

Msodii el kmo ng klou a belkul a mimokl cheldecheduch er a telungalek e a rebek el chad a morngii a ngerchelir el kirel a usbechellel a technology.

Mkedmokl aikel momdasou me a teletael er a usbechellel a technology er a blai e mongelechel er a rebek el chad el mo dmak loureor loltirakl.

E. Mo omes meng motirakl

Mo omes me a rengalek a oltirakl aika el teletael er a ungil usbechellel a technology. Mongelechel er tir el mo olengit a ngesou a losubech e bo mngesuterir e mo mekrael er tir.

F. Okesiu er a ungil usbechellel a technology

Msodii a klou el ultutelel a ngerchelir a roungalek el mo okesiu er a ungil usbechellel a technology Tia belkul a kmo te mo kerkil a usbechellir er a technology e chotii a ungil okesiu. A roungalek a sebechir lochotii er a rengalek a ungil usbechellel a technology meng diak bol kantok a klengar tir e a usbechellel a technology a sebechel mo tabesul ngii me a kuk bebil er a omeruul me a deleuill.

G. Ousbech a ungil olisiich el tekoi

Mosaod el kmo ng mekera ungil olisiich el tekoi e sebechel kudmeklii a smisichii a ungil kse me a blekeradel. A rengalk sel blak a rengrir el kirel a ungil usbechellel a technology, eng kired el chemat e melisiich er tir.

H. Mrelii me lurerel a telungalek

Mongelechel er a rebek el chad er a telungalek el mo dmak loureor el kudmeklii a ungil deleuill lobengkel a technology. A ungil usbechellel a technology a diak el ngerchelel a tal chad, ngerchelel a telungalek. Tia sebechel uldimukl er ngii a llechul a telunglaek el kirel a usbechellel a technology, kuk smiik a bebil er a tekoi el telungalek a sebechel meruul, me a mimokl e bleketakl rolel a cheldecheduch el kirel a kngtil me a ungil usbechellel a technology.

I. Moba kllouelreng mea ungil klemedengei

Moureor lobengterir a rechedam me a rechedil el kirel a ngeldechel a usbechellir er a technology. Mngesuterir el mo medengei el kmo tia osubech a taem me a blakelreng. Ng kirel mo klou a rengud e mesterir a techall a rengalk me te oureor el kirel a ungil usbechellir er a technology. Ng sebechir lolngeseu e omekrael, e dmeu a rengrir er a rengalek sel bol meduch e lorael mo ungil a deleuill er tir er a usbechellel a technology.

VII. Ulebongel

A technology a mengasireng el dongu eng di dirrek el sebechel mo berraod a slekum eng diak de meduch lousbech er ngii. Sel bo dungil lousbech a technology e domekrael er a rengalek el mo meruul osisiu, eng mo ungil a rengud el kmo ng diak el kantok er kid. Molatk er a moktek e ke ousbech a technology el mesuub e meruul, e kudmeklii a uldasou ruchei, e olengull a leskum eng kirel. Bo domtab a bades er a chedaol llechukl el mengelechel er kid el mo osiik a tekoi el klemrang, bleketakl, melemalt, klikiid, klebokel, e ungil chais. Sel bo doruul uaisei, eng sebeched el ngosuterir a renglaek el mo ungil lousbech a technology.