Aoao

O A Mai La’u Pisinisi? (tagai i le tusiga o lo o maua i le faaiuga o lenei vaega)

O a lesona e te aoao mai aafiaga o le pisinisi a Jack?

O tagata faipisinisi famanuiaina e faavasega lelei ma tausi auiliiliga o a latou tupe. Ina ia manuia lau pisinisi, e taua lou tausia lelei o faamaumauga o tupe. A aunoa ma ni faamaumauga lelei, e faapefea ona e iloa pe o maua e lau pisinisi ni tupe mama? O le a faapefea ona e iloaina pe ua totogi oe e au tagata faatau uma? O le a faapefea ona e iloa le aofaiga atoa o au tupe faaalu?

I le mataupu lenei, o le a tatou aoao e uiga i le taua o le tausia lelei o faamaumauga o tupe. O le a tatou aoao i upu tupe maua, e faatatau i tupe e maua e le pisinisi mai le faatauina atu o ana auaunaga po o oloa gaosi i tagata faatau. O le a tatou aoao foi i le upu tupe faaalu, e faatatau i tupe faaalu e le pisinisi e maua mai ai auaunaga ma oloa gaosi. I le faasologa o le vaiaso, o le a tatou matauina tupe maua ma tupe faaalu a tatou pisinisi e iloa ai po o tatou mauaina se tupe mama.

O tagata faipisinisi faamanuiaina e tausia faamaumauga o aso uma. Mo tagata faipisinisi fou, atonu o se mausa faigata lenei e amata, ae taua tele. O auala nei e lima mo le tausia lelei o faamaumauga.

• Manatua le “aisea”: E mafai ona e maua le faaosofiaina pe a mafaufau i faamanuiga mo se taimi umi e afua mai le faagaoioiga o se pisinisi faatulaga lelei ma ni faamaumauga lelei.

• Atiina ae tomai fou: Atonu e te manao e atiina ae ni tomai fou e faaleleia ai le tausia o faamaumauga. O la tatou talanoaga i le aso o le a fesoasoani ia te oe e aoao ai nei tomai.

• Filifili ni uo, ae le o nisi e taufaaoso: O se uo o se tagata e fesoasoani ia te oe e fai le mea sao. O se tagata taufaaoso o se tasi e fesoasoani ia te oe e fai le mea sese. Fai atu i uo faatuatuaina, faufautua, po o lou toalua e fesoasoani ia te oe e tausia pea lava pea faamaumauga.

• Faaaoga taui: Fai se taui mo oe lava mo le tausia o faamaumauga o aso uma.

• Ia iai ni meafaigaluega sao: Ia mautinoa ua ia te oe ni meafaigaluega e fai ai le galuega ia sao. O le a tatou aoao e uiga i ni meafaigaluega lelei mo le tausia o faamaumauga mulimuli ane i lenei fonotaga.

O le fea o auala o lisi atu i luga o le a sili ona fesoasoani ia te oe a o e fausia le mausa o le tausia o faamaumauga o tupe i aso uma?

O se faamaumauga faamau o tupe maua ma tupe faaalu o se fomu o pisinisi masani ma taua. O le faamoemoega autu o le faamaumauga faamau o le faamauina lea i taimi uma o tupe e sau i totonu ma aluese atu i fafo o lau pisinisi. O le isi faamoemoega o le fesoasoani lea ia te oe e tausia eseese ai tupe o le pisinisi mai tupe patino (tagai i le mataupu 7). Filifili pe tausia lenei faamaumauga faamau i pepa pe faaaoga se polokalama faakomepiuta. E taua lou faaaoga pea i aso taitasi.

Pe a maea ona e faia se faamaumauga faamau o tupe maua ma tupe faaalu, e mafai ona e fausia se faamatalaga o tupe o totogi. O le faamatalaga o tupe o totogi e tau foi o le faamatalaga o polofiti ma tupe leiloa po o le P&L.

Manatua le faigata ona fuafua le polofiti mai le mafaufau i le gaoioiga i le vaega 1? O le a fesoasoani le faamatalaga o tupe o totogi. Na te faaopoopo lisi uma mai le faamaumauga faamau o tupe maua ma tupe faaalu e aotele ai punavai o tupe maua ma tupe faaalu mo se vaitaimi faapitoa, e pei o se vaiaso, masina, kuata, po o le tausaga. E faailoa mai e le faamatalaga o tupe o totogi pe o maua ni tupe mama o lau pisinisi i lena vaitaimi.

E faailoa mai e le faamatalaga o tupe maua:

• Tupe maua

• Tupe Faaalu

• Tupe mama (pe tupe leiloa).

Ia iloa o le faamoemoega o le faamatalaga o tupe o totogi o le tuufaatasia lea o tupe maua ma tupe faaalu uma i ni vaega. Atonu e iai ni taseni, selau, pe afe o lisi mai au faamaumauga faamau ua aoteleina i le faamatalaga o tupe o totogi. A e malamalama loa i le auala e faatulaga ai se faamatalaga o tupe o totogi, e mafai ona e amata suesue ma faavasega ina ia maua ai se malamalamaaga loloto e fesoasoani e faaleleia ai lau pisinisi.

O a ni malamalamaaga loloto e mafai ona e maua mai le suesueina o le faamatalaga o tupe o totogi?

Ina ia iloa pe o maua e lau pisinisi se tupe mama, e manaomia ona e fatuina se faamatalaga o tupe o totogi. Ina ia fatuina se faamatalaga o tupe o totogi, e muamua ona e manaomia se faamaumauga faamau o tupe maua ma tupe faaalu.

O tagata faipisinisi faamanuiaina e faalagolago i le malosi o le tausia o faamaumauga. Pe i ai se isi o le vaega o tausia i le taimi nei faamaumauga faamau o tupe maua ma tupe faaalu po o fausiaina se faamatalaga o tupe o totogi? Afai o lea, faasoa mai pe faapefea e lenei na fesoasoani ia te oe.

O lea ua e aoao le taua o le tausia o faamaumauga faamau o tupe maua ma tupe faaalu ma le faavae o le saunia o faamatalaga o tupe o totogi mo lau pisinisi. A o olaola lau pisinisi, o le a oo ina lavelave lau faamatalaga o tupe o totogi. O le a manaomia ona aofia ai ma isi tupe maua ma tupe faaalu e pei ona lisi atu i lalo:

• Tului mo tupe maua

• Tupe faaalu mo tagata faigaluega e le aafia ai i totogi ( e pei o le inisiua o le soifua maloloina ma tupe totogi o lafoga)

• Maketi ma faasalauga faatosina

• Lisi

• Mea Aogā

• Faaitiitia o le aoga

• Inisiua

• tului mo tupe faaalu

Aua le popole pe afai e te le masani i nisi o nei upu. Atonu e te manao e faasino i le lisi o upu ma o latou uiga mo nisi o faamatalaga. A o olaola lau pisinisi, o le a manaomia lou faamasani i nei upu ma malamalama ai i lau faamatalaga o tupe o totogi.

E manaomia ona e faaaoga se meafaigaluega lelei i le puleaina o le auilliiliga o tupe o lau pisinisi. Faaaoga le meafaigaluega lenei e faamaumau ai le faaaogaina o tupe maua ma tupe faaalu taitasi o lau pisinisi. E tatau ona iai se tomai e lipoti ai le aotelega o tupe maua, tupe faaalu, ma tupe mama. Ina ia fesoasoani ia te oe e fai ma masani i aso uma le tausia o le faatulagaina lelei o lau pisinisi, e tatau i lau meafaigaluega ona faigofie ona faaaoga ma maua.

O nisi o tagata faipisinisi e amata i le faaaogaina o api laiti ma faila e faamaumau ai a latou lisiti i aso taitasi. E ave e nei tagata faipisinisi a latou api laiti ma lisiti ma lisi tupe maua ma tupe faaalu i le pepa laina fesootai i po taitasi. O le tele o tagata faipisinisi o le a alualu i luma ma faaaoga meafaigaluega sili ona lelei e tausia ai faamaumauga, e pei o polokalama i komepiuta, a o ola a latou pisinisi. O nisi o tagata faipisinisi latou te faafaigaluega ni tausitusi e pulea a latou tupe.

• O a meafaigaluega e te silafia e mafai ona fesoasoani i le puleaina auiliili o tupe o lau pisinisi?

• O a uiga silisili ona aoga o le meafaigaluega o lo o e fautuaina mai?

I le avea ai ma tagata faipisinisi, e ao ona e filifili po o le a le meafaigaluega po o le punaoa o le a fesoasoani sili ia te oe e faamaumau ai au tupe maua ma tupe faaalu. E ui o le meafaigaluega po o le tausitusi o le a fesoasoani i le tele o le tausiga o faamaumauga, e ao ona e malamalama i le faamaumauga o mea tautupe o lau psinisi ma iloilo pea lava pea. A o olaola lau pisinisi, o le a e manaomia ona faaloloto lou malamalama i mea tautupe.

E amata i le aso, faamaumau au tupe maua ma tupe faaalu i aso taitasi. I le faaiuga o le vaiaso, faufau se faamatalaga o tupe o totogi mo lau pisinisi. (afai e fesoasoani, faaaoga pepa e le i faaaogaina i le “Punaoa” o lo o maua i le faaiuga o lenei vaega.) Afai e leai ni faamatalaga o mea tautupe o lau pisinisi, fausia se faamatalaga mo se pisinisi fatu. O le amio ai i le faamaumauina o au tupe maua ma tupe faaalu uma o le a faamanuiaina ai lau pisinisi.