Aoao

E le tatau i se pisinisi ona faamoemoe uma lava i lona pule. O tagata faipisinisi faamanuiaina e atiiae tusitaiala o galuega ma faamaumauina le faagasologa o galuega ina ia faataunuu ai tulaga moomia o a latou pisinisi. O nei punaoa e faatupulaia ai le tulaga maoae ma le sologa lelei o le faagaoioiga o le pisinisi. E aoga nei mo aoaoga o tagata faigaluega fou ma mo le faatumauina pea o faatinoga silisili i tagata faigaluega o lo o galulue nei. E ao ona toe iloilo ma faafouina pea lava pea.

O le fausiaina o se tusitaiala o galuega ma le faamaumauina o le faasologa o galuega mo galuega faapitoa o le a faatuina ai tulaga moomia, fesoasoani i tagata faigaluega e ausia o latou sini faamoemoeina, ma mautinoa ai le faatumauina o lo latou faataunuuina lelei. O lenei faamatalaga aloaia e mafai ai e se tasi ona faataunuuina le galuega pe a faapea o gasegase, malolo, faalavelave faafuasei, po ua tuua le pisinisi e le tagata faigaluega e masani ona faatinoina lena galuega. O le iai o faasologa auiliili o galuega, e mafai ai ona e galue e faaleleia lau pisinisi nai lo le na o le galue mo lau pisinisi.

O le fausiaina o se tusitaiala o galuega ma le faamaumauina o le faasologa o galuega o le a fesoasoani foi ia te oe pe afai e na o oe le tagata faigaluea o le pisinisi. O le faagasologa o le faamaumauga o le a fesoasoani ia te oe e faatulaga ma faagatasia ai lau pisinisi. O le a fesoasoani lea e faatulaga lelei ai lau pisinisi. O faagasologa o galuega faamauina e fai ma punaoa o faamatalaga e fesoasoani ia te oe e manatua ai galuega atonu e seasea ona fai.

• I le avea ai ma se pule o se pisinisi, aisea e taua ai ia te oe ona fatuina se tusitaiala o galuega ma faamauina faagasologa mo galuega faapitoa?

• O a galuega faapisinisi po o faagasologa e tatau ona e faamauina ina ia mafai ona faia i se tulaga tutusa?

O le matafaioi a tagata faipisinisi ua mautinoa o tausia e a latou pisinisi ia tulafono ma aiaiga uma. O tulafono ma aiaiga e eseese i pisinisi ma nofoaga, o lea e taua mo tagata faipisinisi taitasi ona mafaufau i ona tulaga moomia i le tulafono ma aiaiga i le (1) lotoifale, (2) setete po o le itumalo, (3) malo, ma le (4) faavao malo.

O le faaopoopoina o se tagata faigaluega fou i lau pisinisi o se faaiuga taua e manaomia ai se faatulagaga lelei ma le faalagolago i le tatalo. O tagata faipisinisi faamanuiaina e tusia auiliili ia faamatalaga o galuega e taitaiina ai la latou faaiuga. O se faamatalaga o le galuega e iloa ai e le tagata o lo o apalai mea e moomia ma fesoasoani ai i le tagata faipisinisi e fesootai atu tomai, iloa, ma agavaa e manaomia e le tagata fou.

Aisea e taua ai ona faautauta lelei ma tatalo pe a talia se tagata faigaluega?

Ina ia fausia se pisinisi olaola, e taua lou taitaia ma faamalosia au tagata faigaluega. O se taitai o se tasi e faagaeetia isi tagata e mulimuli atu. O le taitaiga e le maua mai se igoa po o se tulaga; e maua mai le agavaa e faatauanau, faamalosiau, ma taitai le vaega i se sini faamoemoeina. Ina ia faamalosia au tagata faigaluega o lona uiga o lou tuuina atu lea ia i latou o avanoa e faatino ma atiiae ai o latou tomai ma mea e fiafia iai. O tagata faipisinisi atamamai e fesoasoani i o latou tagata faigaluega ia laina tutusa lo latou alualu i luma patino ma le ola o le pisinisi.

E faapefea ona e faamalosi i au tagata faigaluega nei ma le lumanai?

O le avea ai o se tagata faipisinisi, e mafai ona e iloa lau taitaiga i le auala e te talia ai ma pulea au tagata faigaluega. O le vaega lenei o lo o faamatala ai mataupu faavae e tolu e taitaiina ai.

O le mataupu faavae muamua o le ia gese le talia ae vave ona tuliesea. Mo se faataitaiga, faapea la o lo o pulea e Vivian se pisinisi e tausia ai tagata matutua. E faaeteete ona ia faaalu le taimi e talia ai le tagata sili ona lelei e faalagolago i faamatalaga auiliili o le galuega. E vave foi ona ia faatinoina le tuliesea o se tagata faigaluega ua faaalia e le fetaui lelei o ia mo le galuega po o le pisinisi. I nei tulaga e lua, ua fai e Vivian faaiuga o le a manuia ai ana tagata faigaluega ma lana pisinisi mo se taimi umi.

O le mataupu faavae lua e taitaiina ai o le lava o ni aoaoga e tuuina atu. Mo se faataitaiga, e faapea la o le inisinia o Nat e pulea e ia lana lava pisinisi. E fesoasoani Nat i lana tagata faigaluega o Miles e fausia se fuafuaga atiiae patino ma tuu atu e auai i aoaoga. I lona tomai fou ma le aoaoga, ua mafai nei e Miles ona vaaia ni galuega taua mo le pisinisi. Ona o lea, ua tele le taimi o Nat e taulai atu ai i le faaolaina o le pisinisi.

O le mataupu faavae lona tolu e taitaiina ai o le asiasi soo ma itiiti le manatu le faavaea. O lenei mataupu faavae e le o faapea atu ia pulepule tutu i au tagata faigaluega. Ae o lea, o lona uiga e tatau ona e iloa le galuega o lo o latou fai ma le auala e te fesoasoani ai ia i latou. Mo se faataitaiga, tatou faapea la e pulea e Cesar se pisinisi tusiata. Nate atiiae sootaga vavalalata e galulue ai ma ana tagata faigauega ma tuuina atu le taimi e fesili ai, faalogo, taitai, ma latalata i le galuega o lo o latou fai.

E mafai faapefea e nei mataupu faavae ona fesoasoani i lau pisinisi?

O sini faamoemoe o ni laasaga e fesoasoani ia aumai ai a tatou vaaiga mamao i se mea moni. E mafai ona tatou galulue e ausia a tatou vaaiga mamao pe afai tatou te vaevae i ni sini laiti e faamaea i taimi faatulagaina. O le upu faapuupuu o le SMART e faamanatu mai ia i tatou ina ia faatuina ni sini o lo o iai mea nei:

• Specific (patino): e aofia ai se faamatalaga auiliili o le mea o le a ausia

• Measurable (fua): e aofia ai se mea e fua ai le alualu i luma.

• Achievable (ausia): fai ni sini e moni ma mafai ona ausia.

• Relevant (talafeagai): faatu ni sini e taua ma maua ai le faagaeetia.

• Time-bound (taimi): e aofia ai le aso o le a ausia ai le sini faamoemoe,

I le avea ai o se tagata faipisinisi, mafaufau i lau vaaiga mamao faaumiumi ma vaevae i ni sini laiti e mafai ona ausia e ala i le taulai atu ma le filiga.

A o e galue agai atu i le iloa o lau vaaaiga mamao, ia mautinoa le faatumauina pea o uiga nei i aso uma:

• Ia gatusa pea lou galue i ou sini i aso taitasi

• Auiliili ona siaki lou alualu i luma.

• Fetuunai ina ia faafetaui ou sini pe a talafeagai.