Pagbansay alang sa Pagsukod sa Kahibalo

Ang pagsukod sa kahibalo usa ka importante nga bahin sa pagkat-on. Si Elder David A. Bednar sa Korum sa Napulog Duha ka Apostoles mihatag og gibug-aton sa kaimportante sa pagsukod sa kahibalo sa dihang iyang gihulagway ang tahas sa mga pasulit diha sa akademiko nga pagkat-on.

Ang panagsang mga pasulit importante gayod sa pagkat-on. Ang epektibong pasulit makatabang nato sa pagtandi sa unsay atong kinahanglang masayran sa unsay aktwal natong nasayran bahin sa pihong hilisgotan; nakahatag usab kini og sumbanan diin kita makatimbang-timbang sa atong pagkat-on ug paglambo (David A. Bednar, “Kita Mosulay Kanila Dinhi,” Liahona, Nob. 2020, 8).

Ang pagsukod sa kahibalo diha sa seminary nagpahigayon og susama nga katuyoan ingon sa mga pasulit diha sa akademiko nga pagkat-on. Ang pagsukod sa kahibalo makatabang sa mga estudyante nga mapakita ang ilang espirituhanong kahibalo, pagsabot, ug debosyon ngadto sa Langitnong Amahan ug ni Jesukristo. Kini nga mga matang sa pagsukod sa kahibalo makatabang sa mga estudyante nga mahimong mas nahibalo sa unsay ilang nakat-onan ug sa unsang paagi sila nagtubo.

Ang pag-ila sa ilang pagkat-on ug paglambo magantihon ug makapadasig nga kasinatian alang sa mga estudyante. Susama kini sa usa ka dumadagan nga anaa sa kompetisyon nga nagtan-aw sa iyang oras sa stopwatch o sa usa ka bata nga nagtan-aw sa iyang pagtubo diha sa tsart sa sukod sa gitas-on. Ang mga estudyante sa kasagaran dili makamatngon kon kumusta ang ilang paglambo kon walay mga oportunidad kanunay sa pagsukod sa ilang nakat-onan. Bisan sa mga oportunidad nga makita nga wala silay nahimo nga kalamboan o bisan sa pagkunhod sa ilang paglambo mahinungdanon sa mga kasinatian sa pagkat-on. Ang kanunay nga mga pagsukod sa kahibalo mas makadapit og personal nga pagpadayag ngadto sa ilang mga kinabuhi ug makatabang sa mga estudyante sa paghimo og mga plano alang sa umaabot nga paglambo ug pagkat-on. Pipila sa mga ehemplo sa mga kalihokan sa pagsukod sa kahibalo diha sa kurikulom sa seminary naglakip sa mga leksiyon sa Pagsukod sa Imong Nakat-onan ug sa mga pagpraktis sa doktrinal nga kahanas. Kini nga pagbansay motutok sa mga kalihokan sa pagsukod sa kahibalo nga makita diha sa mga leksiyon sa Pagsukod sa Imong Nakat-onan.

Sa tibuok kurikulom sa seminary, makita nimo ang mga leksiyon sa Pagsukod sa Imong Nakat-onan. Kini nga mga leksiyon gi-eskedyul matag upat ngadto sa unom ka semana ug naghatag sa mga estudyante og oportunidad sa pagsukod sa ilang mga kaugalingon sumala sa mga resulta sa nakat-onan sa lebel sa kurso. Kining mga resulta sa nakat-onan sa lebel sa kurso makatabang sa mga estudyante sa:

• Pagpasabot sa doktrina nga ilang nakat-onan.

• Pagpamalandong sa ilang mga pagbati, mga kinaiya, ug mga tinguha nga may kalabotan sa plano sa Langitnong Amahan ug sa ebanghelyo ni Jesukristo.

• Pagrebyo sa mga plano o mga tumong nga ilang gihimo aron magamit unsay ilang nakat-onan ug mapalawman ang ilang pagkadisipulo ni Jesukristo.

Tingali makatabang ang paggahin og panahon sa pagtan-aw sa usa o mas daghan pang leksiyon sa Pagsukod sa Imong Nakat-onan aron mapamilyar niini. Kon motan-aw ka sa usa o duha ka leksiyon, bantayi nga ang matag leksiyon nagsugod sa kinatibuk-an nga paagi, naghatag sa mga estudyante og oportunidad sa pagpakigbahin og bisan unsang butang nga ilang nakat-onan bag-ohay lang gikan sa ilang pagtuon sa kasulatan sa indibidwal nga paagi, uban sa ilang pamilya, diha sa mga miting sa Simbahan, o diha sa seminary. Dayon, tan-awa ang matag usa sa mga kalihokan sa pagsukod sa kahibalo diha sa leksiyon sa Pagsukod sa Imong Nakat-onan. Hatagi og espesyal nga pagtagad kon sa unsang paagi nga ang matag kalihokan sa pagsukod sa kahibalo:

• Gipasiugdahan pinaagi sa usa ka ulohan nga nagpahayag sa resulta sa nakat-onan sa lebel sa kurso.

• Nagpasabot sa mga kasinatian sa pagkat-on gikan sa miaging mga leksiyon diha sa kurikulom.

• Naghatag sa mga estudyante og oportunidad sa paghimo og usa ka butang aron mapakita ang ilang nakat-onan.

Importante nga hinumdoman nga ang pagkat-on sa estudyante mahimong mapalambo kon ang mga estudyante klaro nga nakasabot kon unsay resulta alang sa kalihokan sa pagkat-on ug gihatagan og oportunidad nga mapakita ang ilang nakat-onan. Usa ka analohiya mahimong makatabang sa paghulagway niini. Kon ang usa ka batan-on nagkat-on kon unsaon pagtira sa gapasan ug sa pana, nagkinahanglan siya og klaro nga butang nga puntingon, ingon man usab pagbansay kon unsaon pagbutang sa pana, paggunit sa gapasan, pagpunting, ug pagtira. Kon wala gayod siya mahatagi og oportunidad nga mosulay sa pagtira sa pana, dili gayod siya masayod kon kamao na siya. Sa higayon lamang nga iyang itira ang pana diha pa lang niya makita og klaro kon naigo ba niya ang puntarya o wala.

Sama niana ang kasinatian sa pagkat-on sa ebanghelyo. Ang mga estudyante nagkinahanglan og instruksiyon ug tabang, apan nagkinahanglan usab sila og mga oportunidad nga mapakita ang ilang nakat-onan. Ang paagi kon unsaon sa mga estudyante pagpakita sa ilang nakat-onan kinahanglan nga klaro nga nakakonektar ngadto sa resulta. Matag kasinatian sa pagkat-on diha sa kurikulom gidisenyo samtang naghunahuna niini; hinuon, mas labing mapakita kini og maayo diha sa mga leksiyon sa Pagsukod sa Imong Nakat-onan. Ikonsiderar ang pagpakigbahin ngadto sa mga estudyante kon unsay mga resulta sa pagkat-on ang anaa sa matag usa niini nga mga leksiyon.

Samtang magtudlo ka niini nga mga leksiyon, dapita ang mga estudyante sa pagtinguha og tabang ug giya gikan sa ilang Amahan sa Langit pinaagi sa Espiritu Santo. Walay mas maayo nga ikauban kaysa Espiritu Santo sa pagtabang sa mga estudyante nga klarong makakita kon kumusta ang ilang pagkat-on ug paglambo diha sa ilang dalan balik ngadto sa Langitnong Amahan. Hatagi ang mga estudyante og mga oportunidad kanunay sa pagtinguha sa tabang sa Espiritu Santo sa pagsukod sa ilang nakat-onan ug kalamboan isip mga disipulo ni Jesukristo.

Ang mga estudyante kinahanglang moapil sa labing minos usa sa leksiyon sa Pagsukod sa Imong Nakat-onan atol sa matag katunga sa kurso aron makadawat og kredito alang sa gradwasyon sa seminary.

Kon ang mga estudyante wala makatambong sa bisan unsa nga mga leksiyon sa Pagsukod sa Imong Nakat-onan atol sa semester, kinahanglan nga hatagan nimo sila og tukmang leksiyon sa Pagsukod sa Imong Nakat-onan nga makita diha sa apendiks sa manwal sa magtutudlo sa seminary. Ang “Pagsukod sa Imong Nakat-onan, Bahin 1” mahimong ihatag sa mga estudyante aron buhaton ang pagsukod sa kahibalo alang sa unang katunga nga bahin sa kurso. Ang “Pagsukod sa Imong Nakat-onan, Bahin 2” mahimong ihatag sa mga estudyante aron buhaton ang pagsukod sa kahibalo alang sa ikaduhang katunga nga bahin sa kurso. Dapita ang mga estudyante sa pagrekord sa ilang mga tubag sa matag usa sa mga kalihokan sa pagsukod sa kahibalo. Awhaga sila nga mopakigbahin usab sa ilang mga tubag nga dili kaayo personal ngadto sa ginikanan, igsoon, o lider sa Simbahan. Kini nga oportunidad alang sa mga estudyante sa pagpakigbahin makatugot sa Espiritu Santo nga motudlo ug mopamatuod ngadto nila mahitungod sa mga kamatuoran sa ebanghelyo ug modapit nila sa paghimo og dugang nga mga lakang diha sa ilang pagkadisipulo nga nakasentro ni Kristo. Kon ibalik nila ang pagsukod sa kahibalo nganha nimo, mahimo usab nimo sila nga dapiton sa pagpakigbahin sa usa o duha sa ilang mga tubag kon dili kaayo kini personal.

Usahay, kinahanglan nimong ipahiangay ang mga leksiyon sa Pagsukod sa Imong Nakat-onan. Tungod sa mga eskedyul sa eskwelahan, ang mga estudyante dili makatuon sa leksiyon nga gipasabot diha sa leksiyon sa Pagsukod sa Imong Nakat-onan. Adunay mga higayon usab nga ang kamatuoran makahuloganon kaayo sa mga estudyante apan wala hisgoti diha sa leksiyon sa Pagsukod sa Imong Nakat-onan. Niini nga mga sitwasyon, mahimo ka nga modesisyon nga ilisan ang usa sa mga kalihokan diha sa leksiyon sa Pagsukod sa Imong Nakat-onan og usa ka kalihokan nga imong gimugna aron sa pagtabang sa mga estudyante sa pagsukod sa ilang panabot o kalamboan niana nga hilisgotan.

Ang mosunod nga mga lakang makatabang nimo sa pagpahiangay o sa pagmugna og epektibo nga kalihokan sa pagsukod sa kahibalo.

• Lakang 1: Sugdi pinaagi sa pag-ila sa katuyoan sa leksiyon nga gusto nimong sukdon.

  Matag katuyoan sa leksiyon gilista diha sa kataposan nga kapahayag sa pasiuna nga parapo niana nga leksiyon ug diha sa dokumento sa kinatibuk-ang pagpasabot alang niana nga semana.

• Lakang 2: Ikonsiderar unsay mahimo sa mga estudyante sa pagsukod sa ilang paglambo ug nakat-onan alang niana nga katuyoan sa leksiyon. Mga ehemplo maglakip sa mosunod:

  • Panabot: Ang mga estudyante mahimong mo-summarize o mopasabot og doktrinal nga konsepto pinaagi sa pagsulti o sa pagsulat. Mahimo kini sa nagkalainlaing paagi, sama sa pagtubag sa senaryo o pagsulat sa journal.

  • Mga pagbati, mga kinaiya, o mga tinguha: Ang mga estudyante tingali gidapit na sa miaging leksiyon sa pagsukod sa ilang mga pagbati, mga kinaiya, o mga tinguha pinaagi sa pagsulat sa journal, pag-survey, o ubang paagi. Kon mao, ang mga estudyante mahimong dapiton pag-usab sa pagkompleto niana nga kalihokan. Dayon mahimo nilang itandi ang ilang mga tubag gikan sa miaging leksiyon ngadto sa ilang mga tubag atol sa leksiyon sa Pagsukod sa Imong Nakat-onan.

  • Aplikasyon: Ang mga estudyante mahimong morebyo sa unsay ilang gibati nga angayng buhaton o usa ka plano nga ilang gihimo isip kabahin sa leksiyon. Makapamalandong dayon sila kon giunsa nila pagbuhat ang ilang plano. Pipila ka andam nga mga estudyante mahimong mopakigbahin sa ilang mga kasinatian kon dili kini kaayo personal. Mahimo gani sila nga makapakita og usa ka butang nga ilang nahimo, sama sa paggamit sa FamilySearch Family Tree nga app o sa paggamit sa kahanas sa pagtuon sa kasulatan.

Paningkamot sa pagpangita og mga paagi sa paghimo sa mga kalihokan nga makahuloganon ug makalingaw. Usab, hatagi og daghang oras ang mga estudyante sa pagpamalandong ug sa pagsukod sa ilang paglambo. Ang mga kalihokan kinahanglang dili mosangpot sa pagtandi sa mga estudyante sa ilang paglambo ngadto sa ubang mga tawo apan sa pagtabang nila sa pagsukod sa ilang kaugalingon nga kasinatian. Ang pipila ka estudyante mahimong masagmuyo sa ilang kasamtangang paglambo. Tabangi sila nga makasabot nga kining mga pagsukod sa kahibalo dili gayod isipon nga mao ang kataposan. Hinuon, ang mga estudyante kinahanglang awhagon kanunay sa pagkonsiderar kon unsa na ang sunod nga lakang sa ilang pagkat-on o paglambo ug kon unsaon nila sa pagdangop ngadto sa Ginoo alang sa tabang.

Pahinumdom: Ang mga magtutudlo sa seminary makapalambo sa umaabot nga mga leksiyon sa Pagsukod sa Imong Nakat-onan pinaagi sa paglakip sa mga kalihokan sa pagsukod sa kahibalo nga may kalabotan sa mga kategoriya sa Pagpangandam sa Kinabuhi nga bag-ohay lang nga gitun-an sa mga estudyante diha sa seminary. Mahimo nilang idugang kini nga mga kalihokan ngadto sa mga leksiyon sa Pagsukod sa Imong Nakat-onan o pulihan ang anaa na nga mga pagsukod sa kahibalo. Makita nimo ang gisugyot nga mga pagsukod sa kahibalo alang sa matag kategoriya sa mga leksiyon sa Pagpangandam sa Kinabuhi diha sa apendiks sa manwal sa magtutudlo sa seminary.

Ang mga magtutudlo mahimong makahatag og dugang nga epektibong mga leksiyon sa Pagsukod sa Imong Nakat-onan pinaagi sa paggamit sa mosunod nga mga praktis ngadto sa ilang pag-andam sa leksiyon ug pagtudlo. Ang mga magtutudlo mahimong:

• Makatan-aw daan kon unsay buhaton sa mga estudyante sa pag-andam alang sa pagsukod sa kahibalo nga mga kalihokan sa umaabot nga leksiyon sa Pagsukod sa Imong Nakat-onan. Ang mga magtutudlo makabuhat niini sa sinugdanan sa usa ka termino o diha-diha dayon human sila makatudlo og leksiyon sa Pagsukod sa Imong Nakat-onan. Mga leksiyon nga maglakip og mga kasinatian sa pagkat-on nga sundon sa leksiyon sa Pagsukod sa Imong Nakat-onan kinahanglang klaro nga gipaila sa mga giya sa gipaspason.

• Mosulti sa mga estudyante kon ang kalihokan sa pagkat-on i-follow up sa umaabot nga mga leksiyon sa Pagsukod sa Imong Nakat-onan. Ang mga magtutudlo makapakigbahin (1) kon ang mga estudyante mobisita pag-usab sa unsay ilang napraktis, narekord, naplano, ug uban pa ug (2) kon sa unsang paagi ang pag-follow up sa unsay ilang nabuhat makatampo sa ilang pagkat-on ug paglambo isip mga disipulo ni Jesukristo.

• Morebyo unsay nabuhat sa mga estudyante sa nangaging mga leksiyon nga nagkonektar sa mga kalihokan sa pagsukod sa kahibalo. Ang mga magtutudlo makabuhat niini samtang nangandam sa pagtudlo og leksiyon sa Pagsukod sa Imong Nakat-onan.

• Pagpakigbahin sa resulta sa nakat-onan alang sa kalihokan sa pagsukod sa nakat-onan ngadto sa mga estudyante. Sa dili pa mopakigbahin sa resulta, mahimong makatabang ang pagrebyo sa pipila ka may kalabotan nga sulod nga bag-ohay lang gitun-an sa mga estudyante.

Si Elder Jeffrey R. Holland sa Korum sa Napulog Duha ka Apostoles miawhag sa mga magtutudlo nga “hinumdomi nga ang usa ka estudyante dili usa ka sudlanan nga pun-on; ang usa ka estudyante ang usa ka kalayo nga pasigahon” (“Mga Anghel ug Katingala ”[Pagbansay nga Sibya sa Church Educational System], Hunyo 12, 2019, broadcasts.ChurchofJesusChrist.org). Ang mga oportunidad nga anaa sa mga estudyante isip kabahin sa mga kalihokan sa pagsukod sa kahibalo diha sa seminary usa ka importante nga paagi sa pagdasig sa mga estudyante diha sa ilang pagkat-on. Makatabang sila sa pag-aghat og kadasig aron mapalig-on ang pagkakabig sa mga estudyante ngadto ni Jesukristo ug sa Iyang ebanghelyo. Ang paghatag og oportunidad sa mga estudyante sa pagpasabot sa doktrina; pagpamalandong sa ilang mga pagbati, mga kinaiya, ug mga tinguha; ug pagrebyo sa mga plano o mga tumong nga ilang gitrabaho makatabang nila nga mas mapaninguhaon sa ilang mga paningkamot nga mahimong mas mahisama sa Langitnong Amahan ug ni Jesukristo.