“Pagbansay alang sa Pagsagop ug Pagpahiangay sa Kurikulom sa Seminary,” Pagbansay alang sa Kurikulom sa Seminary (2025)

Pagbansay alang sa Pagsagop ug Pagpahiangay sa Kurikulom sa Seminary

Adunay daghan nga epektibong paagi sa pagpangandam sa pagtudlo sa ebanghelyo ni Jesukristo. Kini nga pagpangandam kanunay nga maglakip sa mainampoong pagtuon sa pulong sa Dios ug sa pagtinguha sa giya sa Espiritu Santo aron masayod kon unsaon aron matabangan sa labing maayong paagi ang imong mga gitudloan nga mas mapalawman ang ilang pagkakabig ngadto ni Jesukristo ug sa Iyang gipahiuli nga ebanghelyo.

Ang kurikulom sa seminary usa ka kapanguhaan nga imong kasaligan nga mogiya kanimo sa pag-andam sa imong leksiyon ug makatabang nga imong matudlo ang tinuod nga doktrina. Samtang gamiton nimo kini nga kapanguhaan, tinguhaa og una nga sagopon ang unsay anaa sa kurikulom, ug dayon ikonsiderar ang mga panginahanglan sa imong mga estudyante ug giya sa Espiritu Santo aron masabtan kon asang dapita kaha ikaw mopahiangay sa pipila ka ideya sa kurikulom.

Ikonsiderar kining mosunod nga tambag ni Presidente Dallin H. Oaks mahitungod sa paggamit sa kurikulom aron sa pagpangandam sa mga leksiyon sa seminary:

Una sagopon nato, dayon mopahiangay. Kon hingpit ang atong pagpamilyar sa gitakdang leksiyon nga atong ihatag, nan mahimo natong sundon ang Espiritu aron sa pag-usab aron ipahiangay ang unsay anaa niini. Apan adunay tentasyon, kon hisgotan nato ang mahitungod niini nga pagpailin-ilin, kon sugdan ang pagpahiangay ang unsay anaa kaysa sagopon. Usa kini ka pagbalanse. Usa kini ka padayon nga hagit. Apan ang pamaagi nga unahon ang pagsagop ug isunod ang pag-usab aron ipahiangay usa ka maayong paagi alang sa luwas nga pagtudlo. (“Usa ka Panel nga Diskusyon uban ni Elder Dallin H. Oaks” [Seminaries and Institutes of Religion satellite broadcast, Aug. 7, 2012], broadcasts.ChurchofJesusChrist.org)

Ngano kaha nga importante man nga unahon ang pagsagop kon unsay naa sa kurikulom sa dili pa ipahiangay ang leksiyon?

Pagsagop sa Kurikulom

Ang Tumong sa Seminaries and Institutes of Religion nag-ingon nga atong “tabangan ang kabatan-onan ug mga young adult nga mapalawman ang ilang pagkakabig ngadto ni Jesukristo ug sa Iyang gipahiuli nga ebanghelyo.” Ang tumong naghisgot sa mga mosunod mahitungod sa pagtabang sa mga estudyante nga mapalawman ang pagkakabig:

Kita mosentro sa matag kasinatian sa pagkat-on diha ni Jesukristo ug sa Iyang ehemplo, mga hiyas, ug makatubos nga gahom. Kita motabang sa mga estudyante nga makat-on sa gipahiuli nga ebanghelyo ni Jesukristo sama sa makita diha sa mga kasulatan ug sa mga pulong sa mga propeta. Kita motabang sa mga estudyante sa ilang tahas diha sa proseso sa pagkat-on alang sa ilang kaugalingon. Kita maningkamot sa pagdapit sa Espiritu Santo aron sa pagtuman sa Iyang tahas diha sa matag kasinatian sa pagkat-on.

Ang kurikulom sa seminary mainampingon nga gidisenyo sa pagtabang kanimo nga makahatag niini nga kasinatian sa pagkat-on. Ang matag leksiyon nagsentro sa kasinatian sa pagkat-on kang Jesukristo, nagtabang sa mga estudyante sa pagkat-on sa ebanghelyo gikan sa mga kasulatan ug sa mga pulong sa mga propeta, ug naghatag og mga oportunidad alang sa mga estudyante nga matuman ang ilang tahas sa kasinatian sa pagkat-on. Pinaagi sa pagtipon niining tulo ka importanteng elemento sa katuyoan uban sa gugma alang niadtong atong gitudloan, atong gidapit ang Espiritu Santo sa pagtuman sa Iyang tahas sa kasinatian sa pagkat-on. Ang Pagtudlo sumala sa Pamaagi sa Manluluwas nagpasabot nga “Ang Espiritu mao ang tinuod nga magtutudlo ug ang tinuod nga tinubdan sa pagkakabig.” Mahitabo lamang nga mapalawman ang pagkakabig ngadto sa Manluluwas kon motudlo kita pinaagi sa Espiritu.

Gigiyahan sa Espiritu nga Kasinatian sa Pagkat-on graphic

Ang kurikulom sa seminary mainampingon nga girebyo ug gisabotan aron sa pagtabang kanimo:

Sa pagseguro sa katukma sa doktrina.
Sa pagpakita sa katuyoan sa dinasig nga tagsulat.
Sa pagmentinar og balanse nga pamaagi sa pagmodelo sa mga baroganan nga sama kang Kristo nga pagtulun-an nga anaa sa Pagtudlo sumala sa Pamaagi sa Manluluwas.
Sa paghatag og mga kasinatian sa pagkat-on alang sa mga estudyante aron makapakigbahin ug sa pagpakita kon unsay ilang nakat-onan.
Sa paggamit og lahi-lahing mga pamaagi.

Dunay daghang mahinungdanon nga konsiderasyon nga angay timan-an kon mag-andam og leksiyon. Ang pagsagop sa kurikulom makatabang sa paggiya kanimo kon unsa ug kon unsaon sa pagtudlo. Makatabang usab kini nimo nga magpabilin sa tinuod nga pundasyon sa doktrina.

Ania ang pipila ka paagi nga masagop nimo ang kurikulom:

Basaha og maayo ang katuyoan sa leksiyon. Makita kini diha sa kinatibuk-ang pagpasabot [overview] nga dokumento ug sa kataposang kapahayag sa pasiuna sa matag leksiyon. Ang tanan nga sulod ug mga kalihokan nagsubay niini nga katuyoan o sa resulta sa pagkat-on.
Basaha ang tibuok nga leksiyon. Ikonsiderar kon unsaon sa pagbasa sa mga estudyante ang pinili nga mga kasulatan, tataw nga mga kamatuoran, mga kinutlo, ug mga kalihokan nagsubay sa katuyoan sa leksiyon ug sa unsang paagi kini nagtutok ni Jesukristo, nagtudlo sa doktrina, ug nagdapit og makugihong pagkat-on. Tutoki og maayo ang kalihokan sa pagkat-on dapit sa kataposan sa leksiyon, nga maghatag sa mga estudyante og oportunidad nga ikapakita ang katuyoan sa leksiyon.
Ikonsiderar ang pagtubag sa mga pangutana ug paghimo sa mga kalihokan ingon nga ikaw usa ka estudyante. Makatabang kini nimo nga makakat-on pinaagi sa Espiritu ug mosulod sa klasrom nga nalig-on, nabayaw, ug mas andam nga mohatag og susamang kasinatian sa imong mga estudyante.
Tinguhaa nga masabtan ug matudlo ang tanang matang sa leksiyon nga anaa sa kurikulom, bisan og bag-o kini alang kanimo. (Ang mga klase sa leksiyon naglakip og mga leksiyon sa Kurso sa Kasulatan, mga leksiyon sa Pagpraktis sa Doktrinal nga Kahanas, mga leksiyon sa Pagsukod sa Imong Nakat-onan, ug mga leksiyon sa Pagpangandam sa Kinabuhi.) Matag usa niining mga kasinatian sa pagkat-on nagtampo sa katalagsaong paagi nga mapalawman ang pagkakabig sa mga estudyante ngadto ni Jesukristo ug sa Iyang ebanghelyo.

Pagpahiangay sa Kurikulom

Isip usa ka magtutudlo sa seminary, naa ka sa maayong posisyon sa pagtabang sa imong mga estudyante nga mapaduol ngadto ni Jesukristo. Pinaagi sa imong kanunay nga pakig-inter-aksyon sa imong mga estudyante, mailhan nimo sila ug higugmaon sila og maayo. Ang pagkaila ug paghigugma sa imong mga estudyante mopalambo sa imong abilidad sa pagdawat og inspirasyon gikan sa Espiritu Santo mahitungod kon kanus-a ug unsaon sa paghimo og mga pagpahiangay sa kurikulom. Samtang mag-andam ka sa mga leksiyon gamit ang kurikulom, sugdi ang imong pag-andam pinaagi sa pag-ampo. Ang Langitnong Amahan modasig kanimo pinaagi sa Espiritu Santo kon unsang mga pagpahiangay, kon aduna, tingali ang imong buhaton og unsay sulod sa leksiyon aron mas makatubag sa mga panginahanglan ug sa mga abilidad sa imong mga estudyante.

Mga rason nga tingali imong ipahiangay ang leksiyon maglakip sa:

Pagtabang sa mga estudyante nga dunay kasamtangang mga isyu ug mga pangutana. (Tan-awa ang sitwasyon nga pagatun-an ni Brother Jones.)
Sa paghimo og porsyon sa leksiyon nga mas makahuloganon base sa mga panginahanglan sa imong mga estudyante, mga abilidad, kultura, o mga kapanguhaan nga anaa. (Tan-awa ang sitwasyon nga pagatun-an ni Sister Dube, Brother Reyes, ug ni Sister Rodriguez.)
Sa paggamit og mas bag-ong mga pamahayag, direksiyon, o mga kapanguhaan nga gihatag sa mga lider sa Simbahan. (Tan-awa ang sitwasyon nga pagatun-an ni Sister Schmidt.)
Aron makakita og mas maayong paagi nga matuman ang gihatag nga seksiyon sa leksiyon. Ang mga ehemplo mahimong maglakip sa pagpahiuyon sa usa ka leksiyon nga maggamit og butang [object lesson] sa paagi nga makaandam gihapon sa mga hunahuna ug mga kasingkasing sa mga estudyante aron matudloan o sa pagdapit sa mga estudyante sa pagdrama sa usa ka istorya gikan sa mga kasulatan kaysa motan-aw og bidyo nga nagpakita sa samag panghitabo. (Tan-awa ang sitwasyon nga pagatun-an ni Brother Li.)

Sa dili pa ipahiangay ang kurikulom, ikonsiderar ang pagpangutana sa imong kaugalingon og sama sa mosunod:

Ang akong pagpahiangay naghatag ba gihapon og kasinatian sa pagkat-on nga nagtutok diha kang Jesukristo, nagtudlo sa doktrina, ug nagdapit og makugihon nga pagkat-on?
Ang akong pagpahiangay nahiuyon ba sa mga pag-aghat sa Espiritu Santo ug mga baroganan nga sama kang Kristo nga pagtulun-an nga makita diha sa Pagtudlo sumala sa Pamaagi sa Manluluwas?
Ang gihimong pagpahiangay nagpakita ba sa katuyoan sa dinasig nga tagsulat?
Ang gihimong pagpahiangay nagtutok ba sa makakabig nga mga baroganan?
Nasabtan ba nako kon sa unsang paagi ang akong pagpahiangay makaapekto sa umaabot nga mga leksiyon ug sa mga kasinatian sa pagsukod sa kahibalo alang sa mga estudyante?

Mga sitwasyon nga pagatun-an alang sa pagpahiangay sa kurikulom

Brother Jones—Pagpahiangay sa leksiyon nga magbase sa bag-o ug sensitibo nga mga isyu

Si Brother Jones makugihong nag-andam pagka-Biyernes sa wala pa ang kataposan sa semana sa kinatibuk-ang komperensiya sa pagtudlo sa leksiyon sa Kurso sa Kasulatan alang sa umaabot nga Lunes. Sa iyang katingala, nadungog niya ang propeta nga mipahibalo nga usa ka bag-ong templo ang itukod sa dapit diin siya nagtudlo. Nasayod siya nga moadto ang mga estudyante sa klase nga mahinamong maghisgot mahitungod sa templo ug daghan ang adunay mga pangutana bahin niini.

Gibati ni Brother Jones ang pag-aghat sa Espiritu Santo nga usabon ang iyang giya sa gipaspason nga itudlo ang usa sa mga leksiyon sa Pagpangandam alang sa Templo gikan sa seksiyon sa Pagpangandam sa Kinabuhi nga seksiyon sa kurikulom inig ka Lunes kaysa leksiyon diha sa Kurso sa Kasulatan.

Brother Reyes—Pagpahiangay og kalihokan base sa mga abilidad sa mga estudyante

Samtang nagtuon sa leksiyon, namatikdan ni Brother Reyes nga ang leksiyon nag-agad kaayo sa usa ka han-ay sa diskusyon alang sa mga estudyante. Naobserbahan ni Brother Reyes nga ang iyang mga estudyante sa kasagaran hilom kaayo ug dili kaayo moapil sa mga diskusyon. Hinoon, sila, malingaw kaayong magsulat sa ilang mga journal. Imbis mohatag og diskusyon, mihukom siya nga mosulat og duha ka pangutana gikan sa kurikulom diha sa pisara ug modapit sa mga estudyante sa pagsulat sa ilang mga tubag. Giplanohan niya nga ipakigbahin sa andam nga mga estudyante ang unsay ilang gisulat.

Sister Rodriguez—Pagpahiangay sa leksiyon base sa lokal nga kultura

Si Sister Rodriguez nangandam sa pagtudlo og leksiyon nga naglakip og mga pakisayran sa kasulatan mahitungod ni Maria, ang Inahan ni Jesus. Dunay kultura sa lig-ong mga pagbati ug lainlaing mga gituohan mahitungod ni Maria sa gipuy-an ni Sister Rodriguez. Daghan gani ang nagsimba ni Maria tungod sa iyang tahas isip ang inahan ni Jesukristo. Samtang gitun-an niya ang leksiyon gikan sa kurikulom, si Sister Rodriguez nangita og tukma nga dapit aron matabangan ang mga estudyante nga makasabot kon unsa ang gitudlo sa mga kasulatan ug sa mga lider sa Simbahan mahitungod ni Maria. Mihukom siya sa pagpahiangay sa leksiyon pinaagi sa pagdugang sa mosunod nga duha ka pangutana sa unsay nalakip diha sa kurikulom:

“Unsay gikatabang sa Alma 7:10 kanato sa pagsabot mahitungod ni Maria? Samtang kita nagtahod ug naghigugma ni Maria ug sa ubang matinud-anong mga disipulo diha sa kasulatan, giunsa sa Alma 7:11–13 sa pagtabang kanato nga makasabot ngano nga kita nagsimba lamang sa Langitnong Amahan ug ni Jesukristo?”

Sister Dube—Pagpahiangay sa leksiyon base sa anaa nga mga kapanguhaan

Samtang nangandam si Sister Dube og usa ka leksiyon, nakabantay siya nga ang usa sa mga pagdapit mao ang pagpasiksik sa mga estudyante sa ilang mga katigulangan gamit ang FamilySearch.org. Nasayod siya nga kadaghanan sa iyang mga estudyante walay akses sa internet. Maalamon niyang gipahiangay ang pagdapit nga sugdan sa mga estudyante sa pagsulat og mga family group sheet nga papel ug sa pagpakigsulti sa temple ug family history consultant sa ilang ward aron makat-on kon unsaon nila sa pagsiksik og ubang mga ngalan sa pamilya.

Sister Schmidt—Pagpahiangay sa usa ka leksiyon aron makagamit sa mas bag-ong mga pamahayag gikan sa mga lider sa Simbahan

Atol sa iyang pag-andam sa leksiyon, si Sister Schmidt nagbasa og usa ka leksiyon nga iyang itudlo sa mosunod nga adlaw. Samtang nagbasa sa usa ka pamahayag sa leksiyon gikan sa usa ka lider sa Simbahan, nahinumdoman niya ang mas bag-ong pamahayag nga pwedeng makahatag og parehas nga katuyoan. Bag-o lang niyang natun-an ang pakigpulong atol sa iyang personal nga pagtuon, ug tataw pa kaayo kini sa iyang hunahuna. Mihukom siyang gamiton ang mas bag-ong pamahayag sa iyang leksiyon imbis ang pamahayag nga naa sa kurikulom.

Brother Li—Pag-usab aron ipahiangay ang usa ka kalihokan sa pagkat-on nga anaa sa kurikulom aron mas matuman ang katuyoan

Samtang si Brother Li nangandam sa pagtudlo sa leksiyon gikan sa kurikulom, nagbasa siya og usa ka sugyot nga magdala og bola sa soccer ngadto sa klase. Nabantayan niya nga ang katuyoan sa pagpakita og butang sa pagtudlo sa leksiyon mao ang pagtabang nga makita sa mga estudyante nga ang kantidad sa bola sa soccer maimpluwensyahan pinaagi sa dugang nga kahibalo bahin sa kasaysayan niini.

Gusto nga matuman kini nga katuyoan sa labing epektibo nga paagi alang sa iyang mga estudyante, namalandong siya sa makadiyot kon unsa nga aytem ang iyang madala sa klase nga labing mohaom sa kasinatian sa mga estudyante. Nakahukom siya nga iyang ipahiangay ang leksiyon pinaagi sa pagdala og usa ka yano nga kwentas ngadto sa klase. Human mopakigbahin ang mga estudyante kon pila sa ilang hunahuna ang kantidad sa kwentas, iyang ipakigbahin kon kinsa ang naghimo sa kwentas ug nganong ang pagkahibalo sa kasaysayan niini nakapahimo niini nga labing bililhon ngadto kaniya kaysa wala mahibaloi ang kasaysayan niini.

Mga Sugyot alang sa Pagsagop ug Pagpahiangay

Samtang ang bisan unsang naa nga materyal sa kurikulom mahimo rang ipahiangay, ang mosunod nga dayagram naghulagway og mga butang kon sa unsang paagi ang managlahing mga bahin sa leksiyon tingali mas tukma nga ipahiangay kaysa uban.

Sama pananglit, ang katuyoan sa leksiyon, ang konteksto sa gisaysay, o ang tataw nga kamatuoran, tingali dili kaayo tukmang ipahiangay sa unsay naa sa leksiyon kaysa giunsa sa pagsugod ang leksiyon o kon unsay mga sanglitanan nga tingali ipakigbahin sa magtutudlo ang tataw nga kamatuoran. Ang mga aytem nga mas duol sa wala nga bahin tingali mas kanunay nga sagopon, samtang ang mga aytem nga naa sa tuo nga bahin tingali mas kanunay nga ipahiangay. Hinumdomi nga kini mga sugyot lamang. Ang mga magtutudlo wala laomi nga mopahiangay sa tanan nga naa sa tuo nga bahin, sama ra nga wala sila laomi nga mosagop sa tanang butang sa naa sa wala nga bahin.

Unsaon sa usa ka Magtutudlo sa Pagpahiangay sa grapika [graphic] nga Kurikulom

Panapos

Ang Langitnong Amahan mogiya kanimo pinaagi sa Espiritu Santo samtang mainampoon ka nga magtuon sa Iyang pulong ug mag-andam og mga leksiyon sa pagpanalangin sa Iyang mga anak. Makatabang Siya kanimo sa pagsabot unsaon pagsagop ang unsay anaa sa kurikulom ug kanus-a maghimo og mga pagpahiangay aron mas matabangan ang imong mga estudyante.