“Pagbansay alang sa mga Leksiyon sa Pagpangandam sa Kinabuhi,” Pagbansay alang sa Kurikulom sa Seminary (2025)

Pagbansay alang sa mga Leksiyon sa Pagpangandam sa Kinabuhi

Kinatibuk-ang Pagpasabot

Tan-awa ang bidyo “A Teacher’s Guide to Life Preparation Lessons,” mangita sa unsay gusto nila ni Elder Clark G. Gilbert sa Seventy ug Brother Chad H Webb nga mahibaloan mahitungod niini nga mga leksiyon human sila mipahibalo.

9:22

Ang mga leksiyon sa Pagpangandam sa Kinabuhi magtabang sa mga estudyante:

Sa paggamit sa mga baroganan sa pag-angkon og espirituhanong kahibalo sa mga pangutana ug mga sitwasyon sa kinabuhi.
Sa pagpakita sa abilidad sa paggamit sa mga kasulatan sa pagdawat og tabang ug inspirasyon.
Sa pagdawat og kusog gikan sa Ginoo sa paghimo og dinasig nga mga pagpili.
Sa pagtukod og pagbarog sa kinaugalingong paningkamot sa paagi sa Ginoo.
Sa paggamit sa mga baroganan ug mga kahanas aron mahimong mas himsog sa pisikal ug emosyonal nga paagi.
Sa pagsabot sa kaimportante sa tibuok kinabuhi nga temporal ug espirituwal nga edukasyon ug pagmugna og plano alang sa umaabot nga edukasyon ug panarbaho.
Sa paggamit sa mga kahanas aron magmalamposon sa pag-eskwela.
Mobati og dugang nga tinguha sa pagpakigbahin sa ebanghelyo ni Jesukristo ngadto sa uban.
Mobati og dugang nga tinguha sa paghimo og mga pakigsaad uban sa Dios diha sa templo.
Sa paggamit sa mga pagtulun-an sa mga Lider sa Simbahan diha sa ilang kinabuhi.

Kini nga mga leksiyon makatabang sa pagsulbad sa mga hagit nga giatubang sa kabatan-onan pinaagi sa pagtabang sa mga magtutudlo sa pagtutok diha ni Jesukristo, pagtudlo sa doktrina, ug pagdapit sa makugihong pagkat-on sa paagi nga gitudlo sa Espiritu. Kauban sa mga leksiyon sa Kurso sa Kasulatan, ang mga leksiyon sa Pagpangandam sa Kinabuhi makatabang sa pagpalig-on sa pagkakabig sa mga estudyante ngadto ni Jesukristo ug sa Iyang gipahiuli nga ebanghelyo.

Mga Leksiyon sa Pagpangandam sa Kinabuhi ug ang Tumong

Niini nga pagbansay, ikaw adunay oportunidad sa pagsuhid kon sa unsang paagi nga ang mga leksiyon sa Pagpangandam sa Kinabuhi gidisenyo aron matuman ang tumong sa S&I, sama sa mga leksiyon sa Kurso sa Kasulatan. Matag leksiyon sa Pagpangandam sa Kinabuhi gisulat sumala sa mosunod nga mga sumbanan diha sa “Pagtudlo” nga parapo sa tumong sa S&I:

Kita mosentro sa matag kasinatian sa pagkat-on diha ni Jesukristo ug sa Iyang ehemplo, mga hiyas, ug makatubos nga gahom. Kita motabang sa mga estudyante nga makat-on sa gipahiuli nga ebanghelyo ni Jesukristo sama sa makita diha sa mga kasulatan ug sa mga pulong sa mga propeta. Kita motabang sa mga estudyante sa ilang tahas diha sa proseso sa pagkat-on alang sa ilang kaugalingon. Kita maningkamot sa pagdapit sa Espiritu Santo aron sa pagtuman sa Iyang tahas diha sa matag kasinatian sa pagkat-on.

Ang mga Leksiyon sa Pagpangandam sa Kinabuhi Motabang nga Matuman ang Tumong sa S&I

Ipasabot

Samtang mag-andam ka sa mga leksiyon, lakip na sa mga leksiyon sa Pagpangandam sa Kinabuhi, mahimong makatabang nga mangita kon sa unsang paagi nga ang leksiyon nagtuman sa matag usa sa mga kapahayag gikan sa “Pagtudlo” nga parapo sa tumong.

Modelo

Sa ubos mao ang duha ka pinili gikan sa mga leksiyon sa Pagpangandam sa Kinabuhi alang sa 2025. Ang una mao ang leksiyon sa Pisikal ug Emosyonal nga Kahimsog nga giulohan og “Pagpalambo og mga Sundanan sa Himsog nga Paghunahuna.” Ang ikaduha mao ang leksiyon sa Pagmalamposon sa Pag-eskwela nga giulohan og “Pagdiskobre sa Imong mga Kalig-on ug mga Abilidad.” Tan-awa kon sa unsang paagi nga kini nga mga kalihokan sa pagkat-on, nga nagtutok sa managlahi gayod nga mga hilisgotan, gidisenyo aron matuman ang tumong sa S&I.

Leksiyon 186: Pagpalambo og mga Sundanan sa Himsog nga Paghunahuna

Nakatutok diha ni Kristo: Ania ang pipila ka ehemplo gikan niini nga leksiyon nga makatabang nga isentro ang kasinatian sa pagkat-on diha ni Jesukristo. Bantayi kon giunsa dinhi niini nga mga sitwasyon, nga ang mga estudyante gihangyo sa pagpangayo og tabang sa Manluluwas ug sa pagkat-on gikan sa Iyang ehemplo ug mga pagtulun-an.

Mahimo ka nga mopakigbahin diha sa mga estudyante nga ilang praktison ang pagdapit sa tabang sa Manluluwas aron makorehian ang dili tukma o dili himsog nga mga hunahuna.
Unsa kaha ang ipasabot sa pagtan-aw ngadto sa Manluluwas sa atong mga hunahuna? (Ang pipila ka ehemplo naglakip sa mosunod: pagpamalandong kon unsa kaha ang buhaton sa Manluluwas sa mga sitwasyon nga atong giatubang, mangita kon unsaon nga ang Iyang mga pagtulun-an magamit sa sitwasyon, ug paghinumdom sa Iyang gugma.)

Itudlo ang Doktrina: Ania ang pipila ka ehemplo gikan niini nga leksiyon nga makatabang sa mga estudyante sa pagkat-on gikan sa mga kasulatan ug sa mga pulong sa mga propeta. Bantayi nga ang mga estudyante gihatagan og mga oportunidad sa pagtuon sa mga kasulatan ug nga ang mga pulong ni Presidente Russell M. Nelson makatabang sa mga estudyante nga masabtan kini nga kasulatan.

Basaha ang Doktrina ug mga Pakigsaad 6:36, mangita sa unsay gidapit sa Ginoo nga atong buhaton.
Namulong mahitungod niini nga kasulatan, si Presidente Nelson mitudlo: “Kinahanglang lig-on kitang nakatutok sa Manluluwas ug sa Iyang ebanghelyo. Nagkinahanglan og grabeng paningkamot sa pangisip nga motan-aw Kaniya sa matag hunahuna. Apan kon atong buhaton, ang atong mga pagduha-duha ug mga kahadlok mahanaw” (Russell M. Nelson, “Pagdawat sa Gahom ni Jesukristo diha sa Atong Kinabuhi,” Liahona, Mayo 2017, 41).

Pagdapit og Makugihong Pagkat-on: Ania ang pipila ka ehemplo gikan niini nga leksiyon nga makatabang sa mga estudyante nga matuman ang ilang tahas sa pagkat-on alang sa ilang kaugalingon. Bantayi nga ang mga estudyante gidapit sa pag-ila sa ilang kaugalingong mga panginahanglan aron sa pagdasig nila nga moapil sa kasinatian sa pagkat-on. Ang mga estudyante gidapit usab sa pagpakigbahin sa ilang kaugalingong, talagsaon nga mga hunahuna ug mga ideya.

Dapita ang mga estudyante sa pagpamalandong kon unsa ka sagad nga ilang mabantayan ang ilang kaugalingong mga sundanan sa paghunahuna ug kon kadto nga mga sundanan makatabang o tukma ba.
Unsay nakapadayeg kanimo sa pamahayag ni Presidente Nelson?

Pagtudlo pinaagi sa Espiritu: Ania ang ehemplo sa usa ka paagi nga ang leksiyon makatabang sa mga magtutudlo sa pagdapit sa Espiritu Santo sa pagtuman sa Iyang tahas diha sa kasinatian sa pagkat-on. Ang mga magtutudlo giawhag nga planohon og maayo ang mahitungod sa pagdapit sa mga estudyante nga magtinguha sa giya gikan sa Espiritu Santo. Ang mga pagdapit sama niini makatabang sa mga estudyante sa ilang mga paningkamot nga makadawat og inspirasyon gikan sa Espiritu Santo diha sa ilang pagkat-on.

Dapita ang mga estudyante sa pagtinguha og giya gikan sa Espiritu Santo aron mas masabtan ang ilang kaugalingong mga sundanan sa paghunahuna, ilabi na kon motubag sa mahagiton nga mga sitwasyon.

Leksiyon 193: Pagdiskobre sa Imong mga Kalig-on ug mga Abilidad

Nakatutok diha ni Kristo: Ania ang pipila ka ehemplo gikan niini nga leksiyon nga makatabang nga isentro ang kasinatian sa pagkat-on diha ni Jesukristo. Bantayi kon sa usang paagi nga ang tataw nga mga kamatuoran dinhi niini nga leksiyon konektado ngadto ni Kristo ug dapita ang mga estudyante nga modangop ngadto Kaniya alang sa tabang. Ang mga estudyante gipahinumdoman usab sa ilang balaanong pagkatawo ug ang mga kalig-on ug mga abilidad nga anaa kanila mga timailhan sa gugma ug kaluoy sa Dios.

Ang mga estudyante moila og mga kamatuoran nga susama sa mosunod: Ang Ginoo wala magtan-aw sa panagway sa gawas apan sa kasingkasing (tan-awa sa 1 Samuel 16:7). Mahimo ko ang tanang butang pinaagi ni Jesuristo, nga nagpalig-on kanako (tan-awa sa Mga Taga-Filipos 4:13; Alma 26:12). Ang bili sa mga kalag mahinungdanon sa panan-aw sa Dios (tan-awa sa Doktrina ug mga Pakigsaad 18:10).
Pahinumdomi ang mga estudyante nga isip mga anak sa Dios nga gilalang sa Iyang panagway, matag usa nato gipanalanginan og lainlaing mga kalig-on ug mga abilidad. Tingali adunay mga estudyante nga naglisod sa pag-ila sa mga kalig-on ug mga abilidad nga gipanalangin sa Dios kanila.

Itudlo ang Doktrina: Ania ang pipila ka ehemplo gikan niini nga leksiyon nga makatabang sa mga estudyante sa pagkat-on gikan sa mga kasulatan ug sa mga pulong sa mga propeta. Bantayi nga ang mga kasulatan nga tun-an sa mga estudyante gipili og tuyo aron ang mga estudyante modangop ngadto ni Jesukristo alang sa Iyang tabang. Dayon ang mga estudyante adunay oportunidad sa pagtuon sa tambag gikan sa usa ka Apostol kon unsaon nga madiskobre ang pipila sa ilang hinatag sa Dios nga mga gasa.

Tun-i ang pipila sa mosunod nga mga tudling, nga mangita sa mahangtoron nga mga kamatuoran nga makatabang nato sa pag-ila sa atong abilidad aron makab-ot ang atong potensiyal pinaagi ni Jesukristo. 1 Samuel 16:7; Mga Taga-Filipos 4:13; Jacob 4:7; Alma 26:12; Doktrina ug mga Pakigsaad 18:10.
Si Elder Ronald A. Rasband sa Korum sa Napulog Duha ka Apostoles mipakigbahin og pipila ka paagi nga kita makaila sa mga talento, mga kalig-on, ug mga abilidad nga gipanalangin sa Langitnong Amahan kanato: “Ang mga talento nga gihatag sa Dios kanato una mahimong klaro diha sa mga interes nga atong gitinguha. Kon kamo naghunahuna mahitungod sa inyong mga talento, paghimo og lista sa mga butang nga gusto ninyong buhaton. Ilakip ang tanang kalihokan nga nalingaw kamo gikan sa lainlaing mga aspeto sa inyong kinabuhi—espirituwal, musika, drama, akademiko, dula, ug uban pa. Tun-i ug pamalandongi ang inyong patriyarkal nga panalangin alang sa mga ideya ug inspirasyon. Mokonsulta sa mga sakop sa pamilya, kasaligan nga mga higala, mga magtutudlo, ug mga lider; ang uban kasagaran mao ang makakita sa anaa kanato unsay lisod nato nga makita sa atong kaugalingon” (Ronald A. Rasband, “Parables of Jesus: The Parable of the Talents,” Ensign, Aug. 2003, 34).

Pagdapit og Makugihong Pagkat-on: Ania ang pipila ka ehemplo gikan niini nga leksiyon nga makatabang sa mga estudyante nga matuman ang ilang tahas sa pagkat-on alang sa ilang kaugalingon. Bantayi kon sa unsang paagi nga kini nga mga kalihokan makatabang sa mga estudyante sa paghunahuna sa ilang kaugalingon nga mga kasinatian ug mga kahimtang. Gituyo kini aron matabangan ang mga estudyante nga mobati og kadasig nga mogahin sa ilang mga kasingkasing ug mga hunahuna ngadto sa kasinatian sa pagkat-on aron matubag ang mga panginahanglan nga anaa nila karon. Ang mga estudyante adunay oportunidad usab sa paghunahuna mahitungod sa tinuod nga mga hagit nga ilang giatubang ug kon sa unsang paagi ang mga kamatuoran nga ilang nakaplagan diha sa mga kasulatan makatabang nila.

Hunahunaa ang mahitungod sa mga responsibilidad o mga oportunidad sa pangempleyo nga ganahan nimong ipadayon sa umaabot. Sulayi usab ang pag-ila sa mga kahanas ug mga abilidad nga gikinahanglan pa gihapon nimong palamboon nga makatabang nimo nga mas maandam alang sa umaabot.
Sa unsang paagi nga kini nga mga kamatuoran makatabang nato kon kita mobati og kawalay kadasig mahitungod sa atong mga abilidad?

Pagtudlo pinaagi sa Espiritu: Ania ang ehemplo sa usa ka paagi nga ang leksiyon makatabang sa mga magtutudlo sa pagdapit sa Espiritu Santo sa pagtuman sa Iyang tahas diha sa kasinatian sa pagkat-on. Bantayi nga ang mga estudyante gidapit sa pagtinguha og inspirasyon gikan sa Espiritu Santo aron mas klaro nga makakita sa ilang mga panginahanglan karon ug sa sunod nga mga lakang aron mahimong mas maandam alang sa kinabuhi.

Samtang magtuon ka karon, tinguhaa ang giya sa Langitnong Amahan pinaagi sa Espiritu Santo aron matabangan ka sa pag-ila sa mga kalig-on ug mga kahanas nga anaa na nimo nga moandam nimo alang niini nga mga responsibilidad.

Pagpraktis

Pag-ila og leksiyon sa Pagpangandam sa Kinabuhi nga imong itudlo sa dili madugay, base sa imong lokal nga giya sa gipaspason. Rebyoha kini nga leksiyon nga mangita sa mga tubag sa mosunod nga mga pangutana:

Sa unsang paagi nga ang kasinatian sa pagkat-on nakasentro diha ni Jesukristo?
Sa unsang paagi nga ang leksiyon makatabang sa mga estudyante sa pagkat-on sa ebanghelyo ni Jesukristo nga makita diha sa mga kasulatan ug sa mga pulong sa mga propeta?
Sa unsang paagi nga ang leksiyon makatabang sa mga estudyante sa pagtuman sa ilang tahas sa pagkat-on alang sa ilang kaugalingon?
Sa unsang paagi nga ang leksiyon makatabang sa pagdapit sa Espiritu Santo sa pagtuman sa Iyang tahas diha sa kasinatian sa pagkat-on?

Mga Pasidaan

Ang mga leksiyon sa Pagpangandam sa Kinabuhi naghatag og mga oportunidad alang sa mga estudyante sa seminary sa pagkat-on kon sa unsang paagi nga ang Langitnong Amahan ug si Jesukristo makatabang nila sa pagdumala sa mga hagit sa mortalidad. Sa imong pagtudlo niini nga mga leksiyon, bantayi ang mosunod nga mga pasidaan:

Ang matag Kasinatian sa Pagkat-on Kinahanglan nga Nakatutok diha ni Jesukristo, Magtudlo sa Doktrina, ug Magdapit og Makugihong Pagkat-on

Ang matag kasinatian sa pagkat-on sa seminary kinahanglan nga makatabang nga matuman ang Tumong sa Seminaries and Institutes of Religion. Kon dili ka magmabinantayon, ang mga leksiyon sa Pagpangandam sa Kinabuhi dali rang mawala sa balanse ug dili makab-ot ang tumong niini. Pananglitan, ang magtutudlo mahimong adunay daghan kaayo og kasinatian sa usa sa mga hilisgotan ug modesisyon nga motutok og maayo diha sa daghang kahanas ug mga estratehiya kon unsaon sa pagtubag sa panginahanglan sa mga estudyante. Hinoon, diha sa proseso, ang magtutudlo dali nga makabaliwala sa panginahanglan sa pagkonektar sa mga estudyante ngadto ni Kristo ug sa pagtudlo sa doktrina gikan sa mga pulong sa mga kasulatan ug sa mga propeta.

Sitwasyon nga Pagatun-an: Si Sister Jones daghan kaayo og kasinatian sa pagplano sa pinansiyal. Si Sister Jones nakadesisyon sa pagtudlo sa iyang mga estudyante og daghang kahanas mahitungod sa pagplano sa pinansiyal sa paagi nga nakatutok lang gayod sa tigkat-on.

Unsa ang pipila sa potensiyal nga mga sangpotanan ni Sister Jones sa pagtudlo sa leksiyon niini nga paagi?

Ibalanse ang Gidaghanon sa mga Leksiyon sa Pagpangandam sa Kinabuhi sama sa Gilatid diha sa Kurikulom

Tingali adunay pipila ka matang sa leksiyon o mga hilisgotan nga gustong gahinan sa mga magtutudlo og mas dako o mas gamay nga oras sa klase kaysa uban. Hinumdomi nga daghang tawo, lakip na niadtong gikan sa laing mga departamento sa Simbahan, ang nakigtinambagay aron sa pagtino sa gidaghanon sa mga leksiyon sa matag kategoriya. Bisan ang hilisgotan nga murag dili kaayo makapainteresado sa magtutudlo mahimong bililhon kaayo sa piho nga mga estudyante. Ang paggahin og mas dako nga oras sa klase sa pipila ka leksiyon kaysa gilatid diha sa kurikulom mosangpot ngadto sa dili paghatag og gibug-aton sa ubang importante nga mga resulta sa pagkat-on. Ang “Pagbansay alang sa Paghimo og Giya sa Gipaspason" nagrekomendar nga kasagaran kinahanglang adunay mas daghang leksiyon sa Kurso sa Kasulatan kaysa mga leksiyon sa Pagpangandam sa Kinabuhi diha sa imong giya sa gipaspason. Ang gidaghanon sa mga leksiyon alang sa matag kategoriya sa Pagpangandam sa Kinabuhi nagpakita usab sa gisugyot nga pagbalanse. Sunda kini nga mga lagda sa pipila lang ka eksepsiyon.

Sitwasyon nga Pagatun-an: Si Brother Hendricks naghinamhinam nga sa kataposan aduna nay gipaninguha og maayo nga mga paningkamot diha sa seminary sa pag-andam sa kabatan-onan alang sa mga misyon. Imbes magtudlo og lima lang ka leksiyon bahin sa pagpangandam sa misyon, migahin siya og duha ka semana sa pagtudlo niini nga mga leksiyon ingon man sa pipila nga iyang gihimo mismo.

Unsa ang pipila sa potensiyal nga mga sangpotanan sa pamaagi ni Brother Hendricks sa pagtudlo sa mga leksiyon sa pagpangandam sa misyonaryo?

Gamiton ang Kurikulom Bisan Unsa Pa ang Imong Lebel sa Kasinatian

Susama sa gidaghanon sa mga leksiyon, ang matag katuyoan sa leksiyon gitino usab pinaagi sa pakigtambayayong sa daghang tawo, lakip na sa mga sakop sa laing mga departamento sa Simbahan. Kini nga mga departamento kasagaran nagbase sa pagsiksik nga nakompleto pinaagi sa Correlation Research Division sa Simbahan sa mga kasayoran nga ilang gihatag. Bahin sa tanang leksiyon sa kurikulom sa S&I, ang Correlation Department sa Simbahan mainampingon nga mirebyo sa mga leksiyon sa Pagpangandam sa Kinabuhi alang sa katukma ug kaangay sa doktrina. Ang mga leksiyon gidisenyo nga yano ang pamaagi sa hilisgotan nga ilang hisgotan, dili komprehensibo nga kurso sa hisgotanan. Kon sinati ka sa hilisgotan, mabati nimo nga ang importante nga mga ideya wala maapil. Magmatngon gayod mahitungod sa pagdugang og butang nga wala na maapil. Bisan unsa pa kadaghan o kagamay sa imong kasinatian sa gihatag nga hilisgotan, gamita ang kurikulom isip pundasyon alang sa kasinatian sa pagkat-on nga imong ihatag. Sugdi pinaagi sa pagsagop sa leksiyon sa dili pa mohimo og desisyon kon unsay ipahiangay. Alang sa dugang pa bahin niini, tan-awa sa “Pagbansay alang sa Pagsagop ug Pagpahiangay sa Kurikulom sa Seminary” nga makita diha sa Pagbansay alang sa Kurikulom sa Seminary.

Sitwasyon nga Pagatun-an: Si Sister Benson usa ka lisensiyado nga clinical social worker. Sa kasamtangan nakita niya ang dakong kalamposan gamit ang bag-ong pamaagi sa pagtabang sa iyang mga kliyente bahin sa pagkaadik. Nakadesisyon siya sa pagtudlo sa iyang mga estudyante og mga kahanas nga may kalabotan niining bag-ong pamaagi imbes usa sa mga leksiyon sa pisikal ug emosyonal nga kahimsog.

Unsa ang pipila sa potensiyal nga mga sangpotanan sa pamaagi ni Sister Benson sa mga leksiyon sa pisikal ug emosyonal nga kahimsog?

Hinumdomi ang Imong Tahas isip Magtutudlo

Samtang magtudlo ka sa mga leksiyon sa Pagpangandam sa Kinabuhi, hinumdomi ang imong tahas isip magtutudlo sa seminary. Ang mga estudyante mahimong mopakigbahin nimo og mahagiton nga mga sitwasyon nga ilang giatubang. Ang imong tahas mao ang pagpaduol nila ngadto sa ilang mga ginikanan ug sa mga lider sa pagkapari, nga makagiya nila sa tabang nga ilang gikinahanglan. Alang sa tabang sa mga sitwasyon nga may kalabotan sa pag-abuso, palihog tan-awa sa “Abuse” diha sa Seminaries and Institutes Emergency Response Guide.

Sitwasyon nga Pagatun-an: Nakita ni Sister Benson nga human sa pagtudlo sa iyang mga leksiyon, daghang estudyante ang magpabilin human sa klase. Gusto sila nga mopakigbahin ngadto niya og pipila ka personal kaayo nga mga detalye sa ilang mga kinabuhi. Siya nakigkita nila sa tinagsa-tagsa sa iyang opisina human sa klase ug human sa eskwela.

Unsa kaha ang pipila ka potensiyal nga sangpotanan sa pagpakighinabi ni Sister Benson sa iyang mga estudyante?

Panapos

Sa tibuok kurso sa upat ka tuig sa seminary, ang mga estudyante adunay daghang oportunidad sa pagkat-on kon unsaon sa paggamit sa mga pagtulun-an sa Manluluwas ngadto sa nagkadaiya nga managlahing mga kahimtang ug mga sitwasyon. Ang mga kasinatian sa pagkat-on nga idugang sa mga leksiyon sa Pagpangandam sa Kinabuhi ngadto sa mga leksiyon sa Kurso sa Kasulatan mas moandam sa tibuok henerasyon sa pag-atubang sa mga hagit sa kinabuhi pinaagi sa paghupot og kalig-on, mga pagtulun-an, ug ebanghelyo sa Manluluwas. Mas masangkapan sila aron maandam ang ilang mga kaugalingon, ilang mga pamilya, ug ang lain pa alang sa kinabuhing dayon uban sa ilang Amahan sa Langit.