Aoaoga mo le Faaaogaina ma le Fetuunaiga o Mataupu Aoaoina a le Seminare

O le Faamoemoega o Seminare ma Inisitituti o Mataupu Faalelotu o loo ta’u mai ai tatou te “fesoasoani i le autalavou ma talavou matutua ia faalolotoina lo latou liua ia Iesu Keriso ma Lana talalelei toefuataiina.” E faaauau pea le faamoemoega e ta’u mai ai mea nei e uiga i le fesoasoani i tamaiti aoga ia faalolotoina le liua:

Tatou te faatotonugalemuina aafiaga taitasi e aoao ai e uiga ia Iesu Keriso ma Lana faataitaiga, uiga auaumama, ma le mana togiola. Tatou te fesoasoani i tamaiti aoga e aoao le talalelei toefuataiina a Iesu Keriso e pei ona maua i tusitusiga paia ma upu a perofeta. Tatou te fesoasoani i tamaiti aoga e faataunuu la latou matafaioi i le aoaoina mo i latou lava. Tatou te taumafai e valaaulia le Agaga Paia e faataunuu Lana matafaioi i aafiaga taitasi e aoao ai.

O mataupu aoaoina a le seminare ua mamanuina ma le faaeteete e fesoasoani ia te oe e tuuina atu lenei ituaiga o aafiaga e aoao ai. O lesona taitasi e totonugalemu ai le aafiaga e aoao ai ia Iesu Keriso, fesoasoani i tamaiti aoga e aoao le talalelei mai tusitusiga paia ma upu a perofeta, ma tuuina atu avanoa mo tamaiti aoga e faataunuu ai la latou matafaioi i le aafiaga e aoao ai. E ala i le tuufaatasia o nei elemene taua e tolu o le faamoemoega ma le alofa mo i latou tatou te aoaoina, tatou te valaaulia ai le Agaga Paia e faataunuu Lana matafaioi i le aafiaga e aoao ai. O le Aoao atu i le Ala a le Faaola ua faailoa mai ai “O le Agaga o le faiaoga moni ma o le punavai moni o le liuaina.” Seiloga lava tatou te aoao atu e ala i le Agaga ona mafai ona faalolotoina le liua i le Faaola.

O mataupu aoaoina a le seminare ua iloiloina ma le faaeteete ma fesootai e fesoasoani ia te oe:

• Ia mautinoa le sa’o atoatoa o aoaoga faavae.

• Atagia mai le faamoemoega o le tusitala musuia.

• Faatumauina se faiga paleni e faataitai ai mataupu faavae o aoaoga faaKeriso o loo maua i le Aoao Atu i le Ala a le Faaola.

• Tuu atu ni aafiaga e aoao ai mo tagata aoga e faasoa mai ma faaali atu mea o loo latou aoaoina.

• Faaaoga ni metotia eseese.

E tele mafaufauga taua e manatua pe a saunia se lesona. O le taliaina o le mataupu aoaoina e mafai ona fesoasoani e taiala ai oe i mea uma e lua ma le auala e aoao atu ai. E mafai foi ona fesoasoani ia te oe e tumau ai i se faavae mautu faaleaoaoga faavae.

O nisi nei o auala e mafai ona e faaaogaina ai le mataupu aoaoina:

• Faitau ma le toto’a le faamoemoega mo le lesona. O loo maua lenei mea i le pepa o faamatalaga o le vaaiga aoao ma le fuaiupu mulimuli o le faatomuaga i lesona taitasi. O anotusi ma gaoioiga uma e ogatusa ma lenei faamoemoega po o le taunuuga o le aoaoina.

• Faitau i le lesona. Mafaufau pe o le a faapefea ona faitau e tagata o le vasega ia mau ua filifilia, upumoni, upusii, ma gaoioiga ua faaogatusa ma le faamoemoega o le lesona ma pe faapefea ona latou taulai atu ia Iesu Keriso, aoao atu le aoaoga faavae, ma valaaulia le aoaoina ma le filiga. Ia gauai lelei atu i le gaoioiga e aoao ai e latalata i le faaiuga o le lesona, lea e maua ai e tagata aoga se avanoa e faaalia ai le faamoemoega mo le lesona.

• Mafaufau e tali fesili ma faia gaoioiga e pei o oe o se tagata aoga. E mafai ona fesoasoani lenei mea ia te oe e aoao ai e ala i le Agaga ma ulufale atu ai i le potuaoga ua faagaeetiaina, siitia, ma saunia lelei ai e tuuina atu se aafiaga talitutusa mo au tamaiti aoga..

• Saili ia malamalama ma aoao atu ituaiga uma o lesona o loo maua i mataupu aoaoina, e tusa lava pe fou ia te oe. (O ituaiga o lesona e aofia ai lesona o le Kosi o Tusitusiga Paia, lesona Faataitai o le Atamai i Aoaoga Faavae, Iloilo au lesona e Aoao ai, ma lesona o Sauniuniga mo le Olaga.) O nei aafiaga taitasi e aoao ai e saofaga i auala tulaga ese e faalolotoina ai le liua o tamaiti aoga ia Iesu Keriso ma Lana talalelei.

I le avea ai ma se faiaoga seminare, ua e i ai i se tulaga faamanuiaina e fesoasoani ai i au tamaiti aoga e o mai ia Iesu Keriso. E ala i au fegalegaleaiga masani ma au tamaiti aoga, o le a e iloa lelei ai ma alofa lelei ia i latou. O le iloaina ma le alofa i au tamaiti aoga o le a faateleina ai lou tomai e maua musumusuga mai le Agaga Paia e uiga i le taimi ma le auala e faia ai fetuunaiga i mataupu aoaoina. A o e saunia lesona e faaaoga ai le mataupu aoaoina, amata au sauniuniga i le tatalo. O le a musuia oe e le Tama Faalelagi e ala i le Agaga Paia i fetuunaiga, pe afai e i ai, e mafai ona e faia i le anotusi o le lesona ina ia taulimaina lelei ai manaoga ma tomai o au tamaiti aoga.

O mafuaaga e mafai ona e fetuunaia ai se lesona e aofia ai:

• Ina ia fesoasoani i tamaiti aoga i faafitauli ma fesili o i ai nei. (Tagai i le mataupu suesue a Brother Jones.)

• Ina ia faia se vaega o le lesona ia sili atu ona talafeagai e faavae i manaoga o au tamaiti aoga, tomai, aganuu, po o punaoa o loo maua. (Tagai i le mataupu suesueina o Sister Dube, Brother Reyes, ma Sister Rodriguez.)

• Ina ia faaaoga nisi faamatalaga, taitaiga, po o punaoa e tuuina atu e taitai o le Ekalesia. (Tagai i le mataupu suesue a Sister Schmidt.)

• Ina ia maua se auala sili atu e faataunuu ai se vaega atofaina o le lesona. O faataitaiga e mafai ona aofia ai le fetuunaia o se lesona faatino i se auala e saunia ai pea mafaufau ma loto o tagata aoga ina ia aoaoina pe valaaulia tagata aoga e faatino se tala mai tusitusiga paia nai lo le matamata i se vitio o loo faaalia ai lea lava mea e tasi na tupu. (Tagai i le mataupu suesue a Brother Li.)

A o lei fetuunaia le mataupu aoaoina, mafaufau e fai ifo ia te oe lava fesili e pei o nei:

• Pe o tuuina mai pea e la’u fetuunaiga se aafiaga e aoao ai lea e taulai atu ia Iesu Keriso, aoao atu le aoaoga faavae, ma valaaulia le aoaoina ma le filiga?

• Pe o ogatusa la’u fetuunaiga ma uunaiga a le Agaga Paia ma mataupu faavae o aoaoga faaKeriso o loo maua i le Aoao Atu i le Ala a le Faaola?

• Pe o atagia mai i le fetuunaiga le faamoemoega o le tusitala musuia?

• Pe o taulai atu le fetuunaiga i mataupu faavae e liua ai?

• Pe ua ou malamalama i le auala e mafai ai e la’u fetuunaiga ona aafia ai aafiaga o lesona ma le faavasegaga i le lumanai mo tamaiti aoga?

E ui lava e mafai ona fetuunai soo se anomea i le mataupu aoaoina, ae o le ata lenei o loo faapupula mai ai se vaega o le auala e sili atu ai ona talafeagai vaega eseese o se lesona e fetuunai ai nai lo isi.

Mo se faataitaiga, o le faamoemoega o le lesona, o le matalalaga o se poloka, po o le upumoni ua faamatamatatetele atonu e itiiti le talafeagai e fetuunai ai nai lo le auala e amata ai se lesona po o a faataitaiga e ono faasoa atu e se faiaoga o se upumoni mataofiofi. O aitema e latalata atu i le itu tauagavale e mafai ona tele ina faaaogaina, ae o aitema i le itu taumatau e mafai ona tele ina fetuunai. Ia manatua o fautuaga nei. E le o faamoemoeina faiaoga e fetuunai mea uma i le itu taumatau, e pei lava ona le faamoemoeina i latou e faaaoga mea uma i le itu tauagavale.

O le a taialaina oe e le Tama Faalelagi e ala i le Agaga Paia a o e suesue ma le agaga tatalo i Lana afioga ma saunia lesona e faamanuia ai Ona atalii ma afafine. E mafai ona ia fesoasoani ia te oe ia malamalama i le auala e faaaoga ai mea ua saunia i le mataupu aoaoina ma le taimi e faia ai ni fetuunaiga e fesoasoani lelei ai i au tamaiti aoga.