Ko e Fekumi ʻi he Ngaahi Folofolá pea ʻi he Gospel Library

Fakamatalaʻi ange ʻe lava ke tau kumi ʻa e ngaahi potufolofola fekauʻakí, ko e ngaahi akonaki ʻa e kau taki ʻo e Siasí, mītiá, mo ha ngaahi fakamatala kehe ke fakaloloto ʻetau ako ha potufolofola. ʻE lava ke tokoniʻi kitautolu ʻe he ngaahi maʻuʻanga tokoni mo e ngaahi meʻangāue ko ʻení ke tau maʻu faingofua mo vave ange ʻa e ngaahi potufolofolá mo e kanotohí: futinoutí, Fakahinohino ki he Ngaahi Folofolá, mapé, ʻū taá, pea mo e fekumi ʻi he Gospel Library. (ʻI he ngaahi pulusinga faka-Pilitānia ʻo e Tohi Tapu ʻa e Siasí, ʻoku toe maʻu ai foki ʻa e Topical Guide mo e Bible Dictionary.)

Ke fakatātaaʻi ʻa e taukei ko ʻení, te mou ala fakaʻaongaʻi ha niʻihi ʻo e ngaahi fakakaukau ko ʻení pe ko haʻo fakakaukau pē ʻaʻau.

• Lau ʻa e 3 Nīfai 9:20, pea fakahinohino ange ʻa e kupuʻi lea “te mou ʻoatu kiate au ʻa e feilaulau ko e loto-mafesifesi mo e laumālie fakatomala.” Fakahinohino ʻa e 3 Nīfai 9:20, futinouti a ko ha maʻuʻanga tokoni ia ki hono kumi ʻo e ngaahi potufolofola ʻoku fekauʻaki mo e tefito ko ʻení. Te ke lava foki ʻo fakaafeʻi ʻa e kau akó ke nau kumi ʻa e fakamatala ki he “Loto-mafesifesí” ʻi he Fakahinohino ki he Ngaahi Folofolá.

• Te ke lava ʻo fakatātaaʻi, pe ʻe ha niʻihi ʻo hoʻo kau akó, ʻa e founga hono fakaʻaongaʻi ʻo e fekumí (search) ʻi he Gospel Library. Te mou lava foki ʻo fakaʻilongaʻi ʻa e ngaahi founga fekumi lelei ange ko ʻení.

  Ngaahi Ola ʻo e Sivi e Fekumí (Filter)

  Lomiʻi ʻi he fakaʻilonga ʻo e fekumí pea taipeʻi ha foʻi lea pe kupuʻi lea hangē ko e “tānaki ʻo ʻIsilelí.” Fakaʻaliʻali ʻa e founga ke sivi ai ʻa e ngaahi olá. Hangē ko ʻení, ke kumi ha ngaahi potufolofola fekauʻaki mo hono tānaki ʻo ʻIsilelí, lomiʻi ʻi he Collections filter ofi ki he konga ki ʻolunga ʻo e pēsí pea fili ʻa e Ngaahi Folofolá (Scriptures). Ke maʻu ʻa e ngaahi akonaki ʻa e kau taki ʻo e Siasí fekauʻaki mo e tānakí, lomiʻi ʻi he Collections filter pea fili ʻa e Konifelenisi Lahí.

  Fekumi ʻo Fakaʻaongaʻi ha Foʻi Lea pe Kupuʻi Lea ʻi he Ngaahi Potufolofolá

  Fekumi ʻo fakaʻaongaʻi ha kupuʻi lea mei ha potufolofola. Hangē ko ʻení, ʻi he Gospel Library, ʻalu ki he Tokāteline mo e Ngaahi Fuakava 18:10. Fakaʻilongaʻi ʻa e kupuʻi lea “mahuʻinga lahi ʻo e ngaahi laumālié.” Ko e taimi ‘e ʻasi mai ai ʻa e toolbar, lomiʻi ʻi he Search. Te ke lava ʻo fakatātaaʻi ʻa e founga ke fakaʻaongaʻi ai ʻa e ngaahi meʻasivi (filters) ke kumi ʻa e ngaahi lea ʻo e konifelenisí, ngaahi fakamatala ʻa e Siasí, mo ha ngaahi fakamatala kehe ʻoku lave pea ʻomi ha ngaahi akonaki fekauʻaki mo e kupuʻi lea ko ʻení.

Fakatokangaʻi ange: Te ke lava ʻo maʻu ha ngaahi maʻuʻanga tokoni lahi ange, fanga kiʻi tokoni, mo ha ngaahi vitiō kehe ʻi he konga “Help” (Tokoni) ʻi he polokalama Gospel Library, kau ai ʻa e “Gospel Library User Guide (iOS)” mo e “Gospel Library User Guide (Android).”

Fili ha potufolofola mei he ako folofola ʻo e uike ní pe fakaʻaongaʻi ha taha ʻo e ngaahi sīpinga ʻoku ʻoatu ʻi laló ke fakaafeʻi ʻa e kau akó ke nau fakaangaanga ʻa e taukei ko ʻení. ʻE lava ke kumi ʻe he kau akó ha toe ngaahi ʻilo mo ha ngaahi akonaki lahi ange ʻoku fekauʻaki mo e potufolofolá ʻaki hano fakaʻaongaʻi ʻa e ngaahi tokoni ki he akó ʻi heʻenau folofolá pe ko e polokalama fekumi ʻi he Gospel Library. Fakaafeʻi ʻa e kau akó ke nau vahevahe mo e kalasí ʻa e meʻa ʻoku nau ʻiló.

Ngaahi potufolofola lahi ange ke fakaangaangá:

• 1 Samuela 16:7. ʻE lava ke kumi ʻa e kau akó ʻi he futinoutí pe ko e “ʻIloʻiló, Meʻafoaki ʻo e” ʻi he Fakahinohino ki he Ngaahi Folofolá. Kapau ʻoku nau fakaʻaongaʻi ʻa e polokalama Gospel Library, te nau lava ʻo kumi ʻaki ʻa e fakamoʻoni folofolá pe ʻaki ʻa e kupuʻi lea “ʻoku ʻafioʻi ʻe [he ʻEikí] ʻa e lotó.”

• 2 Pita 1:4. ʻE lava ke kumi ʻe he kau akó ʻi he ngaahi futinoutí, pe fakaʻaongaʻi ʻa e polokalama Gospel Library, ke kumi ʻa e kupuʻi lea “kau ai ʻi he anga ʻa e ʻOtuá.”

• 2 Nīfai 9:6–7. ʻE lava ke kumi ʻe he kau akó ʻa e “Fakaleleí, Fakaleleiʻí” ʻi he Fakahinohino ki he Ngaahi Folofolá. . Kapau ʻoku fakaʻaongaʻi ʻa e polokalama Gospel Library, te nau lava ʻo fekumi ʻa e fakamoʻoni folofolá pe ko e kupuʻi lea “Fakalelei taʻe-fakangatangatá.”

• Tokāteline mo e Ngaahi Fuakava 93:36. ʻE lava ke kumi ʻe he kau akó ʻa e ngaahi futinoutí mo e “ʻAtamai Potó” ʻi he Fakahinohino ki he Ngaahi Folofolá. Kapau ʻoku fakaʻaongaʻi ʻa e polokalama Gospel Library, te nau lava ʻo kumi ʻaki ʻa e fakamoʻoni folofolá pe fakaʻaongaʻi ʻa e kupuʻi lea “ko e nāunau ʻo e ʻOtuá ko e ʻatamai poto.”

Poupouʻi ʻa e kau akó ke nau fakaʻaongaʻi ʻa e taukei ko ʻeni ʻo e fekumi ʻi he folofolá pea ʻi he Gospel Library lolotonga ʻenau ako fakatāutahá pea mo e lolotonga ʻa e fealēleaʻaki fakakalasí. Fakaafeʻi ke nau ōmai mateuteu ki he kalasi hokó ke vahevahe ʻa e meʻa naʻa nau ako fekauʻaki mo ha potufolofola ʻi haʻanau kumi ʻi he ngaahi futinoutí, ko e Fakahinohino ki he Ngaahi Folofolá, ko e fakahokohoko fakamotuʻalea ki he folofola ʻe tolú, pe ko e Gospel Library, ki ha ngaahi akonaki mo ha ngaahi ʻilo lahi ange fekauʻaki mo e potufolofola ko iá. Fakakaukauʻi ha ngaahi founga te mou lava ai ʻo hokohoko atu hono fakaangaanga ʻa e taukei ko ʻení ʻi he kalasí.