Ko Hono ʻIloʻi ʻa e Ngaahi Moʻoni ʻo e Ongoongoleleí ʻi he Folofolá

Fakamatalaʻi ange ko e folofolá ko ha tauhiʻanga ia ʻo e moʻoni taʻengatá. ʻOku tau ui he taimi ʻe niʻihi ʻa e ngaahi moʻoni taʻengata ko ʻení ko e tokāteline pe ngaahi tefitoʻi moʻoni ʻo e ongoongoleleí. ʻOku maʻu ʻe he tokāteline mo e ngaahi tefitoʻi moʻoni ʻa e ʻEikí ʻa e mālohi ke liliu ʻetau moʻuí (vakai, ʻAlamā 31:5).

ʻOku ʻi ai ha ngaahi moʻoni ʻe niʻihi ʻoku faingofua ange ke ʻiloʻi koeʻuhí he ʻoku fakamatalaʻi kinautolu ʻi he folofolá. ʻOku faʻa talamuʻaki ʻa e ngaahi moʻoni ko ʻeni ʻi he taimi ʻe niʻihi ʻaki ha ngaahi foʻi lea pe kupuʻi lea ʻo fakaʻilongaʻi ai ʻe akoʻi ha foʻi moʻoni, hangē ko e “ko ia ʻoku tau vakai,” “manatu,” “ko ia ai,” “ko ia,” pe “vakai.”

ʻOku ʻi ai mo ha ngaahi moʻoni kehe ʻoku ʻikai fakahā mahino ka ʻoku fokotuʻu pe fakatātaaʻi ʻi he ngaahi fakamatala, ngaahi meʻa ʻoku hoko, mo e ngaahi tala-fakatātā ʻi he folofolá. Te ke lava ʻo ʻiloʻi ʻa e ngaahi moʻoni ʻoku fokotuʻu pe fakatātaaʻi maí ʻaki haʻo ʻeke kiate koe ha ngaahi fehuʻi hangē ko ʻení:

• Ko e hā ʻa e lēsoni pe taumuʻa ʻo e talanoa ko ʻení? Ko e hā e ʻuhinga naʻe fakakau ai ia ʻe he tokotaha faʻu tohí?

• Ko e hā ha meʻa te u lava ʻo ako mei he kakai ʻi he talanoa ko ʻení?

• ʻE lava nai ke u fakatokangaʻi ha fekauʻaki ʻa e tupuʻangá mo e ola ʻi he talanoá ʻoku fakaʻaongaʻi ki he kakaí ʻi he ʻahó ni?

Fakaafeʻi ʻa e kau akó ke nau fakaangaanga ʻa e kumi ke ʻiloʻi ʻa e ngaahi moʻoni ʻo e ongoongoleleí ʻi ha potufolofola ʻoku mou ako ʻi he kalasí. Pe te mou fili mei he ngaahi potufolofola ʻoku ʻoatu ʻi laló. Fakaafeʻi ʻa e kau akó ke nau vahevahe ʻa e tokāteline mo e ngaahi tefitoʻi moʻoni ʻoku nau maʻú.

Ngaahi potufolofola lahi ange ke fakaangaangá:

• Sēnesi 39:7–9

• Mātiu 18:23–35

• ʻAlamā 41:10

• Tokāteline mo e Ngaahi Fuakava 58:26–27

Poupouʻi ʻa e kau akó ke nau fakaʻaongaʻi ʻa e taukei ko ʻeni ʻo hono kumi ke ʻiloʻi ʻa e ngaahi moʻoni ʻo e ongoongoleleí ʻi he folofolá he lolotonga ʻenau ako fakatāutahá. ʻI he ngaahi uike ka hokó, fakakaukau ke kamata e kalasí ʻaki hano fakaafeʻi ʻa e kau akó ke nau vahevahe ʻa e ngaahi moʻoni naʻa nau ʻilo ʻi he lolotonga ʻo ʻenau ako fakatāutahá.

ʻI hoʻo hoko atu ke vakaiʻi mo fakaangaanga ʻa e taukei ko ʻení, fakakaukau ke akoʻi ha ngaahi taukei lahi ange ki he kau akó ʻe ala tokoni ke nau ʻiloʻi ʻa e moʻoní. Ko e taha ʻo e faʻahinga taukei peheé ko hano kumi ʻa e ngaahi moʻoni kuo ʻosi fakahā ʻe he kau palōfita mo kau ʻaposetolo ʻo onopōní mei ha potufolofola.

ʻE lava foki ke toe tokoni ʻa e ngaahi ako fakataukei kehe ʻoku ʻi he naunau ko ʻení ke ʻiloʻi lelei ange ʻe he kau akó ʻa e ngaahi moʻoní, hangē ko e “Kumi ʻo e Ngaahi Fengāueʻaki ʻa e Tupuʻangá mo e Olá ʻi he Folofolá” mo e “Ko e Mahino ʻa e Folofolá ʻi Hono Puipuituʻá.”